ସାଇବର ଠକାମିର ଶିକାର ପରେ… । ଅଜୟଙ୍କୁ ଜୀବନ ରକ୍ଷାକାରୀ ଇଞ୍ଜେକ୍ସନ ଯୋଗାଇବ ଚେନ୍ନାଇ କମ୍ପାନୀ ।
କନକ ବ୍ୟୁରୋ: ବ୍ଲାକ ଫଙ୍ଗସ ରୋଗରେ ପୀଡିତ ଅଜୟ ଭୁୟାଁଙ୍କୁ ଜୀବନ ରକ୍ଷାକାରୀ ଲିପୋସମାଲ ଇଂଜେକ୍ସନ ଯୋଗାଇ ଦେବ ଚେନ୍ନାଇ କମ୍ପାନୀ । କନକ ନ୍ୟୁଜରେ ଖବର ପ୍ରସାରଣ ପରେ ଭୁବନେଶ୍ୱର ଏମ୍ସରେ ଚିକିତ୍ସିତ ହେଉଥିବା ରୋଗୀଙ୍କୁ ଏହି ଇଂଜେକ୍ସନ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛି ନେକ୍ସଜେନମେଡ ଫାର୍ମାସି ପ୍ରାଇଭେଟ୍ ଲିମିଟେଡ୍ । ଏଥିସହ ନିଜକୁ କମ୍ପାନିର ପ୍ରତିନିଧି କହି ୪୮ ହଜାର ଟଙ୍କା ଠକି ନେଇଥିବା ଅରୁଣ କୁମାର ବିରୋଧରେ ସାଇବର ଅପରାଧ ଆଇନରେ କାର୍ଯ୍ୟାନୁଷ୍ଠାନ ପାଇଁ ବି ସୁପାରିଶ କରିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ପ୍ରଶ୍ନ ଉଠୁଛି, କମ୍ପାନୀ ନାଁରେ ଇଂଜେକ୍ସନ ଯୋଗାଇ ଦେବା ପାଇଁ ଅନଲାଇନରେ ଠକାମି ହେଉଥିବାବେଳେ କେମିତି ଜାଣିପାରି ନଥିଲେ କମ୍ପାନୀ କର୍ତୁପକ୍ଷ । ଇଂଜେକ୍ସନ ଯୋଗାଇଦେବାକୁ କହି ଠକ୍ ଜଣଙ୍କ କେବଳ ଅଜୟ ଭୁୟାଁଙ୍କୁ ଠକି ଥିଲେ ନା ଆଉ କେତେଜଣଙ୍କୁ ଠକିଛନ୍ତି । ଏହାର ତଦନ୍ତ ହେବାର ଆବଶ୍ୟକତା ରହିଛି ।
ଅଜୟ ଭୁୟାଁ ନାମକ ରୋଗୀ ଜଣକ ବ୍ଲାକ ଫଙ୍ଗସ ଭଳି ଏକ ମାରାତ୍ମକ ରୋଗରୁ ଆରୋଗ୍ୟ ହେବା ପାଇଁ ସଂଘର୍ଷ କରୁଥିବାବେଳେ, ଏମ୍ସ ହସ୍ପିଟାଲ ପକ୍ଷରୁ କୁହାଯାଇଥିଲା, ଲିପୋସମାଲ ଇଂଜେକସନ ବାହାରୁ ଆଣିବା ପାଇଁ କାରଣ ଏହା ହସ୍ପିଟାଲରେ ମିଳୁନାହିଁ । ଏଭଳି ପରିସ୍ଥିତିରେ ଇଞ୍ଜେକସନ ଯୋଗାଇ ଦେବାକୁ କହି ଅଜୟଙ୍କ ପରିବାର ଠାରୁ ୪୮ ହଜାର ଟଙ୍କା ଠକି ନେଇଥିଲା ଠକ ଅରୁଣ କୁମାର । ସେ ତାମିଲନାଡୁର ନେକ୍ସଜେନମେଡ ଫାର୍ମାସୀ ପ୍ରାଇଭେଟ ଲିମିଟେଡର ପ୍ରତିନିଧି କହି ଇଂଜେକ୍ସନ ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲା । କିନ୍ତୁ ଟଙ୍କା ନେବା ପରେ ଇଂଜେକସନ ଆସିନଥିଲା କି ଏବଂ ତାର ଫୋନ ବି ବନ୍ଦ ହୋଇଯାଇଥିିଲା ।
ମହାମାରୀ କରୋନା ଓ ବ୍ଲାକଫଙ୍ଗସ ଭଳି ରୋଗରେ ଅନେକ ଆକ୍ରାନ୍ତ ହସ୍ପିଟାଲ ବେଡରେ ଜୀବନ ମରଣ ସହ ସଂଘର୍ଷ କରୁଛନ୍ତି । ଏଭଳି ସମୟରେ ଅତି ଜରୁରୀ ଇଂଜେକ୍ସନ ଯୋଗାଇଦେବାକୁ କହି ଠକେଇ ଖବର ସାମନାକୁ ଆସିବା ପରେ ଏହାକୁ ଗୁରୁତ୍ୱର ସହ ନେଇ ଖବର ପ୍ରସାରଣ କରିଥିଲା କନକ ନ୍ୟୁଜ୍ ।