ମୈଦାନକୁ ଓହ୍ଲାଇଲେ ପ୍ରାର୍ଥୀ । ଝାରସୁଗୁଡାରେ ବିଜେପିର ବିଶାଳ ରାଲି । ସେପଟେ ପାରଳାଖେମୁଣ୍ଡିରେ କଂଗ୍ରେସର ଶକ୍ତି ପ୍ରଦର୍ଶନ
କନକ ବ୍ୟୁରୋ: ଝାରସୁଗୁଡାରେ ବିଜେପି ଜୋରସୋରରେ ପ୍ରଚାର ଆରମ୍ଭ କରିଛି । ବିଜେପିର ବରଗଡ ଲୋକସଭା ପ୍ରାର୍ଥୀ ପ୍ରଦୀପ ପୁରୋହିତ ଏବଂ ଝାରସୁଗୁଡା ବିଧାନସଭା ପ୍ରାର୍ଥୀ ଟଙ୍କଧର ତ୍ରିପାଠୀ ମିଳିତ ଭାବେ ପ୍ରଚାର ମଇଦାନକୁ ଓହ୍ଲାଇଛନ୍ତି । ଝାରସୁଗୁଡା ବଡ଼ମାଳରୁ ସାପଡା ଯାଏଁ ଏକ ରାଲି କରି ନିର୍ବାଚନୀ ସଭା କରି ଭୋଟରଙ୍କୁ ଭୋଟ ଦେବାକୁ ନିବେଦନ କରିଛନ୍ତି । ବିକାଶ ଏବଂ ସମୃଦ୍ଧି ପାଇଁ ଏଥର ବିଜେପିର ଡ଼ବଳ ଇଞ୍ଜିନ ସରକାରକୁ ସମର୍ଥନ ଦେବାକୁ ଲୋକଙ୍କୁ ବୁଝାଇଛନ୍ତି । ମୋଦୀ ସରକାରଙ୍କ ଲୋକାଭିମୁଖୀ ଯୋଜନା, ବିକମୂଳକ କାର୍ଯ୍ୟ, ମୋଦୀ ଗ୍ୟାରେଣ୍ଟି ର ବାର୍ତା ଘରେଘରେ ପହଞ୍ଚାଇବା ସହ ତୃଣମୂଳସ୍ତରରେ ଲୋକଙ୍କ ପାଖକୁ ପହଞ୍ଚିବା ପାଇଁ କର୍ମୀମାନଙ୍କୁ ଆହ୍ୱାନ କରିଛନ୍ତି ବିଜେପି ନେତୃମଣ୍ଡଳୀ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ପାରଳାଖେମୁଣ୍ଡିରେ ଦଳୀୟ କର୍ମୀ ଓ ସମର୍ଥକଙ୍କୁ ନେଇ ଶକ୍ତି ପ୍ରଦର୍ଶନ କରିଛନ୍ତି କଂଗ୍ରେସ ବିଧାୟକ ପ୍ରାର୍ଥୀ ବିଜୟ ପଟ୍ଟନାୟକ । ଜିଲ୍ଲା କଂଗ୍ରେସ କାର୍ଯ୍ୟାଳୟରୁ ହଜାର ହଜାର କର୍ମୀଙ୍କ ସହ ଶୋଭାଯାତ୍ରାରେ ବାହାରି ପାରଳାଖେମୁଣ୍ଡି ସହର ଦେଇ ବୃନ୍ଦାବନଠାରେ ନିର୍ବାଚନୀ ସଭା କରିଥିଲେ । ବିଧାୟକ ପ୍ରାର୍ଥୀ ବିଜୟ ପଟ୍ଟନାୟକଙ୍କ ସହ ମୋହନା ବିଧାୟକ ପ୍ରାର୍ଥୀ ଦାସରଥୀ ଗମାଙ୍ଗ ମଧ୍ୟ ସଭାରେ ସାମିଲ ହୋଇଥିଲେ । ସେହିପରି ଜଟଣୀରେ ଗାଁ ଗାଁ ବୁଲି ପ୍ରଚାର କରିଛନ୍ତି ସୁର ରାଉତରାୟଙ୍କ ବଡ ପୁଅ ସିଦ୍ଧାର୍ଥ ରାଉତରାୟ । ସାନ ପୁଅ ବିଜେଡି ଟିକେଟରେ ଭୁବନେଶ୍ୱର ଲୋକସଭା ପ୍ରାର୍ଥୀ ହୋଇଛନ୍ତି । ପୂର୍ବରୁ ବଡପୁଅ ସିଦ୍ଧାର୍ଥ ଜଟଣୀରୁ କଂଗ୍ରେସ ଟିକେଟରେ ନିର୍ବାଚନ ଲଢିବ ବୋଲି ସୁର କହୁଥିଲେ । ହେଲେ ବାପାଙ୍କ କଥା ନମାନି ଏବେ ସିଦ୍ଧାର୍ଥ ଜଟଣୀରୁ ସ୍ୱାଧୀନ ପ୍ରାର୍ଥୀ ଭାବେ ଲଢିବାକୁ ମନ ବଳାଇଛନ୍ତି । ସେଥିପାଇଁ ଏବେ ଗାଁ ଗାଁ ବୁଲି ପ୍ରଚାର କରୁଛନ୍ତି ।