କରୋନା ଭିତରେ ସିବିଆଇ ଖୋଲିଲା ଚିଟଫଣ୍ଡ କେଳେଙ୍କାରୀ ଫାଇଲ: ଶୁଭଙ୍କର ଡାଏରୀରୁ ଖୋଳତାଡ ଆରମ୍ଭ, ଜାମିନରେ ଆସିଥିବା ଅଭିଯୁକ୍ତଙ୍କୁ ସିସୋର ପ୍ରସଙ୍ଗରେ ଅଢେଇ ଘଂଟା ଧରି ଜେରା
ଟାର୍ଗେଟରେ ଦୁଇ ଆଇଏଏସ ଓ ଜଣେ ଆଇପିଏସ
କନକ ବ୍ୟୁରୋ: ପୁଣି ଫେରିଲା ସିବିଆଇ । ସାରା ରାଜ୍ୟ କରୋନା ମହାମାରୀକୁ ମୁକାବିଲା କରୁଥିବା ବେଳେ ସିବିଆଇ ଖୋଲିଛି ଚିଟଫଣ୍ଡ ଫାଇଲ । ବହୁଚର୍ଚ୍ଚିତ ସିସୋର କେଳେଙ୍କାରୀର ମଧ୍ୟସ୍ତ କୁହାଯାଉଥିବା ଅଭିଯୁକ୍ତ ଶୁଭଙ୍କର ଡାଏରୀ ଓଲଟାଇବା ଆରମ୍ଭ କରିଛନ୍ତି ସିବିଆଇ । ଚାଂଚଲ୍ୟକର କଥା ହେଉଛି ଯେ, ସିସୋର ଚିଟଫଣ୍ଡ ମାମଲାରେ ଗିରଫ ହୋଇ ଜାମିନରେ ଆସିଥିବା ଜଣେ ଅଭିଯୁକ୍ତଙ୍କୁ ଗତକାଲି ସିବିଆଇ ଅଧିକାରୀ ମାନେ ଡାକି ଦୀର୍ଘ ଅଢେଇ ଘଂଟା ଧରି ଜେରା କରିଛନ୍ତି । ହେଲେ ଏହି ସମ୍ପର୍କରେ କେହି ଟେର୍ ପାଇପାରି ନାହାଁନ୍ତି ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱସ୍ତ ସୁତ୍ରରୁ ମିଳିଥିବା ସୂଚନା ଅନୁସାରେ ଅଭିଯୁକ୍ତଙ୍କୁ ଡକାଇ କେଉଁ କେଉଁ ଅଫିସର ସିସୋର କେଳେଙ୍କାରୀରେ ସାମିଲ ଥିଲେ, ସେନେଇ ଗୁଡେଇ ତୁଡେଇ ପ୍ରଶ୍ନ କରିଛନ୍ତି ସିବିଆଇ ଅଧିକାରୀ । ପ୍ରଥମ ପର୍ଯ୍ୟାୟରେ ଦୁଇ ଜଣ ବରିଷ୍ଠ ଆଇଏଏସ ଅଧିକାରୀ ଓ ଜଣେ ବରିଷ୍ଠ ଆଇପିଏସ୍ ଅଧିକାରୀଙ୍କ ସଂପୃକ୍ତିର ଖୋଳତାଡ ଆରମ୍ଭ ହୋଇଥିବା ସୂଚନା ମିଳିଛି । ପୂର୍ବାହ୍ନ ସାଢେ ୧୦ଟାରୁ ସାଢେ ୧୨ ଟା ଯାଏ ଜେରା ଜାରି ରହିଥିଲା । ହେଲେ ସିବିଆଇ ଅଧିକାରୀ ଏନେଇ କିଛି ବି ମୁହଁ ଖୋଲୁନାହାଁନ୍ତି ।
କେବଳ ଏହି ୩ ଜଣ ନୁହେଁ, ପାଖାପାଖି ୧୨ ଜଣ ପ୍ରଶାସନିକ ଅଧିକାରୀଙ୍କ ସଂପର୍କରେ ସିବିଆଇ ପୁଣିଥରେ ତଦନ୍ତ ଫାଇଲ ଖୋଲିବ ବୋଲି ସୂଚନା ମିଳିଛି । ସାଧାରଣ ନିର୍ବାଚନ ସରିବାର ଠିକ୍ ବର୍ଷକ ପରେ ସିବିଆଇ ପୁଣିଥରେ ଚିଟଫଣ୍ଡ କେଳେଙ୍କାରୀ ଫାଇଲ ଖୋଲିବା ରାଜନୈତିକ ମହଲରେ ଚର୍ଚ୍ଚାର ବିଷୟ ହୋଇଛି ।