ପଶ୍ଚିମବଙ୍ଗ ମମତା ସରକାରକୁ ହାଇକୋର୍ଟଙ୍କ ବଡ ଝଟକା । ୧୩ ବର୍ଷ ଭିତରେ ଜାରି କରିଥିବା ସମସ୍ତ ଓବିସି ସାର୍ଟିଫିକେଟ୍ ରଦ୍ଦ ।
କନକ ବ୍ୟୁରୋ: ଓବିସି ସାର୍ଟିଫିକେଟକୁ ନେଇ କୋଲକାତା ହାଇକୋର୍ଟଙ୍କ ବଡ ଫୈସଲା । ୨୦୧୦ ମସିହା ପରେ ପ୍ରସ୍ତୁତ ହେଇଥିବା ଓବିସି ସୂଚୀକୁ ରଦ୍ଦ କଲେ ପଶ୍ଚିମବଙ୍ଗ ହାଇକୋର୍ଟ । କୋଲକାତା ହାଇକୋର୍ଟ କହିଛନ୍ତି ଯେ, ଏବେ କୌଣସି ବି ନୂଆ ପ୍ରମାଣପତ୍ର ଜାରି କରାଯିବନି ।
Kanak News is now on WhatsApp
Join and get latest news updates delivered to you via WhatsApp
ତେବେ କୋଲକାତା ହାଇକୋର୍ଟ ଏହାସହିତ ଆଉ ଗୋଟିଏ କଥା ମଧ୍ୟ ସ୍ପଷ୍ଟ କରିଛନ୍ତି ଯେ, ଓବିସି ସୂଚୀକୁ ରଦ୍ଦ କଲେ ବି, ଏହା ଆଧାରରେ ଚାକିରି ପାଇଥିବା ଲୋକଙ୍କର କୌଣସି ଅସୁବିଧା ହେବ ନାହିଁ । ଯେଉଁମାନେ ଏହି ଆଧାରରେ ଚାକିରି ପାଇଥିବେ, ସେମାନଙ୍କର ଚାକିରି ପୂର୍ବଭଳି ଜାରି ରହିବ ବୋଲି କୋଲକାତା ହାଇକୋର୍ଟ ସ୍ପଷ୍ଟ କରିଛନ୍ତି ।
କୋର୍ଟ କହିଥିଲେ ଯେ, ୨୦୧୧ରୁ ୨୦୨୪ ଭିତରେ ରାଜ୍ୟ ଦ୍ୱାରା ଜାରି କରାଯାଇଥିବା ସମସ୍ତ ଓବିସି ପ୍ରମାଣପତ୍ରକୁ ରଦ୍ଦ କରାଯାଉଛି । ୨୦୧୦ ପରେ ସମସ୍ତ ଓବିସି ସଂରକ୍ଷଣ ସୂଚୀକୁ ରଦ୍ଦ କରିଦିଆଯାଉଛି । ତେବେ ୨୦୧୦ ପୂର୍ବରୁ ପଞ୍ଜୀକୃତ ହେଇଥିବା ଓବିସି ସୂଚୀକୁ ରଦ୍ଦ କରିନାହାଁନ୍ତି କୋର୍ଟ । ଯାହାକି ପଶ୍ଚିମବଙ୍ଗର ମମତା ସରକାରକୁ ଏକ ବଡ ଝଟକା ବୋଲି କୁହାଯାଉଛି । ଖାଲି ସେତିକି ନୁହେଁ, କୋର୍ଟଙ୍କ ଏଭଳି ରାୟ ପଶ୍ଚିମବଙ୍ଗ ରାଜନୀତିକୁ ମଧ୍ୟ ସରଗରମ କରିଛି ।