ପଞ୍ଜାବ ରାଜନୀତିରେ କମ୍ପନ । କେନ୍ଦ୍ର ଗୃହମନ୍ତ୍ରୀଙ୍କୁ ଭେଟିଲେ ଅମରିନ୍ଦର ସିଂହ
ଆରମ୍ଭ ହେଲା ଚର୍ଚ୍ଚା, ବିଜେପି ଆଡ଼କୁ ଢଳୁଛନ୍ତି କି କ୍ୟାପଟେନ୍
କନକ ବ୍ୟୁରୋ : କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଭେଟିଛନ୍ତି ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂ । ଗୃହମନ୍ତ୍ରୀଙ୍କ ଦିଲ୍ଲୀ ସ୍ଥିତ ବାସଭବନରେ ଉଭୟଙ୍କ ମଧ୍ୟରେ ସାକ୍ଷାତ ଆଲୋଚନା ପାଖାପାଖି ଘଣ୍ଟାଏ ଧରି ଚାଲିଥିଲା । ଏହି ଆଲୋଚନା ପରେ ଅମରିନ୍ଦର ବିଜେପିରେ ସାମିଲ ହେବା ନେଇ ଚର୍ଚ୍ଚା ଜୋର ଧରିଛି । ହେଲେ ଅମିତଙ୍କୁ ଭେଟିବା ପରେ ଟ୍ୱିଟ କରି ପଂଜାବର ପୂର୍ବତନ ମୁଖ୍ୟମନ୍ତ୍ରୀ କହିଛନ୍ତି, ଦୀର୍ଘଦିନ ଧରି ଚାଲିଥିବା ଚାଷୀଙ୍କ ଆନ୍ଦୋଳନ ସଂକ୍ରାନ୍ତରେ ଆଲୋଚନା କରିବାକୁ ସେ ଅମିତ ଶାହାଙ୍କୁ ଭେଟିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତୁରନ୍ତ ତିନୋଟି ନୁଆ କୃଷି ଆଇନକୁ ବାତିଲ କରିବାକୁ ସେ ଦାବି ଜଣାଇଥିବା ବେଳେ ଚାଷୀଙ୍କୁ କିଭଳି ଏମଏସପି ମିଳିପାରିବ ସେନେଇ ପଦକ୍ଷେପ ନେବାକୁ କହିଥିବା ନେଇ ସୋସିଆଲ ମିଡିଆ ମାଧ୍ୟମରେ ଜଣାଇଛନ୍ତି କ୍ୟାପଟେନ । ଏହି ଟ୍ୱିଟ ପରେ ଅମରିନ୍ଦର ବିଜେପିରେ ସାମିଲ ହେବା ନେଇ ଚାଲିଥିବା ଚର୍ଚ୍ଚାରେ ସାମୟିକ ବିରାମ ଲାଗିଥିବା କୁହାଯାଉଛି । କ୍ୟାପଟେନ୍ ଅମରିନ୍ଦରଙ୍କ ନିକଟତମ ମହଲ ଦେଇଥିବା ପ୍ରତିକ୍ରିୟା ଅନୁସାରେ, ଭେଟ୍ଘାଟ ସୌଜନ୍ୟମୂଳକ ଥିଲା । ଏନେଇ ଅଯଥା ଆକଳନ କରାନଯାଉ । ବଡ କଥା ହେଉଛି, ମୁଖ୍ୟମନ୍ତ୍ରୀ ପଦ ଛାଡିବା ପରେ କ୍ୟାପଟେନ୍ କହିଥିଲେ, ତାଙ୍କ ପାଇଁ ସମସ୍ତ ରାସ୍ତା ଖୋଲା ଅଛି । ଆଉ ସେବେ ଠାରୁ ହିଁ ବିଜେପିରେ ସାମିଲ ହେବା ନେଇ ଚର୍ଚ୍ଚା ଆରମ୍ଭ ହୋଇଥିଲା ।
ମଙ୍ଗଳବାର ନାଟକୀୟ ଢଙ୍ଗରେ କଂଗ୍ରେସ ସଭାପତି ପଦରୁ ଇସ୍ତଫା ଦେଇଥିଲେ ନବଜୋତ୍ ସିଂ ସିଦ୍ଧୁ । ଆଉ ଏହାପରେ ଦିଲ୍ଲୀ ଗସ୍ତରେ କ୍ୟାପଟେନ୍ ଆସିବା ଅନେକ ଆକଳନକୁ ସାମ୍ନାକୁ ଆଣିଥିଲା । ଅମିରନ୍ଦର କହିଥିଲେ ଯେ, ସେ କୌଣସି ରାଜନୈତିକ ନେତାଙ୍କୁ ଭେଟିବାର କାର୍ଯ୍ୟକ୍ରମ ନାହିଁ । ହେଲେ ଆଜି ଆଶ୍ଚର୍ଯ୍ୟଜନକ ଭାବେ ଅମିତ ଶାହାଙ୍କୁ ସେ ଭେଟିଛନ୍ତି । ରାଜନୀତିରେ ପ୍ରଥମେ ମନା କରିବା ଓ ପରେ ସେହି କାମ କରିବା କିଛି ନୂଆ କଥା ନୁହେଁ । ଅମିରନ୍ଦରଙ୍କ କ୍ଷେତ୍ରରେ ଠିକ୍ ସେଇଆ ଘଟିପାରେ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଭବିଷ୍ୟତରେ ପଂଜାବ ରାଜନୀତିରେ ନିଜ ପ୍ରଭାବ ବିସ୍ତାର କରିବା ପାଇଁ କ୍ୟାପଟେନ କିଛି ବଡ ନିଷ୍ପତି ନେବା କଥାକୁ ବି ଅସ୍ୱୀକାର କରାଯାଇ ନପାରେ ।