ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ଘନ ଘନ ବୈଠକ ଜାରି । ପରିଚାଳନା କମିଟି ପରେ ଏବେ ଚାଲିଛି ଛତିଶା ନିଯୋଗ ବୈଠକ । ଗଜପତି କହିଲେ, ଶ୍ରୀମନ୍ଦିର ସତ୍ୱଲିପି ଛାଡି ଗ୍ରହଣ କରାଯିବ ନୂଆ ବ୍ୟବସ୍ଥା । ଶଙ୍କରାଚାର୍ଯ୍ୟ କହିଲେ, ପୁନର୍ବିଚାର ହେଉ ।
କନକ ବ୍ୟୁରୋ: ରଥଯାତ୍ରା ବନ୍ଦ କରିବା ନେଇ ସୁପ୍ରିମକୋର୍ଟଙ୍କ ରାୟ ପରେ ଶୁକ୍ରବାର ଶ୍ରୀମନ୍ଦିର ପରିଚାଳନା କମିଟିର ବୈଠକ ବସିଥିଲା । କେମିତି ହେବ ମହାପ୍ରଭୁଙ୍କ ରୀତିନୀତି, କଣ କରାଯିବ, ଠାକୁର କେମିତି ଅଣସର ପିଣ୍ଡିରୁ ରତ୍ନବେଦୀକୁ ଯିବେ, ଏସବୁ ଜଟିଳ ପ୍ରସଙ୍ଗରେ ଆଲୋଚନା ଚାଲିଲା । କାରଣ, ରଥ ତିଆରି ପ୍ରାୟ ୯୫ ପ୍ରତିଶତ ସରିଯାଇଥିଲା ଏବଂ ସ୍ନାନପୂର୍ଣ୍ଣିମା ସୁରୁଖୁରୁରେ ହୋଇଥିବାରୁ ସମସ୍ତେ ଧରିନେଇଥିଲେ ଯେ, ରଥଯାତ୍ରା ହେବାକୁ ଯାଉଛି । କିନ୍ତୁ ସୁପ୍ରିମକୋର୍ଟଙ୍କ ରାୟ ଏଥିରେ ପୂର୍ଣ୍ଣଚ୍ଛେଦ ଟାଣିଦେଲା ।
Kanak News is now on WhatsApp
Join and get latest news updates delivered to you via WhatsApp
ମନ୍ଦିର ଭିତରେ ହେବ ରଥ ନୀତିର ଧାର୍ମିକ ପ୍ରକ୍ରିୟା
ଶ୍ରୀମନ୍ଦିର ସ୍ୱତ୍ୱଲିପି ଛାଡି ଅନ୍ୟ ବ୍ୟବସ୍ଥା ହେବ
ପ୍ରଥମ ପର୍ଯ୍ୟାୟ ପରିଚାଳନା କମିଟି ବୈଠକରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପାଳିବାକୁ ନିଷ୍ପତି ହୋଇଛି । ଧାର୍ମିକ କାରଣରୁ ନୁହେଁ ବରଂ କରୋନା ପାଇଁ ଦୁଃଖର ସହ ରଥଯାତ୍ରା ବନ୍ଦ ନିଷ୍ପତ୍ତି ନିଆଯାଇଛି । ତେବେ ମନ୍ଦିର ଭିତରେ ଧାର୍ମିକ ପ୍ରକ୍ରିୟା ଅନୁସାରେ ମହାପ୍ରଭୁଙ୍କ ସବୁ ନୀତିକାନ୍ତି ପାଳନ ହେବ ବୋଲି କହିଛନ୍ତି ପୁରୀ ଗଜପତି ।
ବର୍ତମାନ କରୋନା ମହାମାରୀ ଭଳି ଅସାଧାରଣ ପରିସ୍ଥିତି । ଏଭଳି ସମୟରେ ମହାପ୍ରଭୁଙ୍କ ପାଇଁ ଆସାଧାରଣ ବ୍ୟବସ୍ଥା କରିବାକୁ ପଡିବ । ତେଣୁ ଶ୍ୱୀମନ୍ଦିର ସ୍ୱତ୍ୱଲିପି ଛାଡି ଅନ୍ୟ ବ୍ୟବସ୍ଥା ଗ୍ରହଣ କରିବାକୁ ସମ୍ମତି ପ୍ରକାଶ ପାଇଛି । ଶ୍ରୀମନ୍ଦିର ଭିତରେ କିଭଳି ମହାପ୍ରଭୁଙ୍କ ବିଧି ରକ୍ଷା ହେବ ତାଉପରେ ଗୁରୁତ୍ୱ ଦେଇଛି ପରିଚାଳନା କମିଟି । ଏପଟେ ଦ୍ୱନ୍ଦ୍ୱ ବଢାଇଛି ଜଗତଗୁରୁ ଶଙ୍କରାଚାର୍ଯ୍ୟଙ୍କ ମତ । ଶଙ୍କରାଚାର୍ଯ୍ୟ କହିଛନ୍ତି, ରଥଯାତ୍ରା ନିଷ୍ପତିର ପୁନର୍ବିଚାର ହେଉ । ଆବଶ୍ୟକ ସେବାୟତ ଓ ପୁଲିସ ସହାୟତାରେ ଶାସ୍ତ୍ର ସମ୍ମତ ଓ ପରମ୍ପରା ମୁତାବକ ରଥଯାତ୍ରା ହୋଇପାରିବ ।
ଗୋଟିଏ ପଟେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ମାନି ମନ୍ଦିର ଭିତରେ ରଥ ନୀତି କରିବାକୁ ପରିଚାଳନା ବୈଠକରେ ସ୍ଥିର ହୋଇଥିବା ବେଳେ, ଏହାକୁ ମାନିବାକୁ ନାରାଜ ସେବାୟତ । ବରିଷ୍ଠ ସେବାୟତ ସଫା ସଫା କହିଛନ୍ତି, ମନ୍ଦିର ଭିତରେ ରଥଯାତ୍ରାର ବିକଳ୍ପ ନାହିଁ ତେଣୁ ମହାପ୍ରଭୁ ବର୍ଷେ ଯାଏ ଅଣସରପିଣ୍ଡିରେ ରହିବେ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ପରିଚାଳନା କମିଟି, ଛତିଶା ନିଯୋଗ ଓ ଦଇତାପତି ନିଯୋଗ ସହ ଆଲୋଚନା କରି ମନ୍ଦିର ଭିତରେ ରଥ ଯାତ୍ରା ନୀତି ସ୍ଥିର ହେବ ।