ପୁଣି ଓଡିଆ ଭାଷାକୁ ଉପେକ୍ଷା କଲା ସିବିଏସଇ । ହିିନ୍ଦୀ ପରୀକ୍ଷା ପାଇଁ ଛାତ୍ରଛାତ୍ରୀଙ୍କୁ ଦିଆଗଲା ୪ ଦିନ ସମୟ, ହେଲେ ଓଡିଆ ଭାଷା ପରୀକ୍ଷା ପାଇଁ ଦିନୁଟିଏ ବି ମିଳିଲାନି ।
କନକ ବ୍ୟୁରୋ : ଓଡିଆ ଭାଷା ପ୍ରତି ସିବିଏସଇର ଆଭିମୁଖ୍ୟକୁ ନେଇ ପ୍ରଶ୍ନ ଉଠିଛି । ପରୀକ୍ଷା ପାଇଁ ଛାତ୍ରଛାତ୍ରୀଙ୍କୁ ଆଦୌ ସମୟ ଦିଆଯାଇ ନାହିଁ । ଶୁକ୍ରବାର ଗଣିତ ପରୀକ୍ଷା ଥିବାବେଳେ, ଶନିବାର ଦିନ ଓଡିଆ ପରୀକ୍ଷା ଅଛି । କିନ୍ତୁ ଆଶ୍ଚର୍ଯ୍ୟର କଥା ହେଉଛି ପରୀକ୍ଷା ସୂଚୀରେ କୌଣସି ବିଷୟକୁ ଏଭଳି ଭାବେ ସ୍ଥାପିତ କରାଯାଇ ନାହିଁ । ହିନ୍ଦୀ ପରୀକ୍ଷା ପୂର୍ବରୁ ୪ଦିନ ସମୟ ଦିଆଯାଇଛି । ପ୍ରଶ୍ନ ଉଠୁଛି ଆଂଚଳିକ ଭାଷାଗୁଡିକ ପ୍ରତି ସିବିଏସଇ ଏଭଳି ଆଭିମୁଖ୍ୟ କାହିଁକି ପୋଷଣ କରୁଛି ?
Kanak News is now on WhatsApp
Join and get latest news updates delivered to you via WhatsApp
ସିବିଏସଇ ଦଶମ ଶ୍ରେଣୀ ପାଇଁ ଜାରି ହୋଇଥିବା ପରୀକ୍ଷା ସୂଚୀ ଅନୁଯାୟୀ, ଶୁକ୍ରବାର ହେବାକୁ ଯାଉଛି ଓଡିଆ ଭାଷା ପରୀକ୍ଷା । ଏହା ପୂର୍ବରୁ ଗୁରୁବାର ଛାତ୍ରଛାତ୍ରୀ ଗଣିତ ପରୀକ୍ଷା ଦେଇଛନ୍ତି । ଗଣିତ ପରୀକ୍ଷା ପର ଦିନ ଓଡିଆ ପରୀକ୍ଷା ରଖିବାକୁ ନେଇ ଏବେ ବିବାଦ ମୁଣ୍ଡ ଟେକିଛି । ଏହି ଇଂରାଜୀ ମିଡିୟମ ସ୍କୁଲ ପରୀକ୍ଷାରେ ହିନ୍ଦୀ ଭାଷା ପରୀକ୍ଷା ପୂର୍ବରୁ ୪ ଦିନ ବ୍ୟବଧାନ ରହିଛି । କିନ୍ତୁ ଓଡିଆ ଭାଷା ପାଇଁ ଗୋଟିଏ ବି ଦିନ ବ୍ୟବଧାନ ନରହିବାକୁ ନେଇ ଛାତ୍ରଛାତ୍ରୀ ଏବଂ ଅଭିଭାବକ ଅସନ୍ତୋଷ ପ୍ରକାଶ କରିଛନ୍ତି ।
ରାଜ୍ୟରେ ପ୍ରାୟ ୩୫ ହଜାର ଛାତ୍ରଛାତ୍ରୀ ସିବିଏସଇର ଦଶମ ଶ୍ରେଣୀ ପରୀକ୍ଷା ଦେଉଛନ୍ତି । ସେଥିମଧ୍ୟରୁ ଅର୍ଦ୍ଧାଧିକ ଛାତ୍ରଛାତ୍ରୀ ଓଡିଆ ବିଷୟକୁ ନିଜର ଦ୍ୱିତୀୟ ଭାଷା ରୂପେ ବାଛିଛନ୍ତି । ଦୁଇଟି ବିଷୟର ପରୀକ୍ଷା ମଧ୍ୟରେ ଥିବା ବ୍ୟବଧାନ ସର୍ବାଧିକ ୪ ଦିନ ରହିଛି । କିନ୍ତୁ କେଉଁ ଆଧାରରେ ଗଣିତ ପରୀକ୍ଷା ପର ଦିନ ଓଡିଆ ଭାଷା ପରୀକ୍ଷା ରଖିଛନ୍ତି ବୋର୍ଡ କର୍ତ୍ତୃପକ୍ଷ, ତାହା ଏବେ ପ୍ରଶ୍ନ ଘେରରେ ?
ଇଂରାଜୀ ମିଡିୟମ ସ୍କୁଲରେ ଓଡିଆ ବିଷୟ ପ୍ରତି ଛାତ୍ରଛାତ୍ରୀଙ୍କ ମଧ୍ୟରେ ସାଧାରଣତଃ ଭୟ ରହିଥାଏ । ଓଡିଆ ବିଷୟ ନେଲେ କମ୍ ମାର୍କ ମିଳିବ ବୋଲି ଗୋଟିଏ ଧାରଣା ରହିଛି । କିନ୍ତୁ ଓଡିଶା ଭଳି ରାଜ୍ୟରେ ଏଭଳି ଦ୍ୱନ୍ଦ୍ୱ ଓଡିଆ ଭାଷାକୁ ଗୌଣ କରିବାର ସମ୍ଭାବନା ରହିଛି । ଆଉ ସିବିଏସଇର ଏପରି ପରୀକ୍ଷା ସୂଚୀ ମଧ୍ୟ ଏହାକୁ ଖୋରାକ୍ ଯୋଗାଉଛି ।