ଚତୁର୍ଥ ଦିନରେ ବି ଆକ୍ସନ ମୁଡରେ ସିବିଆଇ । ଆଜି ପୁଣି ସୁଶାନ୍ତଙ୍କ ରୋଷେୟା ନୀରଜ, ବନ୍ଧୁ ସିଦ୍ଧାର୍ଥ ଓ କେଶବଙ୍କୁ ପଚରାଉଚରା, ରିଆଙ୍କ ଭାଇଙ୍କୁ ବି ଜେରା । ପୋଷ୍ଟମର୍ଟମ ହୋଇଥିବା ଡାକ୍ତରଖାନାରେ ବି ଖୋଳତାଡ ।
କନକ ବ୍ୟୁରୋ : ଅଭିନେତା ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲାରେ ସିବିଆଇର ମିଶନ ମୁମ୍ବାଇ ପ୍ରତିଦିନ ଖୋଲୁଛି ନୂଆ ଗୁମର । ଅଭିଯୁକ୍ତଙ୍କୁ ଜେରା କରିବା ସହ ଘଟଣାସ୍ଥଳରେ ପହଞ୍ଚି ସବୁ ବିନ୍ଦୁ ଉପରେ ତଦନ୍ତ କରୁଛି ସିବିଆଇର ଗଠିତ ଏସଆଇଟି ଟିମ୍ । ଅନ୍ୟପଟେ ସୁଶାନ୍ତଙ୍କ ପୂର୍ବତନ ମ୍ୟାନେଜର ଦିଶା ସାଲିୟନଙ୍କ ମୃତ୍ୟୁ ପରେ ମଧ୍ୟ ମୋବାଇଲ ଚାଲିଥିବା ତଥ୍ୟ ପଦାକୁ ଆସିଛି । ତେଣୁ ସବୁ ଦୃଷ୍ଟି କୋଣରୁ ତଦନ୍ତ କରୁଛି ସିବିଆଇ ।
Kanak News is now on WhatsApp
Join and get latest news updates delivered to you via WhatsApp
ଅଭିନେତା ସୁଶାନ୍ତ ସିଂ ରାଜପୁତ ମୃତ୍ୟୁ ମାମଲାରେ ତଦନ୍ତ କରୁଥିବା ସିବିଆଇ ଚତୁର୍ଥ ଦିନରେ ମଧ୍ୟ ଆକ୍ସନ ମୁଡରେ ଥିବା ନଜର ଆସିଛି । ପୁଣି ସୁଶାନ୍ତଙ୍କ ବନ୍ଧୁ ସିଦ୍ଧାର୍ଥ ପିଠାନୀ ଓ ଘରୋଇ ସହାୟକ ନୀରଜ ସିଂହ ଓ କେଶବକୁ ପଚରାଉଚରା କରିଛି ସିବିଆଇ । ରିିଆଙ୍କ ଭାଇ ସୌଭିକ ଚକ୍ରବର୍ତୀଙ୍କୁ ମଧ୍ୟ ଜେରା କରିଛି । ଏଥିସହ ଜେରା ପାଇଁ ରିଆ ଚକ୍ରବର୍ତୀ ଓ ବାପାଙ୍କ ସମନ ପଠାଯାଇଥିବା ଖବର ଆସିଛି । କିନ୍ତୁ ସମନ ପଠାଯିବାକୁ ଖଣ୍ଡନ କରିଛନ୍ତି ରିୟାଙ୍କ ଓକିଲ ସତୀଶ ମାନସିନେ୍ଧ । ଏପର୍ଯ୍ୟନ୍ତ କୌଣସି ସମନ ମିଳିନି ଓ ମିଳିଲେ ରିଆ ତତନ୍ତରେ ସହଯୋଗ କରିବେ ବୋଲି ସେ କହିଛନ୍ତି । ତେବେ ସୁଶାନ୍ତ ମୃତ୍ୟୁ ମାମଲାରେ ସିବିଆଇର ତଦନ୍ତ ପ୍ରକିୟା ଉପରେ ବିଶ୍ୱାସ ପ୍ରକାଶ କରିବା ସହ ଖୁବ ଶିଘ୍ର ନୂଆ ତଥ୍ୟ ସାମ୍ନାକୁ ଆସିବ ବୋଲି କହିଛନ୍ତି ସୁଶାନ୍ତଙ୍କ ପରିବାର ଓକିଲ ବିକାଶ ସିଂ ।
ସୁଶାନ୍ତଙ୍କ ପୋଷ୍ଟମର୍ଟମ ରିପୋର୍ଟର ମଧ୍ୟ ତଦନ୍ତ ଆରମ୍ଭ କରିଛି ସିବିଆଇ । ସିବିଆଇର ଗୋଟିଏ ଟିମ୍ କୁପର ହସପିଟାଲକୁ ଯାଇ ଅଟୋପ୍ସି ରିର୍ପୋଟ ପ୍ରସ୍ତୁତ କରିଥିବା ଡାକ୍ତରଙ୍କୁ ପଚରାଉଚରା କରିଛି । ଏଥିସହ ଆଉ ଏକ ଟିମ୍ ସୁଶାନ୍ତଙ୍କ ବ୍ୟାଙ୍କ ଆକାଉଣ୍ଟ ଥିବା ବିଭିନ୍ନ ବ୍ୟାଙ୍କକୁ ଯାଇ ଖୋଳତାଡ କରିଛି । ସିବିଆଇ ଟିମ୍ ଅନେ୍ଧରୀରେ ଥିବା ୱାଟରଷ୍ଟୋନ ରିର୍ସୋଟରେ ମଧ୍ୟ ପହଁଚିଛି । କୁହାଯାଉଛି ଏଠାରେ ଦୁଇମାସ ରହି ସୁଶାନ୍ତ ଆଧ୍ୟାତ୍ମିକ ଥେରାପି ନେଇଥିଲେ । ଏଠି ରହିବା ପାଇଁ ପୂରା ବ୍ୟବସ୍ଥା କରିଥିଲେ ରିଆ ଓ ତାଙ୍କ ଭାଇ ସୌଭିକ । ଆଗକୁ ଆଧ୍ୟାତ୍ମିକ ଗୁରୁ ମୋହନ ଯୋଶୀ ମଧ୍ୟ ସିବିଆଇ ତଦନ୍ତ ପରିସରଭୁକ୍ତ ହୋଇପାରନ୍ତି ବୋଲି କୁହଯାଇଛି ।
ସୁଶାନ୍ତଙ୍କ ମୃତ୍ୟୁ ମାମଲା ଏବେ ବି ରହସ୍ୟମୟ ହୋଇ ରହଥିବାବେଳେ ତାଙ୍କ ପୂର୍ବତନ ମ୍ୟାନେଜର ଦିଶା ସାଲିଆନ ମୃତ୍ୟୁ ମାମଲାରେ ସନ୍ଦେହ ବୃଦ୍ଧି ପାଉଛି । ଦିଶାଙ୍କ ମୃତ୍ୟୁ ଜୁନ ୮ ତାରିଖରେ ହୋଇଥିଲେ ବି ଜୁନ ୧୭ ପର୍ଯ୍ୟନ୍ତ ତାଙ୍କ ମୋବାଇଲ ଫୋନର ସୁଇଚ ଅନ୍ ଥିବା ତଦନ୍ତରୁ ଜଣାପଡିଛି । ତେଣୁ ସୁଶାନ୍ତ ଓ ଦିଶାଙ୍କ ମୃତ୍ୟୁର କିଛି ଲିଙ୍କ ଅଛି କି ନାହିଁ ସେ ନେଇ ମଧ୍ୟ ଖୋଳତାଡ କରିବ ସିବିଆଇ ।