ରଥଖଳାରେ ହେବ ଜୈବ ବଳୟ । ଆଇପିଏଲ ଭଳି ରଥ ନିର୍ମାଣରେ ବ୍ୟବହାର ହେବ ‘ଜୈବବଳୟ’ ପ୍ରଣାଳୀ । ୮ ଜଣ ଭୋଇ ଓ ମହାରଣା ସେବାୟତ ପଜିଟିଭ ପରେ ପ୍ରଶାସନର ନିଷ୍ପତ୍ତି ।
କନକ ବ୍ୟୁରୋ: ପରମ୍ପରା ଅନୁସାରେ ଅକ୍ଷୟ ତୃତୀୟାରୁ ଆରମ୍ଭ ହୋଇଛି ରଥ ନିର୍ମାଣ କାର୍ଯ୍ୟ । କିନ୍ତୁ ଏବେ ରଥନିର୍ମାଣ କାର୍ଯ୍ୟରେ ନିୟୋଜିତ ସେବକଙ୍କ ମଧ୍ୟରୁ ୮ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ୩ ଜଣ ମହାରଣା ସେବାୟତ ଓ ୫ ଜଣ ଭୋଇ ସେବକ ସଂକ୍ରମିତ ହେବା ପରେ କେମିତି ରଥ ନିର୍ମାଣ କାର୍ଯ୍ୟ ଜାରି ରହିବ ତାହା ପ୍ରଶାସନର ଚିନ୍ତାକୁ ବଢ଼ାଇ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଧାର୍ଯ୍ୟ ସମୟ ପୂର୍ବରୁ ରଥନିର୍ମାଣ କାର୍ଯ୍ୟ ଶେଷ କିପରି କରାଯିବ ସେଥିପାଇଁ ଶ୍ରୀମନ୍ଦିର ପ୍ରଶାସନ ପାଇଁ ବଡ ଚ୍ୟାଲେଞ୍ଜ ହୋଇଛି । ଏସବୁକୁ ନଜରରେ ରଖି ରଥଖଳାକୁ କିଭଳି ସଂକ୍ରମଣମୁକ୍ତ ରଖାଯାଇ ପାରିବ ସେଥିପାଇଁ ଜୈବ ବଳୟ ସୃଷ୍ଟି କରି କାର୍ଯ୍ୟ କରିବାକୁ ଯୋଜନା କରିଛି ପ୍ରଶାସନ । ଯେଉଁମାନେ ରଥନିର୍ମାଣ କାର୍ଯ୍ୟରେ ନିୟୋଜିତ ହେବେ ସେମାନେ ଏହି ବଳୟ ଭିତରେ ରହିବେ ଓ କାହା ସଂସ୍ପର୍ଶରେ ନଆସି କାର୍ଯ୍ୟ କରିବେ ।
ତେବେ ଜାଣନ୍ତୁ ଜୈବ ବଳୟ କଣ ?
– ଜୈବ ବଳୟ ହେଉଛି ଏକ କୁତ୍ରିମ ସୁରକ୍ଷା କବଚ
– ଏହି ବଳୟ ଭିତରକୁ ଯିବା ପୂର୍ବରୁ କରୋନା ପରୀକ୍ଷା କରାଯାଇ ଥାଏ
– ଯେଉଁମାନଙ୍କର ନେଗେଟିଭ୍ ରିପୋର୍ଟ ଆସିଥାଏ, ସେହିମାନେ ଏହି ବଳୟ ଭିତରକୁ ଯାଇଥାନ୍ତି ।
– ଯେଉଁମାନେ ଜୈବ ବଳୟ ଭିତରକୁ ଯାଇଥାନ୍ତି କାର୍ଯ୍ୟ ଶେଷ ନହେବା ପର୍ଯ୍ୟନ୍ତ ଅନ୍ୟ କାହା ସଂସ୍ପର୍ଶରେ ଆସି ନଥାନ୍ତି
– ସଂକ୍ରମଣ ହେବାର ଆଶଙ୍କା କମ ରହିଥାଏ
ତେବେ ଏହା ପୂର୍ବରୁ ଆଇପିଏଲ ଭଳି ବଡ ବଡ ଟୁର୍ଣ୍ଣାମେଂଟରେ ଖେଳାଳିଙ୍କୁ ଜୈବ ବଳୟ ମଧ୍ୟରେ ରଖାଯାଇଥିଲା । କିନ୍ତୁ ସେଠାରେ ଏହା ଫେଲ ମାରିଥିଲା । ଅଧାରୁ ଅଟକିଥିଲା ଆଇପିଏଲ ଟୁର୍ଣ୍ଣାମେଂଟ । ଏବେ ରଥଖଳାରେ ଏହି ପ୍ରଣାଳୀ କେତେ କାମ ଦେଉଛି ତାହା ଦେଖିବାର ବାକି ।