ରାଜ୍ୟ-ରାଜ୍ୟ ମଧ୍ୟରେ ଓ ରାଜ୍ୟ ଭିତରେ ଯାତାୟତ ଉପରେ କଟକଣା ନଲଗାଇବା ପାଇଁ କେନ୍ଦ୍ର ସରକାରଙ୍କ ତାଗିଦ: କେନ୍ଦ୍ର ଗୃହ ମନ୍ତ୍ରାଳୟର ଅନଲକ୍-୩ ମାର୍ଗଦର୍ଶିକାରେ ଥିବା ନିୟମକୁ କଡ଼ାକଡ଼ି ପାଳନ କରିବାକୁ ନିର୍ଦ୍ଦେଶ
କନକ ବ୍ୟୁରୋ: ରାଜ୍ୟ-ରାଜ୍ୟ ମଧ୍ୟରେ ଓ ରାଜ୍ୟ ଭିତରେ ଯାତାୟତ ଉପରେ କୌଣସି କଟକଣା ନଲଗାଇବା ପାଇଁ ପୁଣି ଥରେ ତାଗିଦ କରିଛନ୍ତି କେନ୍ଦ୍ର ସରକାର । ଏ ନେଇ କେନ୍ଦ୍ରଗୃହ ମନ୍ତ୍ରାଳୟର ଅନ୍ଲକ୍-୩ ମାର୍ଗଦର୍ଶିକାରେ ଥିବା ନିୟମକୁ କଡ଼ାକଡ଼ି ପାଳନ କରିବାକୁ ରାଜ୍ୟ ସରକାରଙ୍କୁ କୁହାଯାଇଛି । ଏହି ପ୍ରସଙ୍ଗରେ ଦୃଷ୍ଟି ଆକର୍ଷଣ କରି ସବୁ ରାଜ୍ୟର ମୁଖ୍ୟ ଶାସନ ସଚିବଙ୍କୁ ଚିଠି ଲେଖିଛନ୍ତି କେନ୍ଦ୍ର ଗୃହ ସଚିବ । ଏହି ଚିଠିରେ ଲେଖିଛନ୍ତି ଯେ ଗାଇଡ୍ଲାଇନ୍ ଅନୁଯାୟୀ ବ୍ୟକ୍ତିଙ୍କ ଯାତାୟତ କିମ୍ବା ସାମଗ୍ରୀର ପରିବହନ ନେଇ କୌଣସି କଟକଣା ନାହିଁ । ଏଥିପାଇଁ ସ୍ୱତନ୍ତ୍ର ଅନୁମତି, ଅନୁମୋଦନ କିମ୍ବା ଇ-ପରମିଟ୍ର ମଧ୍ୟ ଆବଶ୍ୟକତା ନାହିଁ । ରାଜ୍ୟ-ରାଜ୍ୟ ଭିତରେ, ରାଜ୍ୟ ଭିତରେ, ଏପରିକି ଚୁକ୍ତି ରହିଥିବା ପଡ଼ୋଶୀ ଦେଶ ମଧ୍ୟରେ ସଡ଼କ ପଥରେ ଅନାୟାସରେ ଚଳାଚଳ କରିହେବ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରଗୃହ ସଚିବ ଅଜୟ ଭାଲ୍ଲା, ମୁଖ୍ୟ ଶାସନ ସଚିବମାନଙ୍କୁ ଚିଠି ଲେଖି କହିଛନ୍ତି, ଦେଶର କିଛି ଅଂଚଳରେ ଲୋକଙ୍କ ଚଳାଚଳ ଉପରେ ଓ ମାଲ ପରିବହନରେ ସ୍ଥାନୀୟ ସ୍ତରରେ କଟକଣା ଲାଗିଥିବା ନେଇ ଅଭିଯୋଗ ଆସୁଛି । ରାଜ୍ୟ ସରକାର କିମ୍ବା ଜିଲ୍ଲା ପ୍ରଶାସନ ପକ୍ଷରୁ ଏହି କଟକଣା ଲଗାଯାଉଥିବାରୁ ସପ୍ଲାଏ ଚେନ୍ ବା ଯୋଗାଣ ଶୃଙ୍ଖଳ ପ୍ରଭାବିତ ହେଉଛି । ଫଳରେ ଏହା ଅର୍ଥନୈତିକ କାର୍ଯ୍ୟକଳାପ ଓ ଲୋକଙ୍କ ରୋଜଗାରକୁ ପ୍ରଭାବିତ କରୁଛି । ଜିଲ୍ଲା ପ୍ରଶାସନ ଓ ରାଜ୍ୟ ସରକାରଙ୍କ ଏଭଳି କଟକଣା, ବିପର୍ଯ୍ୟୟ ପରିଚାଳନା ଆଇନ ଅଧୀନରେ କେନ୍ଦ୍ର ଗୃହ ମନ୍ତ୍ରାଳୟ ଜାରି କରିଥିବା ମାର୍ଗଦର୍ଶିକାର ଉଲଂଘନ ବୋଲି ତାଗିଦ କରିଛନ୍ତି ଅଜୟ ଭାଲ୍ଲା । ତେଣୁ ଯାତାୟତ ଉପରେ କୌଣସି କଟକଣା ଜାରି ନକରିବାକୁ ରାଜ୍ୟଗୁଡିକୁ ସେ ଅନୁରୋଧ କରିଛନ୍ତି । ଅଗଷ୍ଟ ମାସ ପାଇଁ ଜାରି କରା ଯାଇଥିବା ଅନଲକ୍-୩ ଗାଇଡଲାଇନ୍କୁ କଡ଼ାକଡ଼ି ପାଳନ କରିବାକୁ କହିଛି କେନ୍ଦ୍ର ଗୃହ ମନ୍ତ୍ରାଳୟ ।