ଭୋଟ ପୂର୍ବରୁ ଟଙ୍କା ବିଡା ଧରି ଭୋଟରଙ୍କ ଘରେ ପ୍ରାର୍ଥୀ: ଚାଲିିଛି ଟଙ୍କା ବଣ୍ଟା, ସୋସିଆଲ ମିଡିଆରେ ବୁଲୁଛି ଭିଡିଓ

କନକ ବ୍ୟୁରୋ: ଭୋଟ ପୁର୍ବରୁ ଟଙ୍କା ବଂଟା । ଆଗରୁ ଏମିତି ଅଭିଯୋଗ ଶୁଣିବାକୁ ମିଳୁଥିଲା । ହେଲେ ଏବେ ଟଙ୍କା ବଂଟା ବେଳର ଦୃଶ୍ୟ ସୋସିଆଲ ମିଡିଆରେ ଘୁରି ବୁଲୁଛି । ଘର ଘର ବୁଲି ଟଙ୍କା ଦେଇ ଏକ ନିର୍ଦ୍ଧିଷ୍ଟ ଚିହ୍ନରେ ଭୋଟ ଦେବା ପାଇଁ ଭୋଟରଙ୍କୁ ବାଧ୍ୟ କରୁଥିବା ଅଭିଯୋଗ ହୋଇଛି । ଟଙ୍କା ଦେବା ପରେ ଆଉ କଣ ଦରକାର ବୋଲି ପଚାରୁଛନ୍ତି । ଏ ଘଟଣା ଗଂଜାମ ଜିଲ୍ଲା ଚିକିଟି ବ୍ଲକ ଲାଲମେଂଟା ପଂଚାୟତର ବୋଲି ଚର୍ଚ୍ଚା ହେଉଛି ।

ଭୋଟ୍ ପୂର୍ବରୁ ବିଭିନ୍ନ ସ୍ଥାନରେ ଚାଲିଛି ଟଙ୍କା କାରବାର । ନିଜ ସପକ୍ଷରେ ଭୋଟ୍ ନେବା ପାଇଁ ପ୍ରାର୍ଥୀ ଭୋଟରଙ୍କୁ ଟଙ୍କା ବାଂଟୁଛନ୍ତି । ବିଭିନ୍ନ ସ୍ଥାନରୁ ଏପରି ଭିଡିଓ ଏବେ ଭାଇରାଲ ହେବାରେ ଲାଗିଛି । ସେହିପରି ଝାରସୁଗୁଡ଼ା ଜିଲ୍ଲା କୁସରାଲୋଇ ଗ୍ରାମପଂଚାୟତର ଏକ ଭିଡିଓ ଭାଇରାଲ ହେଉଛି । ଘରକୁ ଘର ବୁଲି ଟଙ୍କା ବାଂଟୁଛନ୍ତି ସମିତିସଭ୍ୟ ପ୍ରାର୍ଥୀ ଦମୟନ୍ତୀ ସା । ଟଙ୍କା ଦେବା ବେଳେ ଏହି ମହିଳା ପ୍ରାର୍ଥୀ ତାଙ୍କୁ ଭୋଟ୍ ଦେବା ପାଇଁ କହୁଛନ୍ତି । ତାଙ୍କ ସହ କିଛି ସମର୍ଥକ ମଧ୍ୟ ଥିବା ଭିଡିଓରେ କଏଦ ହୋଇଛି ।