ଏ କଣ କହିଗଲେ ମୋଦିଙ୍କ ମନ୍ତ୍ରୀ ! ଭାରତ ଭଳି ଦେଶରେ ଗୋଟିଏ ଦୁଇଟି ଦୁଷ୍କର୍ମ ହୋଇଯାଏ, ଏହାକୁ ଅତିରଞ୍ଜିତ କରିବା ଦରକାର ନାହିଁ
ଗୋଟିଏ ପଟେ ଦେଶରେ ନାବାଳିକା ଦୁଷ୍କର୍ମକୁ ନେଇ ତାତି ଥମି ନଥିବା ବେଳେ ଏହାକୁ ଆହୁରି ବିବାଦୀୟ କରିଛନ୍ତି ମୋଦିଙ୍କ ମନ୍ତ୍ରୀ । କଠୁଆ ନାବାଳିକା ଗଣ ଦୁଷ୍କର୍ମକୁ ନେଇ ଦେଶବାସୀଙ୍କ ମଧ୍ୟରେ ଅସନ୍ତୋଷ ଦେଖା ଦେଇଥିବା ବେଳେ ବିବାଦୀୟ ମନ୍ତବ୍ୟ ଦେଇ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ସନ୍ତୋଷ ଗଙ୍ଗୱାର ଚର୍ଚ୍ଚାକୁ ଆସିଛନ୍ତି । କେନ୍ଦ୍ରମନ୍ତ୍ରୀ କହିଛନ୍ତି, ଦେଶର ହେଉଥିବା ଦୁଷ୍କର୍ମ ନିହାତି ଭାବେ ଦୁଭାଗ୍ୟଜନକ ଘଟଣା । କିନ୍ତୁ ଏହାକୁ ବେଳେ ବେଳେ ରୋକାଯାଇ ପାରିବ ନାହିଁ । ଭାରତ ଏକ ବଡ ଦେଶ । ଏଠାରେ ଯଦି ଗୋଟିଏ ଦୁଇଟି ଦୁଷ୍କର୍ମ ଘଟଣା ଘଟିଯାଉଛି ତେବେ ଏହାକୁ ଏତେ ଅତିରଞ୍ଜିତ କରିବାର ଆବଶ୍ୟକତା ନାହିଁ । କେନ୍ଦ୍ର ସରକାର ସକ୍ରିୟ ରହିଛନ୍ତି । ଏଭଳି ଘଟଣା ପାଇଁ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଉଛି । ଏଥିପାଇଁ ଯାହା ବି କିଛି ପଦକ୍ଷେପ ନେବା କଥା ତାହା ନିଆଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ହେଲା ଦେଶର ବିଭିନ୍ନ ସ୍ଥାନରେ ମହିଳାମାନଙ୍କ ସହ ଦୁଷ୍କର୍ମ କରାଯାଉଥିବା ଘଟଣା ସାମ୍ନାକୁ ଆସୁଛି । ଖାସକରି ବିଜେପି ଶାସିତ ରାଜ୍ୟରେ କଠୁଆ ଓ ଉନ୍ନାଓ ଭଳି ଘଟଣାକୁ ନେଇ ଏବେ ମୋଦି ସରକାର ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଗୋଟିଏ ପଟେ ମୋଦି ସରକାର ବେଟି ବଚାଓ ବେଟି ପଢାଓର ନାରା ଦେଉଥିବା ବେଳେ କେନ୍ଦ୍ରମନ୍ତ୍ରୀଙ୍କ ଏଭଳି ବୟାନ ଏବେ ସରକାରଙ୍କୁ କାଠଗଡାକୁ ଟାଣିଛି । ରାମରାଜ୍ୟର ସ୍ୱପ୍ନ ଦେଖାଉଥିବା ମୋଦି ସରକାରର ମନ୍ତ୍ରୀଙ୍କ ଏଭଳି ବିବାଦୀୟ ବୟାନକୁ ସହଜରେ ଗ୍ରହଣ କରି ପାରୁ ନାହାନ୍ତି ସାଧାରଣ ଲୋକ । ତେବେ ଏନେଇ ସନ୍ତୋଷ ଗଙ୍ଗୱାର କହିଛନ୍ତି ତାଙ୍କ ବୟାନକୁ ଗଣମାଧ୍ୟମରେ ଭୁଲ ଭାବେ ଉପସ୍ଥାପିତ କରାଯାଇଛି ।
ସେହିଭଳି ଏହା ପୂର୍ବରୁ ବିଜେପି ନେତ୍ରୀ ହେମାମାଳିନୀ କହିଥିଲେ ମହିଳା ଓ ଶିଶୁଙ୍କ ଉପରେ ପୂର୍ବରୁ ମଧ୍ୟ ଏଭଳି ଘଟଣା ଦେଖିବାକୁ ମିଳୁଥିଲା । କିନ୍ତୁ ଏବେ ଏହାକୁ ଅଧିକ ଅତିରଞ୍ଜିତ କରାଯାଉଛି । ଗୋଟିଏ ପଟେ କେନ୍ଦ୍ର କ୍ୟାବିନେଟ ନାବାଳିକା ଶିଶୁଙ୍କ ସହ ଦୁଷ୍କର୍ମ ପାଇଁ ମୃତ୍ୟୁ ଦଣ୍ଡ ଦେବାକୁ ଆସିଥିବା ଅଧ୍ୟାଦେଶରେ ମୋହର ମାରିଛନ୍ତି । କିନ୍ତୁ ମହିଳା ଓ ଶିଶୁଙ୍କ ସୁରକ୍ଷା ନେଇ ବିଜେପି ନେତା ଦେଉଥିବା ବୟାନ ମୋଦି ସରକାରକୁ ଅଡ଼ୁଆରେ ପକାଇଛି । ତେବେ ଏସବୁ ଭିତରେ ନାବାଳିକା ଦୁଷ୍କର୍ମକାରୀକୁ ମୃତ୍ୟୁଦଣ୍ଡ ଦେବା ଅଧ୍ୟାଦେଶକୁ ଆଜି ରାଷ୍ଟ୍ରପତି ମଂଜୁରୀ ଦେଇଛନ୍ତି । କେନ୍ଦ୍ର କ୍ୟାବିନେଟ ପରେ ରାଷ୍ଟ୍ରପତି ଅଧ୍ୟାଦେଶ ଉପରେ ହସ୍ତାକ୍ଷର କରିଛନ୍ତି । ଏହାପରେ କେନ୍ଦ୍ର ସରକାର ଅଧିସୂଚନା ଜାରି କରିଦେଇଛନ୍ତି । ଏବେ ଦୁଷ୍କର୍ମକୁ ନେଇ ନୂଆ ନିୟମ ଆସିବ ଓ ପକସୋ ଆକ୍ଟରେ ମଧ୍ୟ ସଂଶୋଧନ ହେବ । ୧୨ ବର୍ଷରୁ କମ ଝିଅଙ୍କ ପ୍ରତି ଦୁଷ୍କର୍ମ କରିବାର ପ୍ରମାଣ ମିଳିଲେ ତାଙ୍କୁ ମୃତ୍ୟୁଦଣ୍ଡ ଦିଆଯିବ ।