ଦାଦାବଟି ଆଦାୟ କରିବା ଅଭିଯୋଗରେ ମହାରାଷ୍ଟ୍ର ପୂର୍ବତନ ମୁଖ୍ୟମନ୍ତ୍ରୀଙ୍କୁ ସିବିଆଇର ପଚରାଉଚରା । ସମନ ପରେ ଡିଆରଡିଓ ଗେଷ୍ଟ ହାଉସରେ ଘଂଟା ଘଂଟା ଜେରା ।
କନକ ବ୍ୟୁରୋ: ମହାରାଷ୍ଟ୍ରର ପୂର୍ବତନ ଗୃହମନ୍ତ୍ରୀ ଅନୀଲ ଦେଶମୁଖଙ୍କୁ ଜେରା କଲା ସିବିଆଇ । ମାସକୁ ୧୦୦ କୋଟି ଟଙ୍କାର ବଟି ଆଦାୟ ନେଇ ସଚିନ ବାଜେ ଆଣିଥିବା ଅଭିଯୋଗ ଲିଙ୍କରେ ବିବାଦ ଘେରକୁ ଆସି ଶେଷରେ ପଦ ଛାଡିଥିଲେ ଦେଶମୁଖ । ସିବିଆଇର ସମନ ପରେ ଆଜି ଡିଆରଡିଓ ଗେଷ୍ଟ ହାଉସରେ ପହଁଚି ନିଜର ବୟାନ୍ ରେକର୍ଡ କରାଇଛନ୍ତି ଅନୀଲ ଦେଶମୁଖ । ବର୍ତମାନ ସୁଦ୍ଧା ଏହି ମାମଲାରେ ଅନୀଲ ଦେଶମୁଖଙ୍କ ବ୍ୟକ୍ତିଗତ ସହାୟକ ସଂଜିବ ପାଲାନ୍ଦେ ଏବଂ ସୁନ୍ଦନ ସିନେ୍ଧ ଏବଂ ମୁମ୍ୱାଇ ପୋଲିସର ପୂର୍ବତନ ଅଧିକାରୀ ସଚିନ ୱାଜେଙ୍କ ଦୁଇ ଡ୍ରାଇଭରଙ୍କୁ ଏହି ମାମଲାରେ ଜେରା କରି ସାରିଛି ସିବିଆଇ ।
Kanak News is now on WhatsApp
Join and get latest news updates delivered to you via WhatsApp
ଦେଶମୁଖଙ୍କ ନାଁରେ ମୁମ୍ୱାଇର ପୂର୍ବତନ ପୋଲିସ କମିଶନର ପରମବୀର ସିଂ ଅଭିଯୋଗ ଆଣିବା ମାମଲାରେ ଏବେ ସିବିଆଇ ଛାନଭିନ୍ କରୁଛି । ପରମବୀର ସିଂ , ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚିଠି ଲେଖି ଜଣାଇଥିଲେ କି ମାସକୁ ୧୦୦ କୋଟି ଟଙ୍କାର ବଟି ଆଦାୟ ପାଇଁ ସଚିନ ୱାଜେଙ୍କୁ ଟାର୍ଗେଟ୍ ଦେଇଥିଲେ ଦେଶମୁଖ । ତେବେ ଏହି ମାମଲାରେ ପ୍ରାଥମିକ ଭାବେ ତଦନ୍ତରେ ଅନୀଲ ଦେଶମୁଖଙ୍କୁ ସନ୍ଦେହ ଘେରକୁ ଅଣାଯାଇଛି । ଆଗକୁ ତଦନ୍ତ ବଢିଲେ , ଚେର ଅଧିକ ଲଂବିବ ବୋଲି କୁହାଯାଉଛି ।
ଏହି ମାମଲାରେ ଗତ ଏପ୍ରିଲ ୫ ତାରିଖରେ ବଂବେ ହାଇକୋର୍ଟ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିଲେ । ମୁକେଶ ଅଂବାନୀଙ୍କ ଆଂଟିଲିଆ ଆପାର୍ଟମେଂଟ ନିକଟରେ ଗାଡିରୁ ବିସ୍ଫୋରକ ଠାବ ହେବା ପରେ ତଦନ୍ତ କରୁ କରୁ ଘଟଣା ଅନୀଲ ଦେଶମୁଖ ମାସିକ ୧୦୦ କୋଟିର ବଟି ଆଦାୟ ପ୍ରସଙ୍ଗ ସାମ୍ନାକୁ ଆସିଛି ।