ତୃତୀୟ ଲହରରେ ଛୋଟ ପିଲାଙ୍କୁ ନେଇ ଚିନ୍ତା : କିପରି ହେବ ପିଲାଙ୍କ ଚିକିତ୍ସା ? ଗାଇଡଲାଇନ ଜାରି କଲା ସ୍ୱାସ୍ଥ୍ୟସେବା ମହାନିର୍ଦ୍ଦେଶାଳୟ
କନକ ବ୍ୟୁରୋ : କରୋନାର ତୃତୀୟ ଲହର ପିଲାଙ୍କ ଉପରେ ଅଧିକ ପ୍ରଭାବ ପକାଇବା ଆଶଙ୍କା ଥିବାରୁ କେମିତି ଏହାର ମୁକାବିଲା କରାଯିବ, ଏ ନେଇ ଗାଇଡଲାଇନ ବା ମାର୍ଗଦର୍ଶିକା ଜାରି କରିଛି କେନ୍ଦ୍ର ସ୍ୱାସ୍ଥ୍ୟ ସେବା ମହାନିର୍ଦ୍ଦେଶାଳୟ । ୧୮ ବର୍ଷରୁ କମ୍ ପିଲାଙ୍କ ଚିକିତ୍ସା ପାଇଁ ଗାଇଡଲାଇନ ପ୍ରସ୍ତୁତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଯଦି ଲକ୍ଷଣ ନଥିବ ବା ସାମାନ୍ୟ ଲକ୍ଷଣ ଥିବ, ତେବେ କରୋନା ଆକ୍ରାନ୍ତ ପିଲାଙ୍କୁ ହୋମ ଆଇସୋଲେସନ୍ ବା ଘରେ ସଙ୍ଗରୋଧରେ ରଖି ଚିକିତ୍ସା କରାଯାଇପାରିବ । ଯଦି ଆଦୌ ଲକ୍ଷଣ ନାହିଁ, ତେବେ କରୋନା ଚିକିତ୍ସା ପାଇଁ ମେଡିସିନର ଆବଶ୍ୟକତା ନାହିଁ । ସଙ୍ଗରୋଧରେ ରଖି ହାତ ଧୋଇବା, ମାସ୍କ ପିନ୍ଧିବା ଭଳି କଟକଣା କଡ଼ାକଡ଼ି ପାଳନ କରାଯିବ । ଦେହରେ ଜଳୀୟ ଅଂଶ ବଢ଼ାଇବା ପାଇଁ ଦୃଷ୍ଟି ଦେବା ସହ ପୁଷ୍ଟିକର ଖାଦ୍ୟ ଦେବାକୁ ଗାଇଡଲାଇନରେ କୁହାଯାଇଛି । ପିଲା ଯେପରି ମାନସିକ ଭାବେ ଦୃଢ ରହିବେ ପରିବାରର ଅନ୍ୟ ସଦସ୍ୟ ଏଥିପ୍ରତି ଧ୍ୟାନ ଦେବେ । ଅନ୍ୟ କୌଣସି ସମସ୍ୟା ଥିଲେ, ତା’ର ଚିକତ୍ସା କରାଯିବ । ଯଦି ଲକ୍ଷଣ ଦେଖାଦେବ, ସେଥିପାଇଁ ଡାକ୍ତରଙ୍କ ପରାମର୍ଶ ନେବେ ।
ସେହିପରି ସାମାନ୍ୟ ଲକ୍ଷଣ ଥିବା ଆକ୍ରାନ୍ତଙ୍କୁ ମଧ୍ୟ ଘରେ ସଙ୍ଗରୋଧରେ ରଖି ଡାକ୍ତରଙ୍କ ପରାମର୍ଶ ନେଇ ଚିକିତ୍ସା କରା ଯାଇପାରିବ । ବିଶେଷ କିଛି ଔଷଧର ଆବଶ୍ୟକତା ନାହିଁ । ଲକ୍ଷଣ ନଥିବା ରୋଗୀଙ୍କ କ୍ଷେତ୍ରରେ ଯାହା ନିୟମ ରହିଛି, ତାହା ପାଳନ କରାଯିବ । ଜର ରହିଲେ, ବୟସ ଓ ଓଜନକୁ ଦୃଷ୍ଟିରେ ରଖି ପାରାସିଟାଲ ଡୋଜ୍ ୪ରୁ ୬ ଘଂଟା ଅନ୍ତରରେ ଦେଇପାରିବେ । ଆଂଟି-ବାୟୋଟିକ୍ ମେଡିସିନର ଆବଶ୍ୟକତା ନାହିଁ । ସ୍ଥିତି ବିଗିଡିଲେ, ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ ମାର୍ଗଦର୍ଶିକାରେ ଉଲ୍ଲେଖ ରହିଛି ।
ମଧ୍ୟମ ଧରଣର ସଂକ୍ରମିତ ପିଲାଙ୍କୁ ହସପିଟାଲରେ ଭର୍ତି କରି ଚିକିତ୍ସା କରିବାକୁ କୁହାଯାଇଛି । ଅମ୍ଳଜାନ ସ୍ତର ୯୦ରୁ ୯୩ ପ୍ରତିଶତ ମଧ୍ୟରେ ରହିଲେ, ଏହାକୁ ମଧ୍ୟମ ଧରଣର ଆକ୍ରାନ୍ତ କୁହାଯିବ । ଏହି ରୋଗୀଙ୍କୁ କୋଭିଡ୍ ହସପିଟାଲରେ ଅକ୍ସିଜେନ୍ ଥେରାପି ସହ ଆବଶ୍ୟକ ଚିକିତ୍ସା କରିବାକୁ କୁହାଯାଇଛି । ଦେହରେ ଜଳୀୟ ଅଂଶ ଓ ଇଲେଟ୍ରୋଲାଇଟ୍ ସ୍ତର ଉପରେ ଧ୍ୟାନ ଦେବାକୁ ହେବ । ମଧ୍ୟମ ଧରଣର ଆକ୍ରାନ୍ତ ଥିବା ପିଲାଙ୍କ ପାଇଁ ଷ୍ଟେରଏଡ୍ ଆବଶ୍ୟକ ହୋଇନପାରେ । ଆବଶ୍ୟକ କ୍ଷେତ୍ରରେ ରକ୍ତ ପତଳା ହେବା ଔଷଧ ବ୍ୟବହାର କରାଯାଇପାରେ । ସ୍ଥଳ ବିଶେଷରେ ଆଂଟିବାୟୋଟିକ୍ ବ୍ୟବହାର କରାଯିବ । ଅନ୍ୟ ରୋଗ ଥିଲେ, ସେହି ଅନୁଯାୟୀ ଚିକତ୍ସା କରାଯିବ ।
ତେବେ ଯେଉଁ ପିଲାମାନେ ଗୁରୁତର ଭାବେ ଆକ୍ରାନ୍ତ ହୋଇଯିବେ, ସେମାନଙ୍କୁ ଆଇସିୟୁ କିମ୍ବା ଏଚଡିୟୁରେ ରଖି ଚିକିତ୍ସା କରିବାକୁ କୁହାଯାଇଛି । ଗୁରୁତର ରୋଗୀ ଅର୍ଥାତ୍ ଯେଉଁମାନଙ୍କ ଅମ୍ଳଜାନ ସ୍ତର ୯୦ ପ୍ରତିଶତ ତଳକୁ ଖସି ଯାଇଥିବ, ତୁରନ୍ତ କୋଭିଡ୍ ହସପିଟାଲରେ ଭର୍ତି କରାଯାଇ ଅମ୍ଳଜାନ ଦେବା ସହ ଆଇସିୟୁ କିମ୍ବା ଏଚଡିୟୁରେ ରଖି ଚିକିତ୍ସା କରାଯିବ ବୋଲି ଗାଇଡଲାଇନ୍ ଜାରି କରାଯାଇଛି । ଆବଶ୍ୟକ ଥିଲେ, ଆଂଟି-ବାୟୋଟିକ୍, ଷ୍ଟେରଏଡ୍, ରକ୍ତ ପତଳା କରିବା ଔଷଧ ଆଦି ବ୍ୟବହାର କରାଯିବ । ଅନ୍ୟ ସମସ୍ୟା ଉପୁଜିଲେ, ସେହି ଅନୁଯାୟୀ ଚିକିତ୍ସା କରାଯିବ ।