କରୋନା ମୁକାବିଲାରେ ଦେଶକୁ ଦିଲ୍ଲୀ ଦେଖାଇବ ବାଟ: ଲାଗୁ ହୋଇପାରେ ଦିଲ୍ଲୀ ମଡେଲ, କାଲି ବିଭିନ୍ନ ରାଜ୍ୟର ଅଧିକାରୀଙ୍କ ସହ କେନ୍ଦ୍ର ସଚିବଙ୍କ ଆଲୋଚନା
ସୁସ୍ଥତାରେ ଜାତୀୟ ହାରଠୁ ଆଗରେ ଦିଲ୍ଲୀ
କନକ ବ୍ୟୁରୋ: କରୋନା ଲଢେଇରେ ଦେଶକୁ ବାଟ ଦେଖାଇବ ଦିଲ୍ଲୀ । କୋଭିଡ୍ ୧୯ ମୁକାବିଲାରେ ଜାତୀୟ ସୁସ୍ଥ ହାର ଠାରୁ ଦିଲ୍ଲୀରେ ସୁସ୍ଥ ହାର ଅଧିକ । ବର୍ତମାନ କୋଭିଡ୍ ୧୯ ର ଜାତୀୟ ସୁସ୍ଥ ହାର ରହିଛି ୬୩.୫ । ଦିଲ୍ଲୀରେ କରୋନା ଭୂତାଣୁ ସଂକ୍ରମଣର ସୁସ୍ଥ ହାର ରହିଛି ୮୭ ପ୍ରତିଶତ । ଯାହାକି ସାରା ଦେଶରେ ସବୁଠାରୁ ଅଧିକ । ଏବେ କରୋନା ମୁକାବିଲାରେ ସାରା ଦେଶକୁ ବାଟ ଦେଖାଇବ ଦିଲ୍ଲୀ । ଦିଲ୍ଲୀ ମଡେଲ୍ ଅନ୍ୟ ରାଜ୍ୟରେ ବ୍ୟବହାର ନେଇ ରଣନୀତି ତିଆରି କରିବାକୁ ଆସନ୍ତାକାଲି ବସିବ ବୈଠକ । ସୂଚନା ଅନୁସାରେ ଏହି ବୈଠକରେ ବିଭିନ୍ନ କରୋନା ପ୍ରବଣ ରାଜ୍ୟରେ କିପରି ଏହାର ମୁକାବିଲା କରାଯିବ ସେ ନେଇ ବିଶେଷ ଭାବରେ ଆଲୋଚନା କରାଯିବ । କେନ୍ଦ୍ର ଗୃହ ସଚିବ ଅଜୟ ଭାଲାଙ୍କ ନେତୃତ୍ୱରେ ଏହି ବୈଠକ ବସିବ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀରେ କଣ କଣ ଯୋଜନା କରିବା ଦ୍ୱାରା କରୋନା ଭୂତାଣୁ ସଂକ୍ରମଣ ନିୟନ୍ତ୍ରଣକୁ ଆସିପାରିଲା ସେହି ଅନୁରୂପ ମଡେଲ ଅନ୍ୟ ରାଜ୍ୟରେ ପ୍ରୟୋଗ କରିବାକୁ କେନ୍ଦ୍ର ସରକାର ମନ ବଳାଇଛନ୍ତି । ଏହା ସହିତ ଆଗାମୀ ଦିନରେ ଦିଲ୍ଲୀରେ କିପରି କରୋନା ସଂକ୍ରମଣକୁ ମୁକାବିଲା କରାଯିବ ସେ ନେଇ ମଧ୍ୟ ଆଲୋଚନା ହେବ । ଏହି ବୈଠକର ଏଜେଣ୍ଡା ଅନୁସାରେ ଦିଲ୍ଲୀ ମୁଖ୍ୟ ଶାସନ ସଚିବ ବିଜୟ ଦେବ ଦିଲ୍ଲୀର କୋଭିଡ ୧୯ ମୁକାବିଲା ନେଇ ଦିଲ୍ଲୀ ମଡେଲର ବିଶେଷ ତଥ୍ୟ ରଖିବେ । ଏହି ବୈଠକରେ କେନ୍ଦ୍ର ଗୃହ ସଚିବ, କେନ୍ଦ୍ର ସ୍ୱାସ୍ଥ୍ୟ ସଚିବ, ନୀତି ଆୟୋଗ ସଦସ୍ୟ ଡକ୍ଟର ଭିକେ ପାଉଲଙ୍କ ସହିତ ଅନ୍ୟ ଅଧିକାରୀ ମଧ୍ୟ ଯୋଗ ଦେବେ । ଜୁଲାଇ ମାସର ଆରମ୍ଭ ବେଳକୁ ଦେଶରେ ମହାରାଷ୍ଟ୍ର, ଦିଲ୍ଲୀ ଓ ତାମିଲନାଡୁ ଦେଶର ଅଧିକ କରୋନା ପ୍ରବଣ ରାଜ୍ୟ ରହିଥିଲେ । ତେବେ ବର୍ତମାନ ସଂକ୍ରମଣର ନୂଆ ସ୍ଥାନ ପାଲଟିଗଲାଣି ଆନ୍ଧ୍ରପ୍ରଦେଶ, ଆସାମ, ବିହାର, ଗୁଜରାଟ, କର୍ଣ୍ଣାଟକ, ତେଲଙ୍ଗାନା, ଉତରପ୍ରଦେଶ ଏବଂ ପଶ୍ଚିମବଙ୍ଗ ।
ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ସୂଚନା ଦେଇଥିଲେ ଦିଲ୍ଲୀ ମଡେଲ ହେଉଛି ନମୂନା ପରୀକ୍ଷା, ଘରୋଇ ସଂଗରୋଧ, ସଠିକ୍ ତଥ୍ୟ, ଡାକ୍ତରଖାନା ବେଡ୍ ସଂଖ୍ୟା ଏବଂ ପ୍ଲାଜମାଥେରାପି । ତେବେ ଏହାକୁ ସଫଳ କରିବାକୁ ଟିମ୍ ୱାର୍କ, ଗଠନମୂଳକ ସମାଲୋଚନା ଏବଂ ସମସ୍ୟା କଣ ଜାଣିବା ସହ ଚିହ୍ନଟ କରିବା ଏବଂ ସ୍ଥିତି ଯେତେ ଖରାପ ହେଲେ ବି ଉଦ୍ୟମ ଜାରି ରହିବା ଆବଶ୍ୟକ । ଏହାକୁ ବ୍ୟବହାର କରିବା ପରେ ଦିଲ୍ଲୀରେ ବର୍ତମାନ ଗୋଷ୍ଠୀରେ ରୋଗ ପ୍ରତିରୋଧକ ଶକ୍ତି ବଢାଇବାକୁ କାମ କରିବା ଆରମ୍ଭ କରିଛି ।