ବଡ ଆନ୍ଦୋଳନ ପାଇଁ ସଜବାଜ ହେଉଛନ୍ତି କୃଷକ ସଙ୍ଗଠନ : କୃଷି ଆଇନ ଉଚ୍ଛେଦ ବିଲକୁ କ୍ୟାବିନେଟ ମଞ୍ଜୁରୀ ପରେ ବି ଶକ୍ତି ପ୍ରଦର୍ଶନ କରିବେ କୃଷକ
ଆନ୍ଦୋଳନର ବର୍ଷ ପୂର୍ତ୍ତି ଅବସରରେ ଦିଲ୍ଲୀ ସୀମାରେ ଏକାଠି ହେବେ ହଜାର ହଜାର ଚାଷୀ । ୨୯ରେ ସଂସଦକୁ ଟ୍ରାକ୍ଟର ରାଲି ଯୋଜନା
କନକ ବ୍ୟୁରୋ : କୃଷି ଆଇନ ରଦ୍ଦ ବିଲକୁ କ୍ୟାବିନେଟର ମଞ୍ଜୁର ପରେ ବି, ଚାଷୀ ସଂଗଠନ ଶାନ୍ତ ପଡି ନାହାଁନ୍ତି । ଏବଂ ବଡ ଆନ୍ଦୋଳନ ପାଇଁ ସଜବାଜ ହେଉଛନ୍ତି । କାଲି କୃଷକ ଆନ୍ଦୋଳନକୁ ବର୍ଷେ ପୁରୁଥିବାରୁ ଏମଏସପି ଗ୍ୟାରେଂଟି ଓ ଅନ୍ୟାନ୍ୟ ଦାବିରେ ଆନ୍ଦୋଳନ କରିବାକୁ ଘୋଷଣା କରିଛି ସଂଯୁକ୍ତ କିଷାନ ମୋର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ତିନି ବିବାଦୀୟ କୃଷି ଆଇନ ପ୍ରତ୍ୟାହାର ଘୋଷଣା ହୋଇଥିଲେ ବି କୃଷକମାନେ ଅନ୍ୟ ଦାବି ସବୁ ପୂରଣ ଜିଦ୍ରେ ଆନ୍ଦୋଳନ ଜାରି ରଖିବାକୁ ଅଟଳ ରହିଛନ୍ତି । ସଂସଦରେ ଆଇନ ଉଚ୍ଛେଦ ନହେବା ପର୍ଯ୍ୟନ୍ତ ସେମାନେ ଆନ୍ଦୋଳନ ଜାରି ରଖିବେ। ଏଥିପାଇଁ ସେମାନଙ୍କ ପୂର୍ବ ଯୋଜନା ଅନୁଯାୟୀ ସମସ୍ତ କାର୍ଯ୍ୟକ୍ରମ ହେବ । ଆସନ୍ତା ୨୯ ତାରିଖରେ ସଂସଦର ଶୀତ ଅଧିବେଶନ ଆରମ୍ଭ ହେଉଥିବା ବେଳେ ଏହି ଦିନ ଆନ୍ଦୋଳନରତ ଚାଷୀମାନେ ସଂସଦକୁ ଟ୍ରାକ୍ଟର ରାଲି କରିବେ ।
ଏମ୍ଏସ୍ପି ଗ୍ୟାରେଣ୍ଟି ଦାବି କରି ସେମାନେ ସଂସଦକୁ ଟ୍ରାକ୍ଟର ଯାତ୍ରା କରିବେ ବୋଲି ବିକେୟୁ ନେତା ରାକେଶ ଟିକାୟତ କହିଛନ୍ତି । ସରକାରଙ୍କ ଦ୍ବାରା ଯେଉଁ ରାସ୍ତା ଖୋଲାଯାଇଛି ସେହି ରାସ୍ତାରେ ଟ୍ରାକ୍ଟର ଯିବ। ଆମେ ରାସ୍ତା ବନ୍ଦ କରିଥିଲୁ ବୋଲି ଅଭିଯୋଗ ହୋଇଥିଲା । କିନ୍ତୁ ଆମେ ରାସ୍ତା ବନ୍ଦ କରିନଥିଲୁ କି ରାସ୍ତା ବନ୍ଦ କରିବା ଆମର ଉଦ୍ଦେଶ୍ୟ ନଥିଲା। ଆମେ ସରକାରଙ୍କ ସହ କଥା ହେବାକୁ ଚାହୁଥିଲୁ । ଆମେ ସିଧାସଳଖ ସଂସଦ ଯିବୁ ବୋଲି ଟିକାୟତ କହିଛନ୍ତି ।
୬୦ ଟ୍ରାକ୍ଟର ସହିତ ପ୍ରାୟ ୧ ହଜାର ଚାଷୀ ସେମାନଙ୍କ ଏମ୍ଏସପି ଦାବି ପାଇଁ ସଂସଦକୁ ଯାତ୍ରା କରିବେ ବୋଲି ଏସକେଏମ୍ କହିଛି । ଏମ୍ଏସପି ଗ୍ୟାରେଣ୍ଟି ଆଇନ ସଂକ୍ରାନ୍ତରେ ଆମେ ସରକାରଙ୍କ ଜବାବକୁ ଅପେକ୍ଷା କରିଛୁ । ଚାଷୀ ଆନ୍ଦୋଳନ ସମୟରେ ୭୫୦ କୃଷକ ପ୍ରାଣ ହାରାଇଛନ୍ତି। ସେମାନଙ୍କ ପରିବାର ସଦସ୍ୟଙ୍କ ପାଇଁ କ୍ଷତିପୂରଣ ଦାବି ହୋଇଛି । ଅନ୍ୟପକ୍ଷେ କହିଛି ଆସନ୍ତା ୨୬ ତାରିଖରେ କୃଷି ଆନ୍ଦୋଳନକୁ ବର୍ଷେ ପୂରଣ ହେବ। ଏଥିପାଇଁ ହେବାକୁ ଥିବା କାର୍ଯ୍ୟକ୍ରମରେ ହଜାର ହଜାର ସଂଖ୍ୟାରେ କୃଷକ ଯୋଗ ଦେବେ ବୋଲି ଏସ୍କେଏମ୍ କହିଛି ।