କତାରର ଏମିର ଶେଖ ଭାରତୀୟ ନୌସେନା ଅଧିକାରୀଙ୍କ ମୃତ୍ୟୁ ଦଣ୍ଡ କ୍ଷମା କରିପାରିବେ କି ?

କତାର କୋର୍ଟର ନିଷ୍ପତ୍ତି ପରେ ଗତ କିଛି ସପ୍ତାହ ମଧ୍ୟରେ ଭାରତରେ କୂଟନୈତିକ କାର୍ଯ୍ୟକଳାପ ବୃଦ୍ଧି ପାଇଛି । ଏଥିରେ ଆଠ ଜଣ ପୂର୍ବତନ ଭାରତୀୟ ନୌସେନା  ଅଧିକାରୀଙ୍କ ଜୀବନ ମୃତ୍ଯୁର ପ୍ରଶ୍ନ ରହିଛି ।

ତେଣୁ ଆସନ୍ତୁ କତାରର ଏମିର ଶେଖ ତମିମ ବିନ ହମାଦ ଅଲ ଥାନିଙ୍କ ବିଷୟରେ ଜାଣିବା  ଯାହାଙ୍କ ବିଷୟରେ କୁହାଯାଉଛି ଯେ ଯଦି ସେ ଚାହାଁନ୍ତି ତେବେ ସେ ସମସ୍ତଙ୍କ ମୃତ୍ୟୁ ଦଣ୍ଡକୁ କ୍ଷମା କରି ପାରିବେ।

କତାରରେ ମୃତ୍ୟୁଦଣ୍ଡ ଦିଆଯାଇଥିବା ୮ ଜଣ ପୂର୍ବତନ ନୌସେନା ଅଧିକାରୀଙ୍କୁ ଫେରାଇ ଆଣିବା ପାଇଁ ଭାରତ ସରକାର ଅନେକ ବିକଳ୍ପ ଉପରେ କାର୍ଯ୍ୟ କରୁଛନ୍ତି । ଆଠ ଜଣ ଭାରତୀୟଙ୍କୁ ଦିଆଯାଇଥିବା ମୃତ୍ୟୁଦଣ୍ଡ ବିରୋଧରେ ଭାରତ ସରକାର ଏକ ଆବେଦନ କରିଛନ୍ତି । ଏହି ପରିପ୍ରେକ୍ଷୀରେ ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ ଏହି ନିଷ୍ପତ୍ତି ସମ୍ପୂର୍ଣ ଗୋପନୀୟ ଅଟେ । ଯାହା କେବଳ ଆମର ଆଇନଗତ ପରାମର୍ଶଦାତା ମଣ୍ଡଳୀ ସହିତ ସେୟାର ହୋଇଛି ।  ସମସ୍ତ ଆଇନଗତ ବିକଳ୍ପକୁ ବିଚାର କରି ଭାରତ ଏକ ଆବେଦନ କରିଛି । ଏହା ବ୍ୟତୀତ, ବର୍ତ୍ତମାନ ସମସ୍ତଙ୍କ ନଜର ଆଇନଗତ ବିକଳ୍ପ, ଚୁକ୍ତିନାମା ଏବଂ କତାରର ଏମିର ଶେଖ ତମିମ ହମାଦ ଅଲ ଥାନି ଉପରେ ରହିଛି ।

କତାରର ଏମିର ଭାରତୀୟଙ୍କ ମୃତ୍ୟୁ ଦଣ୍ଡକୁ କ୍ଷମା କରି ପାରିବେ କି ?

ଏହା ଜାଣିବା ପୂର୍ବରୁ, ଆପଣ ଜାଣିବା ଉଚିତ୍ ଯେ ଏହି ଅଧିକାରୀମାନେ କେଉଁ ମାମଲାରେ ଦୋଷୀ ସାବ୍ୟସ୍ତ ହୋଇଛନ୍ତି ।

ପୁରା ଘଟଣାକ୍ରମ କଣ ଥିଲା ?

ଏହି ଅଧିକାରୀମାନେ ଇସ୍ରାଏଲ ପାଇଁ ଗୁପ୍ତଚରବୃତ୍ତି  କରିଥିବା ଅଭିଯୋଗ ହୋଇଛି । 'ଅଲ-ଜଜିରା' ରିପୋର୍ଟ ଅନୁଯାୟୀ, ସେମାନେ ଇସ୍ରାଏଲକୁ କତାରର ବୁଡ଼ାଜାହାଜ ପ୍ରକଳ୍ପ ସମ୍ବନ୍ଧୀୟ ସୂଚନା ଦେଇଥିବା ଅଭିଯୋଗ ହୋଇଛି । ଅଭିଯୁକ୍ତମାନେ ଦୋହାଠାରେ ଅବସ୍ଥିତ ସେହି ଅଲ-ଦହରା କମ୍ପାନୀରେ କାମ କରୁଥିଲେ। ଯେଉଁ କମ୍ପାନୀ କତାରର ନୌସେନାକୁ ଟେକ୍ନୋଲୋଜି ଏବଂ ପରାମର୍ଶ ସେବା ଯୋଗାଇଥାଏ । ଓମାନ ବାୟୁସେନାର ଅବସରପ୍ରାପ୍ତ ଅଧିକାରୀ କାମିସ୍ ଅଲ ଆଜମି ଏହାକୁ ପରିଚାଳନା କରୁଥିଲେ। ତାଙ୍କୁ ମଧ୍ୟ ଗିରଫ କରାଯାଇଥିଲା । ତେବେ ନଭେମ୍ବରରେ ତାଙ୍କୁ ମୁକ୍ତ କରାଯାଇଥିଲା। ୩୧ ମଇ ୨୦୨୩ ରେ ଅଲ-ଦହରା କମ୍ପାନୀ ବନ୍ଦ ହୋଇଯାଇଥିଲା ।

ଏହି ଅଧିକାରୀମାନଙ୍କ ମୁଣ୍ଡ ଉପରେ ମୃତ୍ଯୁର ଖଣ୍ଡା ଝୁଲିରହିଛି

ଅଗଷ୍ଟ ୮ ରେ ଏହି ୮ ଜଣଙ୍କୁ ଗିରଫ କରାଯାଇଥିଲା ।  ଯେଉଁମାନଙ୍କ ଉପରେ ଏହି ବିପଦ ଅଛି ।  ସେହି ତାଲିକାରେ ଉଲ୍ଲେଖ କରାଯାଇଥିବା ନାମଗୁଡିକ ହେଲା କ୍ୟାପଟେନ ନବତେଜ ସିଂ ଗିଲ, କ୍ୟାପଟେନ ବିରେନ୍ଦ୍ର କୁମାର ଭର୍ମା, କ୍ୟାପଟେନ ସୌରଭ ବୈଷ୍ଣବ , କମାଣ୍ଡର ଅମିତ ନାଗପାଲ, କମାଣ୍ଡର ପୂର୍ଣ୍ଣେନ୍ଦ୍ର ତିୱାରୀ, କମାଣ୍ଡର ସୁଗୁନାକର ପାକାଲା, କମାଣ୍ଡର ସଞ୍ଜୀବ ଗୁପ୍ତା ଏବଂ ନାବିକ ରାଗେଶ । ଏମାନଙ୍କୁ  ମୁକ୍ତ କରିବାକୁ ଭାରତ ଜୋରଦାର ଉଦ୍ୟମ କରୁଛି ।

କିଏ ଏହି କତାରର ଏମୀର , ଯିଏ ୨୦୧୩ରୁ ଶାସନ କରୁଛନ୍ତି ?

କତାରର ଏମିର ଶେଖ ତମିମ ହମାଦ ଅଲ ଥାନି ଆରବ ଲିଗର ଜଣେ ଜଣାଶୁଣା ଚେହେରା । ସେ ନିଜର ମତକୁ ଖୋଲାଖୋଲି ଭାବେ ପ୍ରକାଶ କରନ୍ତି । ସେ ଜିଓପଲିଟିକାଲ କାର୍ଯ୍ୟକଳାପ ଉପରେ ନଜର ରଖିଥାନ୍ତି ।  ମଧ୍ୟ ପୂର୍ବରେ ଇସ୍ରାଏଲ-ହାମାସ ଯୁଦ୍ଧ ବିଷୟରେ ସେ ଖୋଲାଖୋଲି ଭାବେ ନିଜର ମତ ରଖିଥିଲେ । କୁହାଯାଏ ଶେଖ ତମିମ ବିନ ହମାଦ ଅଲ-ଥାନି ପାକିସ୍ତାନର ନିକଟତର, କିନ୍ତୁ ଭାରତ ସହିତ ତାଙ୍କର ଭଲ ସମ୍ପର୍କ ମଧ୍ୟ ଅଛି । ପୃଥିବୀର ତୃତୀୟ ପ୍ରଭାବଶାଳୀ ମୁସଲମାନ

ରୟାଲ୍ ଇସଲାମିକ୍ ଷ୍ଟ୍ରାଟେଜିକ୍ ଷ୍ଟଡିଜ୍ ସେଣ୍ଟର ୨୦୨୨ ରେ ତମିମଙ୍କୁ ବିଶ୍ଵର ସବୁଠାରୁ ପ୍ରଭାବଶାଳୀ ମୁସଲମାନ ଭାବରେ ସ୍ୱୀକୃତି ଦେଇଥିଲା । ୨୦୨୩ ତାଲିକାରେ ତମିମ ତୃତୀୟ ସ୍ଥାନରେ ଅଛନ୍ତି । ତମିମ ବିନ୍ ହମାଦ ୩ ଜୁନ୍ ୧୯୮୦ ରେ କତାରର ଦୋହାଠାରେ ଜନ୍ମଗ୍ରହଣ କରିଥିଲେ। କାତାର ଇତିହାସରେ ଶେଖ ତମିମ ବିନ୍ ହମାଦ ଅଲ ଥାନି ହେଉଛନ୍ତି ସର୍ବକନିଷ୍ଠ ଧନୀ । ବହୁ ପ୍ରତିଭାର ଅଧିକାରୀ ଶେଖ ତମିମ ୨୦୧୩ ରେ ମାତ୍ର ୩୩ ବର୍ଷ ବୟସରେ କ୍ଷମତା ଗ୍ରହଣ କରିଥିଲେ । ସେ ଏମିର ହମାଦ ବିନ୍ ଖଲିଫା ଅଲ ଥାନୀଙ୍କ ଚତୁର୍ଥ ପୁତ୍ର। ୨୦୦୩ ରେ ତାଙ୍କ ବଡ଼ ଭାଇ ଶେଖ ଜାସିମ ସିଂହାସନକୁ ଦାବିକୁ ତ୍ୟାଗ କରିବାପରେ ସେ ଉତ୍ତରାଧିକାରୀ ହୋଇଥିଲେ । ତାଙ୍କର ଶିକ୍ଷା ବ୍ରିଟେନରେ ହୋଇଥିଲା ।  ଶେର୍ବର୍ନ ଏବଂ ହାରୋ ସ୍କୁଲରେ ପଢିବା ପରେ ସେ ରୟାଲ ମିଲିଟାରୀ ଏକାଡେମୀରୁ ସ୍ନାତକ ହାସଲ କରିଥିଲେ ।

କାହିଁକି ବଢୁଛି କ୍ଷମା ମିଳିବାର ଆଶା ?

କତାରର ଏମିର୍ ତାଙ୍କ ଦେଶରେ ଅନେକ ଭୂମିକାରେ ସକ୍ରିୟ ରହିଛନ୍ତି ।  'ଦି ଇକୋନୋମିଷ୍ଟ'ର ଏକ ରିପୋର୍ଟ ଅନୁଯାୟୀ, ଶେଖଙ୍କ ପରିବାରର ଅଧିକାଂଶ ଲୋକ କତାରର ସେନାଠାରୁ ଆରମ୍ଭ କରି ସରକାର ପର୍ଯ୍ୟନ୍ତ ବହୁ ଗୁରୁତ୍ୱପୂର୍ଣ୍ଣ ପଦବୀରେ ଅଛନ୍ତି । ଗୋଟିଏ ପ୍ରକାରେ କହିବାକୁ ଗଲେ ଦେଶର ସବୁକ୍ଷେତ୍ର ସେମାନଙ୍କ ଦ୍ୱାରା ପରିଚାଳିତ ।  ଶେଖ ତାମିମ କତାରର ଜାତୀୟ ଅଲିମ୍ପିକ୍ କମିଟିର ସଭାପତି ତଥା କତାର ସଶସ୍ତ୍ର ବାହିନୀର ଡେପୁଟି କମାଣ୍ଡର-ଇନ୍-ଚିଫ୍ ଅଟନ୍ତି । ସେ ସର୍ବୋଚ୍ଚ ଶିକ୍ଷା ପରିଷଦର ଅଧ୍ୟକ୍ଷ । ଦେଶର ଅର୍ଥନୀତି ପରିଚାଳନା କରିବାର ଦାୟିତ୍ବ ମଧ୍ୟ ତାଙ୍କ ଉପରେ ନ୍ୟସ୍ତ ।

କତାର ହେଉଛି ଭାରତର ଏକ ବଡ ବାଣିଜ୍ୟ ଭାଗିଦାରୀ । ଭାରତ ସେଠାରେ ବିଶେଷ ସୁବିଧା ପାଇଥାଏ । କତାର ହେଉଛି ବିଶ୍ୱର ସର୍ବବୃହତ ପ୍ରାକୃତିକ ଗ୍ୟାସ ରପ୍ତାନୀକାରୀ । କତାରର ଜନସଂଖ୍ୟା ପ୍ରାୟ ୨୯ ଲକ୍ଷ । ଯେଉଁଥିରେ ପ୍ରାୟ ୧୫%  ହିନ୍ଦୁ ଅଛନ୍ତି । ଶକ୍ତି ସୁରକ୍ଷା କ୍ଷେତ୍ରରେ କତାର ଭାରତକୁ ଗ୍ୟାରେଣ୍ଟି ଦେଇଛି । ଭାରତ ଏହାର LNG ଆମଦାନୀଗୁଡିକର ୪୦% କେବଳ କତାରରୁ ହିଁ ଆମଦାନୀ କରିଥାଏ । ଯେ ଭାରତ ସେମାନଙ୍କ ପାଇଁ କେତେ ମହତ୍ଵପୂର୍ଣ୍ଣ ଏହି କଥାରୁ ଜଣାପଡେ ଯେ ୨୦୧୬ ରେ କତାର ଭାରତ ପାଇଁ LNG ମୂଲ୍ୟ ୫୦% ରୁ ଅଧିକ ଛାଡ ଦେଇଥିଲା । ଥରେ କମ୍ LNG କିଣିବା ପାଇଁ ଭାରତକୁ ଜରିମାନା ଦେବାକୁ ପଡିଥାନ୍ତା ।  କିନ୍ତୁ ପ୍ରଧାନମନ୍ତ୍ରୀ ମୋଦି ଏବଂ କତାରର ଏମିରଙ୍କ ମଧ୍ୟରେ ହୋଇଥିବା ଚୁକ୍ତି ଯୋଗୁଁ କତାର ଭାରତକୁ ଜରିମାନା ଛାଡ଼ କରିବାକୁ ରାଜି ହୋଇଯାଇଥିଲା ।

କତାରର ଏମୀରଙ୍କର କ୍ଷମାଦାନ

କତାରର ପରମ୍ପରା ଅନୁଯାୟୀ ଦେଶର ଏମିର ସଦଭାବନା ପ୍ରଦର୍ଶନ କରି ନିଜ ଦେଶରେ ଥିବା ବନ୍ଦୀମାନଙ୍କୁ ବର୍ଷକୁ ଦୁଇଥର କ୍ଷମା ପ୍ରଦାନ କରନ୍ତି । ଏହି ସୁଯୋଗ ପ୍ରତିବର୍ଷ ପବିତ୍ର ରମଜାନ ମାସରେ ଏବଂ କତାରର ଜାତୀୟ ଦିବସରେ ଅର୍ଥାତ୍ ୧୮ ଡିସେମ୍ବରରେ ଆସିଥାଏ । ଭାରତ ସହ ଭଲ ସମ୍ପର୍କକୁ ଦୃଷ୍ଟିରେ ରଖି କତାରର ଏମିର ତମିମ ବିନ ହମାଦ ଅଲ ଥାନି ମଧ୍ୟ ଭାରତୀୟ ନାଗରିକଙ୍କ ପାଇଁ କ୍ଷମା ଦାନ କରିପାରନ୍ତି । ବଲ୍ ବର୍ତ୍ତମାନ କତାର କୋର୍ଟରେ ଅଛି । ନିଜ ନାଗରିକମାନେ ଫେରେଇ ଆଣିବାକୁ ଭାରତ ସରକାର ନିରନ୍ତର ଚେଷ୍ଟା କରୁଛନ୍ତି ।

କତାରରେ ମୃତ୍ଯୁଦଣ୍ଡ କେମିତି ଦିଆଯାଏ ?

କତାରରେ ଫାୟାରିଂ ସ୍କାଡ ଦ୍ୱାରା ମୃତ୍ୟୁଦଣ୍ଡ ଦିଆଯାଏ । ବହୁ ବିରଳ କ୍ଷେତ୍ରରେ ଫାଶୀ ଦେଇ ମୃତ୍ୟୁଦଣ୍ଡ ଦିଆଯାଏ । ଏଭଳି ପରିସ୍ଥିତିରେ କତାରର ଏମିରଙ୍କୁ ଯଦି ଆବେଦନ କରାଯାଏ, ତେବେ ଏହି ଭାରତୀୟମାନଙ୍କୁ କ୍ଷମା ମିଳିବାର ସମ୍ଭାବନା ଅଛି । ବାସ୍ତବରେ, ଏହା ଏତେ ସମ୍ବେଦନଶୀଳ ବିଷୟ ଯେ ସାଧାରଣ ଜନତା ଏହା ବିଷୟରେ ଅଧିକ ଆଲୋଚନା କରିପାରିବେ ନାହିଁ ।  କୂଟନୈତିକ କ୍ଷେତ୍ରରେ ସବୁକିଛି ଖୋଲାଖୋଲି ଭାବେ କୁହାଯାଏ ନାହିଁ ।

କେତେ ସମ୍ପତିର ମାଲିକ ଏମୀର ?

ଖବର ଅନୁଯାୟୀ, ସେ ୧.୬ ବିଲିୟନ ପାଉଣ୍ଡର ମାଲିକ ଅଟନ୍ତି । ରୟାଲ ପରିବାରର ମୋଟ ସମ୍ପତ୍ତି ହେଉଛି ୩୩୫ ବିଲିୟନ ଡଲାର । ସାଉଥ ଚାଇନା ମର୍ନିଂ ପୋଷ୍ଟର ରିପୋର୍ଟ ଅନୁଯାୟୀ ସେ ୨୦୧୯ ରେ ଓମାନରେ ନିଜ ପାଇଁ ଏକ ସ୍ୱତନ୍ତ୍ର ପ୍ରାସାଦ ‘ହ୍ଵାଇଟ ପ୍ୟାଲେସ’ ନିର୍ମାଣ କରିଥିଲେ। ଯାହାର ମୂଲ୍ୟ ପ୍ରାୟ ଏକ ବିଲିୟନ ଡଲାର ବୋଲି ଆକଳନ କରାଯାଇଛି ।