ଭାରତ–କାନାଡା ସମ୍ପର୍କରେ ତୁଟୁନି ବିବାଦ । ବିଗୁଡୁଥିବା ସ୍ଥିତି ଭିତରେ ନରମ ପଡିଲା ଟ୍ରୁଡୋଙ୍କ ପ୍ରଶାସନ । କାନାଡା ପ୍ରତିରକ୍ଷାମନ୍ତ୍ରୀ କହିଲେ, ଭାରତ ସହ ସମ୍ପର୍କ ଗୁରୁତ୍ୱପୂର୍ଣ୍ଣ 

କନକ ବ୍ୟୁରୋ: ଭାରତ-କାନାଡା ଭିତରେ ସମ୍ପର୍କ ଦିନକୁ ଦିନ ଖରାପ ହେବାରେ ଲାଗିଛି । କାନାଡା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କ ଭାରତ ବିରୋଧୀ ବୟାନକୁ ନେଇ ଦୁଇ ଦେଶ ଭିତରେ ସମ୍ପର୍କ ବିଗିଡିବାରେ ଲାଗିଲାଣି । ଏହାରି ଭିତରେ ସାମ୍ନାକୁ ଆସିଛି କାନାଡା ରକ୍ଷାମନ୍ତ୍ରୀଙ୍କ ବଡ ବୟାନ । କହିଛନ୍ତି, ଭାରତ ବିରୋଧରେ ଟିପ୍ପଣୀ ଦେବା କାନାଡା ପାଇଁ ସମସ୍ୟାପୂର୍ଣ୍ଣ ପରିସ୍ଥିତି ଆଣିପାରେ ।

ଦୁଇ ଦେଶ ଭିତରେ ବିଗୁଡୁଥିବା ସ୍ଥିତିକୁ ନେଇ ନରମ ପଡିଛି କାନାଡାର ଆଭିମୁଖ୍ୟ । କାନାଡା ପ୍ରତିରକ୍ଷା ମନ୍ତ୍ରୀଙ୍କ ବୟାନ ସଭିଁଙ୍କୁ ଚକିତ କରିଛି । ଖଲିସ୍ତାନୀ ଆତଙ୍କବାଦୀ ନିଜ୍ଜର ହତ୍ୟାକୁ ନେଇ ଭାରତକୁ ଦାୟୀ କରୁଥିବା ପ୍ରଧାନମନ୍ତ୍ରୀ ଜଷ୍ଟିନ୍ ଟ୍ରୁଡୋଙ୍କ କଡା ଆଭିମୁଖ୍ୟ ଭିତରେ କିଛି ଭିନ୍ନ ଟିପ୍ପଣୀ ଦେଇଛନ୍ତି ପ୍ରତିରକ୍ଷା ମନ୍ତ୍ରୀ ବିଲ ବ୍ଲେୟାର । ଅନ୍ତର୍ଜାତୀୟ ଗଣମାଧ୍ୟମ ସଂସ୍ଥାକୁ ସାକ୍ଷାତକାରବେଳେ କହିଛନ୍ତି – ଭାରତ ସହ ସମ୍ପର୍କ ଆମ ପାଇଁ ଗୁରୁତ୍ୱ ବହନ କରୁଛି । କିନ୍ତୁ ଖଲିସ୍ତାନୀ ଆତଙ୍କବାଦୀଙ୍କ ହତ୍ୟା ଅଭିଯୋଗର ଅନୁସନ୍ଧାନ କରାଯିବା ଉଚିତ । ଏଭଳି ପରିସ୍ଥିତିରେ ଭାରତ-କାନାଡା ସମ୍ପର୍କ ଏକ ଆହ୍ୱାନପୂର୍ଣ୍ଣ ପ୍ରସଙ୍ଗ ହୋଇପାରେ ।’

କାନାଡା ଗଣମାଧ୍ୟମରେ ପ୍ରକାଶିତ ଏକ ରିପୋର୍ଟ ଅନୁସାରେ – ଫାଇଭ୍ ଆଇଜ୍ ଆଲାୟାନ୍ସ, କାନାଡାକୁ ନିଜ୍ଜର ହତ୍ୟାର ଗୁପ୍ତ ତଥ୍ୟ ପ୍ରଦାନ କରିଥିଲା । ୫ଟି ଦେଶକୁ ନେଇ ଗଠିତ ଫାଇଭ୍ ଆଇଜ୍ ଆଲାୟାନ୍ସ । ଏହାର ଏକ ସଦସ୍ୟ ଥିବା ଆମେରିକା ନିଜ୍ଜର ହତ୍ୟାର ତଥ୍ୟ କାନାଡାକୁ ପ୍ରଦାନ କରିଥିଲା ।  ସେପଟେ ଆମେରିକାର ଦଣେ ବରିଷ୍ଠ କୂଟନୀତିଜ୍ଞଙ୍କ ଦାବି ଅନୁସାରେ, ଆମେରିକାର ଗୁଇନ୍ଦା ସଂସ୍ଥା କେବଳ ନିଜ୍ଜର ହତ୍ୟାର ତଥ୍ୟ କାନାଡାକୁ ପ୍ରଦାନ କରିଥିଲା ତାହା ନୁହେଁ, ଟ୍ରୁଡୋଙ୍କୁ ଭାରତ ବିରୋଧୀ ମନ୍ତବ୍ୟ ଦେବା ପାଇଁ ଉସକାଇଥିଲା ମଧ୍ୟ ।

ଚଳିତ ବର୍ଷ ଜୁନ୍ -୧୮ ତାରିଖରେ ଖଲିସ୍ତାନୀ ଆତଙ୍କବାଦୀ  ହରଦୀପ ସିଂ ନିଜ୍ଜରକୁ କାନାଡାରେ ଗୁଳିକରି ହତ୍ୟା କରାଯାଇଥିଲା । ଭାରତ ବିରୋଧୀ ଗତିବିଧି, ଭାରତକୁ ଖଣ୍ଡ ଖଣ୍ଡ କରିବା ଉଦ୍ୟମ ଭଳି ଅନେକ ଅଭିଯୋଗ ରହିିଛି ନିଜ୍ଜର ବିରୋଧରେ । ଆଉ ଜି-୨୦ ସମ୍ମିଳନୀରୁ ଫେରିବା ପରେ ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ, ନିଜ୍ଜର ହତ୍ୟା ପାଇଁ ଭାରତକୁ ଦାୟୀ କରିଥିଲେ । ଏପିରିକି ଭାରତୀୟ କୂତନୀତିଜ୍ଞଙ୍କୁ ମଧ୍ୟ ବହିଷ୍କାର କରିଥିଲେ । ଆଉ ନେଇ ଭାରତ ମଧ୍ୟ କଡା ଜବାବ ରଖିଛି । ହେଲେ ଏବେ କାନାଡାର ଆଭିମୁଖ୍ୟ ବଦଳୁଥିବା ଦେଖିବାକୁ ମିଳୁଛି ।