କରୋନାକୁ ଡାକିଲେ : କେହି ମାନିଲେନି, ହାତ ଟେକିଦେଲା ପୁଲିସ; ପୂଜା ବଜାରରେ ଅସମ୍ଭାଳ ଭିଡ଼, ନିୟମ ଉଲ୍ଲଙ୍ଘନ କରି ତଣ୍ଡ ଗଣିଲେ ୪୬୪

ରାଜଧାନୀରେ ଏବେ କରୋନା ସଂକ୍ରମଣ ଶିଖର ଛୁଇଁଛି। ପ୍ରତିଦିନ ଆକ୍ରାନ୍ତଙ୍କ ସଂଖ୍ୟା ବଢ଼ି ଚାଲିଛି। ତିନିଦିନ ହେଲା ଆକ୍ରାନ୍ତଙ୍କ ସଂଖ୍ୟା ୩ ଶହକୁ ଟପି ଯାଇଛି। ଆଗକୁ ସ୍ଥିତି ଆହୁରି ସାଂଘାତିକ ହେବ ବୋଲି ଲୋକଙ୍କୁ ସତର୍କ ରହିବାକୁ କୁହାଯାଇଛି। ତଥାପି ଆଜି କେହି କରୋନା କଟକଣାକୁ ମାନି ନଥିଲେ। ତେଣୁ ପୂଜା ବଜାରର ଭିଡ଼ କରୋନାକୁ ଆମନ୍ତ୍ରଣ କରିବା ସଦୃଶ ହୋଇଥିଲା। ଆଜିର ଏହି ଭିଡ଼ କରୋନା ସଂକ୍ରମଣକୁ ଆହୁରି ବଢ଼ାଇବ ବୋଲି ଆଲୋଚନା ହେଉଛି। କରୋନା ସଂକ୍ରମଣକୁ ଦୃଷ୍ଟିରେ ରଖି ପୁଲିସ ଗଣେଶ ପୂଜା ଉପରେ କଟକଣା ଲଗାଇଥିବା ବେଳେ ପୂଜା ବଜାର ଭିଡ଼କୁ କାହିଁକି ନିୟନ୍ତ୍ରଣ କରିପାରିଲା ନାହିଁ? ଥାନାକଡ଼ରେ ପ୍ରବଳ ଭିଡ଼ ହୋଇଥିଲେ ମଧ୍ୟ କାହିଁକି ଭିଡ଼ ନିୟନ୍ତ୍ରଣ କରିବାକୁ ପଦକ୍ଷେପ ନେଲା ନାହିଁ ପୁଲିସ? ମାତ୍ର ୫୦ମିଟର ଦୂର ରାଜମହଲ ଛକରେ ପୁଳାପୁଳା ପୁଲିସ ଗାଡ଼ି ମଟର ଯାଞ୍ଚ କରୁଥିଲେ ବି ଏକ ନମ୍ବର ହାଟରେ କାହାରିକୁ ଦେଖିବାକୁ ମିଳି ନ ଥିଲା କାହିଁକି? ଏ ସବୁ ପ୍ରଶ୍ନ ଆଜି ବୁଦ୍ଧିଜୀବୀମହଲରେ ଚିନ୍ତାର କାରଣ ହୋଇଛି। କେବଳ ଏକ ନମ୍ବର ହାଟ ନୁହେଁ, ରାଜଧାନୀର ଆଜି ସବୁ ଛକ ଓ ବଜାରରେ ଭିଡ଼ ଲାଗିଥିଲା। ମାର୍କେଟ୍‌ ବିଲ୍ଡିଂରେ ମଧ୍ୟ ଲୋକଙ୍କ ଗହଳି ହୋଇଥିଲା।

ଅପରପକ୍ଷେ କମିସନରେଟ୍‌ ପୁଲିସ୍‌ ପକ୍ଷରୁ କୁହାଯାଇଛି ଯେ ସାମାଜିକ ଦୂରତା ଉଲ୍ଲଙ୍ଘନ ଅଭିଯୋଗରେ ଆଜି କମିସନରେଟ୍‌ ପୁଲିସ ୪୬୪ ଜଣଙ୍କଠାରୁ ଜରିମାନା ଆଦାୟ କରାଯାଇଛି। ସେହିପରି ମାସ୍କ ପିନ୍ଧି ନଥିବା ଅଭିଯୋଗରେ ୧୪୭ଜଣଙ୍କଠାରୁ ଜରିମାନା ଆଦାୟ ହୋଇଛି।