କରୋନା ଛଡାଇନେଲା ଘୋଡା, ଓଟଙ୍କ ଆହାର । ଦିନେ ବେଳାଭୂମିରେ ପିଠିରେ ବସାଇ ଲୋକଙ୍କୁ ବୁଲାଉଥିଲେ, ଆଜି କଟକଣା ପାଇଁ ଭୋକରେ ଆଉଟୁ ପାଉଟୁ ହେଉଛନ୍ତି ।
କନକ ବ୍ୟୁରୋ: ଦିନେ ବେଳାଭୂମିରେ ମନୋରଞ୍ଜନ କରି ମାଲିକର ପକେଟକୁ ଦି ପଇସା ଦେଇଥିଲେ । କୁନି କୁନି ପିଲା ସହ ଲୋକଙ୍କୁ ନିଜ ପିଠିରେ ବସାଇ ବେଳାଭୂମିରେ ବୁଲାଉଥିଲେ ଓଟ ଏବଂ ଘୋଡା । ମାଲିକ ଯାହା ରୋଜଗାର କରୁଥିଲା ସେଥିରେ ପଶୁଙ୍କୁ ପେଟପୂରା ଖାଇବାକୁ ଦେଉଥିଲା । ହେଲେ ଏବେ କରୋନା କଟକଣା ପାଇଁ ବେଳାଭୂମି ମନା, ପର୍ଯ୍ୟଟକ ମନା । ଲୋକ ଆସିଲେ ତ ଘୋଡା ବୁଲିବ, ଓଟ ଚାଲିବ । ଆଉ ଟଙ୍କା ଆସିଲେ ମାଲିକ ସହ ପୋଷା ଜନ୍ତୁଙ୍କ ଜୀବନ ବଞ୍ଚିବ । କିନ୍ତୁ ଏବେ କଟକଣା ପାଇଁ କାନ୍ଦୁଛନ୍ତି ଉଭୟ ମାଲିକ ଆଉ ରାଜୁ, କାଳୁ…
Kanak News is now on WhatsApp
Join and get latest news updates delivered to you via WhatsApp
ପୁରୀ ବେଳାଭୂମିରେ ଲୋକଙ୍କୁ ଖୁସି ଦେଉଥିବା ଘୋଡା, ଓଟଙ୍କ ଆଖିରେ ଏବେ ଲକଡାଉନ ଦେଇଛି ଲୁହ । ଭୂତାଣୁ ପାଇଁ ଭୋକର ଯନ୍ତ୍ରଣାରେ ଖାଲି ମଣିଷ ନୁହେଁ ବରଂ ପଶୁ ବି କଲବଲ ହେଉଛି । ଏଇ ଯେମିତି ଏ ପଶୁଙ୍କର ଖାଦ୍ୟ ଛଡାଇ ନେଇଛି କରୋନା । ଦିନକୁ ୩ ଥର ଖାଇବା ବଦଳରେ ବକତେ ଖାଇ ବଞ୍ଚୁଛନ୍ତି ଏ ପୋଷା ପଶୁ । ବେଳାଭୂମିରେ ଲୋକଙ୍କୁ ଖୁସି କରିବା ପରେ ଲୋକେ ଯାହା ମାଲିକକୁ ପାଉଣା ଦିଅନ୍ତି ସେଥିରେ ମାଲିକ ଖୁସ ହୁଏ ଆଉ ମାଲିକ ଖୁସ ହେଲେ ରାଜୁ ବି ଖୁସି ରହେ । କାରଣ ତାକୁ ଭଲରେ ଖାଦ୍ୟ ଗଣ୍ଡେ ମିଳିବ । ହେଲେ ଏବେ ବେପାର ବନ୍ଦ ଥିବାରୁ ଭୋକରେ ରହୁଛି ପେଟର ଭୋକ କହି ପାରୁନଥିବା ଘୋଡା ।
ଖାଲି ରାଜୁ କାହିଁକି ଓଟ କାଳୁର ବି ଅବସ୍ଥା ଠିକ ସେମିତି । ବେଳାଭୂମି ଖାଁ ଖାଁ ବୋଲି ଖାଦ୍ୟ ଏମାନଙ୍କ ପାଇଁ ସ୍ୱପ୍ନ ପାଲଟିଛି । ଖାଦ୍ୟ କିଣିବାକୁ ମାଲିକ ପାଖରେ ଟଙ୍କା ନଥିବାରୁ ଗଛର ଡାଳ ପତ୍ର ଦେଉଛନ୍ତି ମାଲିକ । ଆଉ ଜନ୍ତୁଙ୍କ ଏଭଳି ଅବସ୍ଥା ଦେଖି ଦୁଃଖ କରୁଛି ମାଲିକ । ଘୋଡା, ଓଟକୁ ଖାଇବାକୁ ଦେଇପାରୁନି ବୋଲି ମାଲିକ ପଶୁଙ୍କ ପାଖରେ କ୍ଷମା ମାଗୁଛି । ଆଉ ତାଙ୍କ ମୁଣ୍ଡ ଆଉଁଷି ନିଜର ଦୁଃଖ କହୁଛି ମାଲିକ ।
କାଳୁ, ରାଜୁଙ୍କ ପରି ଏବେ ଶହେରୁ ଅଧିକ ଘୋଡା, ଓଟଙ୍କୁ ଅବସ୍ଥା ଏମିତି । କରୋନାର ପ୍ରଥମ ଲହରରେ ଖାଦ୍ୟ ନପାଇ ଏମିତି ୩୦ରୁ ଅଧିକ ଓଟ, ଘୋଡାଙ୍କ ମୃତ୍ୟୁ ହୋଇଥିଲା । ଯେଉଁଥିପାଇଁ ବଡ କ୍ଷତି ସହିଥିଲେ ମାଲିକ । ହେଲେ ଏବେ ପୁଣି ୨ୟ ଲହର ଦୁଃଖ ଦେଇ ଚାଲିଛି । ଓଟ ଦିନକୁ ୨୦ କେଜି ଦାନା ଖାଉଥିବା ବେଳେ ଏବେ ୫ରୁ ୬ କେଜି ଦିଆଯାଉଛି । ସମୂଦ୍ର କୂଳରେ ଓଟ ଚାଲିଲେ ମାଲିକଙ୍କ ଘରେ ଚୁଲି ଜଳେ, ସଂସାର ଚାଲେ । ହେଲେ ଏବେ ନିଜେ ବଞ୍ଚିବା ତ ମୁସକିଲ ହୋଇପଡୁଛି ତେଣୁ ଉପାସରେ ରହୁଛନ୍ତି ପଶୁ । ଏଇ ଖାଦ୍ୟାଭାବରୁ ପ୍ରଥମ ଲହରରେ ଅନେକ ଓଟ, ଘୋଡାଙ୍କ ମୃତ୍ୟୁ ଏବେ ମାଲିକଙ୍କ ମନରେ ଛନକା ପଶାଇଥିବା ବେଳେ ତୃତୀୟ ଲହର ମନରେ ଆଶଙ୍କା ବଢାଇଛି ।