ସମଲିଙ୍ଗୀ ବିବାହ ପ୍ରସଙ୍ଗରେ ନରିମିଲା କେନ୍ଦ୍ର। ସମୀକ୍ଷା କମିଟି ଗଠନ ପାଇଁ ଦେଲା ପ୍ରସ୍ତାବ।
କନକ ବ୍ୟୁରୋ: ବହୁ ବିବାଦୀୟ ସମଲିଙ୍ଗୀ ବିବାହ ପ୍ରସଙ୍ଗରେ ଶୁଣାଣି ୭ ଦିନରେ ପହଞ୍ଚିଛି । ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୁଡ଼ଙ୍କ ନେତୃତ୍ୱରେ ଗଠିତ ୫ ଜଣିଆ ଖଣ୍ଡପୀଠରେ ବୁଧବାର ଏହି ମାମଲାର ଶୁଣାଣି ଚାଲିଛି । ଆଉ ଏତିକି ବେଳେ କେନ୍ଦ୍ର ସରକାର ମଧ୍ୟ ଏହି ପ୍ରସଙ୍ଗରେ ନିଜର ଆଭିମୂଖ୍ୟ କୋହଳ କରିଛନ୍ତି । ଏହି ସମସ୍ୟାର ସମାଧାନ ଏବଂ ସମଲିଙ୍ଗୀଙ୍କ ଅଧିକାର ଉପରେ ନିରୀକ୍ଷଣ ପାଇଁ ଏକ କମିଟି ଗଠନ କରିବାକୁ କେନ୍ଦ୍ର ସରକାର ପ୍ରସ୍ତାବ ଦେଇଛନ୍ତି । କ୍ୟାବିନେଟ୍ ସଚିବ ରାଙ୍କର ଜଣେ ଅଧିକାରୀଙ୍କ ନେତୃତ୍ୱରେ ଏକ କମିଟି ଗଠନ କରିବାକୁ ପ୍ରସ୍ତାବ ଦେଇଛନ୍ତି ସରକାର । ସମଲିଙ୍ଗୀଙ୍କ ଅଧିକାର ଏବଂ କିପରି ସେମାନଙ୍କୁ ସାମାଜିକ ନ୍ୟାୟ ପ୍ରଦାନ କରିହେବ ତାହା ଉପରେ କମିଟି ସମୀକ୍ଷା କରିବ ବୋଲି କେନ୍ଦ୍ର ସରକାରଙ୍କ ପକ୍ଷରୁ ସୋଲିସିଟର ଜେନେରାଲ ତୁଷାର ମେହେଟା କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାର ସମଲିଙ୍ଗୀ ବିବାହକୁ ସ୍ୱୀକୃତି ସପକ୍ଷରେ ନାହାଁନ୍ତି କିନ୍ତୁ ସେମାନଙ୍କୁ ସରକାରୀସ୍ତରରେ ନ୍ୟାୟ ପ୍ରଦାନ କରିବାକୁ କମିଟି ଗଠନ କରିବା ନେଇ ପ୍ରସ୍ତାବ ଦେଇଛନ୍ତି । ସମଲିଙ୍ଗୀ ବିବାହକୁ ଅନୁମତି ନଦେଇ କିପରି ସେମାନଙ୍କୁ ସାମାଜିକ ନ୍ୟାୟ ପ୍ରଦାନ କରିହେବ ସେନେଇ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି ସୁପ୍ରିମକୋର୍ଟ । ଏପ୍ରିଲ ୨୭ ତାରିଖରୁ ଏହି ମାମଲାର ଶୁଣାଣି ଚାଲିଥିଲେ ବି ଏପର୍ଯ୍ୟନ୍ତ ରାୟ ଆସିନାହିଁ । ଏହି ପ୍ରସଙ୍ଗକୁ ଅଧିକ ନବଢାଇବାକୁ ମଧ୍ୟ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ପରାମର୍ଶ ଦେଇଛନ୍ତି । ତେବେ କୋର୍ଟ କଣ ଚୂଡ଼ାନ୍ତ ନିଷ୍ପତି ନେଉଛନ୍ତି ତାହା ଉପରେ ସମସ୍ତଙ୍କର ନଜର ରହିଛି ।