୪୬ ଟି ଜିଲ୍ଲାରେ ୧୦ ପ୍ରତିଶତ ଉପରେ ରହୁଛି ସଂକ୍ରମଣ । ୧୦ଟି ରାଜ୍ୟକୁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରାଳୟର ଚେତାବନୀ । କହିଲେ ସତର୍କ ନରହିଲେ ଆସିପାରେ ତୃତୀୟ ଲହର ।
କନକ ବ୍ୟୁରୋ: ୧୦ଟି ରାଜ୍ୟରେ କରୋନା ସଂକ୍ରମଣ ଏବେ ବି ନିୟନ୍ତ୍ରଣକୁ ଆସିନାହିଁ । ଯାହାକୁ ନେଇ କେନ୍ଦ୍ର ସରକାର ଆଜି ରାଜ୍ୟ ଗୁଡିକୁ ସତର୍କବାଣୀ ଶୁଣାଇଛନ୍ତି । ୧୦ଟି ରାଜ୍ୟର ୪୬ଟି ଜିଲ୍ଲାରେ ଏବେ ବି କରୋନା ସଂକ୍ରମଣ ହାର ୧୦ ପ୍ରତିଶତ ଉପରେ ରହୁଛି । ଫଳରେ କେନ୍ଦ୍ର ସରକାର, ରାଜ୍ୟ ସରକାର ଗୁଡିକୁ ଶକ୍ତ କୋଭିଡ ନିୟନ୍ତ୍ରଣ ପାଳନ କରିବାକୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାର ଶନିବାର ୧୦ଟି ରାଜ୍ୟକୁ କରୋନା ସଂକ୍ରମଣ ପାଇଁ ଶକ୍ତ ନିୟମ ପାଳନ କରିବାକୁ ପରାମର୍ଶ ଦେଇଛନ୍ତି । ୧୦ଟି ରାଜ୍ୟ ମଧ୍ୟରେ ରହିଛି – କେରଳ, ମହାରାଷ୍ଟ୍ର, କର୍ଣ୍ଣାଟକ, ତାମିଲନାଡୁ, ଓଡିଶା, ଆସାମ, ମିଜୋରାମ, ମେଘାଳୟ, ଆନ୍ଧ୍ରପ୍ରଦେଶ ଓ ମଣିପୁର । ଏହି ରାଜ୍ୟ ଗୁଡିକର ୪୬ଟି ଜିଲ୍ଲାରେ ଏବେବି ୧୦ ପ୍ରତିଶତ ଉପରେ ରହୁଛି ସଂକ୍ରମଣ ହାର । ଫଳରେ ଏହା ଚିନ୍ତାଜନକ ବୋଲି ରାଜ୍ୟ ସରକାର ଗୁଡିକୁ ଚେତାଇଛନ୍ତି କେନ୍ଦ୍ର ସରକାର । ସଂକ୍ରମଣ ହାର ନିୟନ୍ତ୍ରଣକୁ ନଆସିଲେ ଏହା ଦେଶରେ ତୃତୀୟ ଲହର ଆଣିପାରେ ବୋଲି ଆଶଙ୍କା କରିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ।
ଗତ କିଛି ସପ୍ତାହ ହେବ ୪୬ ଟି ଜିଲ୍ଲାରେ ୧୦ ପ୍ରତିଶତ ଉପରେ ରହୁଛି ସଂକ୍ରମଣ ହାର ଏବଂ ଅନ୍ୟ ୫୩ଟି ଜିଲ୍ଲାରେ ୫-୧୦ ପ୍ରତିଶତ ଭିତରେ ରହୁଛି ସଂକ୍ରମଣ । ଶନିବାର କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଥିଲା । ଯେଉଁଥିରେ ୪୬ଟି ରାଜ୍ୟରେ କରୋନା ସଂକ୍ରମଣ ୧୦ ପ୍ରତିଶତ ତଳକୁ କାହିଁକି ଖସୁ ନାହିଁ ସେନେଇ ଆଲୋଚନା କରାଯାଇଥିଲା । ଏହି ସବୁ ସ୍ଥାନରେ ୮୦ ପ୍ରତିଶତ ନୂଆ ସଂକ୍ରମଣ ଘରେ ସଙ୍ଗରୋଧରେ ରହୁଥିବା ଆକ୍ରାନ୍ତଙ୍କ ଠାରୁ ବ୍ୟାପୁଥିବା ଜଣାପଡିଛି । ଫଳରେ ଘରେ ସଙ୍ଗରୋଧରେ ରହୁଥିବା କରୋନା ଆକ୍ରାନ୍ତଙ୍କୁ ମନିଟର କରିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ପରାମର୍ଶ ଦେଇଛନ୍ତି ।
ଏହାବ୍ୟତୀତ ୪୦ ରୁ ୬୦ ବର୍ଷ ବୟସ୍କ ଏବଂ ୬୦ ବର୍ଷରୁ ଅଧିକ ବୟସ୍କଙ୍କୁ କରୋନା ଟିକା ଦେବାନେଇ ମଧ୍ୟ ଆଲୋଚନା କରାଯାଇଛି । ବୈଠକରେ ଆଇସିଏମଆର ଡିଜି ବଳରାମ ଭାର୍ଗବ ମଧ୍ୟ ଉପସ୍ଥିତ ଥିଲେ । ଦେଶରେ ଏବେବି କରୋନାର ଦ୍ୱିତୀୟ ଲହର ଶେଷ ହୋଇ ନାହିଁ । ଫଳରେ ଯେଉଁ ସବୁ ରାଜ୍ୟରେ ସଂକ୍ରମଣ ୧୦ ପ୍ରତିଶତ ଉପରେ ରହୁଛି, ସେମାନେ ସତର୍କ ନରହିଲେ ଦେଶରେ ତୃତୀୟ ଲହର ଆସିବାର ଆଶଙ୍କା ବୃଦ୍ଧି ପାଇବ ବୋଲି ସ୍ୱାସ୍ଥ୍ୟ ମନ୍ତ୍ରାଳୟ ଚିନ୍ତା ପ୍ରକାଶ କରିଛନ୍ତି ।