ବାୟଜୁ କର୍ମଚାରୀଙ୍କ ବଢିଲା ଚିନ୍ତା । ୧୧ ପ୍ରତିଶତ କର୍ମଚାରୀ ଛଟେଇ କରିବାକୁ କମ୍ପାନୀର ଯୋଜନା

କନକ ବ୍ୟୁରୋ : ଦେଶର ସବୁଠାରୁ ବଡ ଏଡଟେକ୍ ଫାର୍ମ ବାୟଜୁ ପୁଣିଥରେ କର୍ମଚାରୀ ଛଟେଇ କରିବାକୁ ଯୋଜନା କରିଛି । କମ୍ପାନୀର ଇଣ୍ଡିଆ ମୁଖ୍ୟ ଅର୍ଜୁନ ମୋହନ ରିଷ୍ଟ୍ରକଚରିଂ କରିବା ଉପରେ ନଜର ରଖି ଖର୍ଚ୍ଚ କାଟ୍ କରିବାକୁ ଯୋଜନା କରିଛନ୍ତି । ଏକ ରିପୋର୍ଟ ମୁତାବକ ଖର୍ଚ୍ଚ କାଟ୍ କ୍ରମରେ କମ୍ପାନୀ ୪୦୦୦ କର୍ମଚାରୀ ଛଟେଇ କରିବାକୁ ଚିନ୍ତା କରୁଛି । ଗତ ସପ୍ତାହରେ ଅର୍ଜୁନ ମୋହନଙ୍କ ବାୟଜୁ ତରଫରୁ ଇଣ୍ଡିଆର ମୁଖ୍ୟ ଭାବେ ଚୟନ କରାଯାଇଥିଲା । ଏବେ ଅର୍ଜୁନ ମହୋନ କମ୍ପାନୀର ମ୍ୟାନେଜମେଣ୍ଟକୁ ତାଙ୍କର ଏହି ପ୍ଲାନ ବାବଦରେ ଜଣାଇଦେଇଛନ୍ତି ।

ଏକ ଜାତୀୟ ଗଣମାଧ୍ୟମର ଖବର ମୁତାବକ ଫଣ୍ଡିଂ ସଂକଟର ସାମ୍ନା କରୁଥିବା ବାୟଜୁ କମ୍ପାନୀ ପରିଚାଳନା ଷ୍ଟ୍ରକଚରର ସରଳ କରିବାକୁ ଖର୍ଚ୍ଚ କାଟ ପାଇଁ ଯୋଜନା କରିଛି । ବ୍ୟବସାୟକୁ ରିଷ୍ଟ୍ରକଚର କରିବା କ୍ରମରେ ଆଗାମୀ କିଛି ସପ୍ତାହ ମଧ୍ୟରେ କମ୍ପାନୀ ତା’ର ମୋଟ କର୍ମଚାରୀରୁ ୧୧ ପ୍ରତିଶତ ଛଟେଇ କରିପାରେ । ଏହି ଛଟେଇ କର୍ମଚାରୀଙ୍କ ସଂଖ୍ୟା ପାଖାପାଖି ୪ ହଜାର ହୋଇପାରେ । ବେଙ୍ଗାଲୁରୁ ସ୍ଥିତ ବାୟଜୁ କମ୍ପାନୀ ମୋଟ କର୍ମଚାରୀଙ୍କ ସଂଖ୍ୟା ୩୫ ହଜାର । ସେମାନଙ୍କ ମଧ୍ୟରୁ ଏହା ପୂର୍ବରୁ ୧ ହଜାର କର୍ମଚାରୀଙ୍କୁ ଛଟେଇ କରାଯାଇଥିଲା ।

ସୂଚନା ଥାଉକି ଆମେରିକୀୟ ନିବେଶକ ଗତବର୍ଷ ବାୟଜୁ କମ୍ପାନୀରେ ତାଙ୍କର ନିବେଶ କମ୍ କରିଦେଇଥିଲେ । ଆମେରିକା ଏସେଟ ମ୍ୟାନେଜର ବ୍ଲାକରକ ତରଫରୁ ବାୟଜୁର ପାଖାପାଖି ୫୦ ପ୍ରତିଶତ ନିବେଶ ପ୍ରତ୍ୟାହାର କରିନେଇଥିଲେ ଫଳରେ କମ୍ପାନୀର ମୂଲ୍ୟ ୧୧.୫ ଅରବ ଡଲାର ହୋଇଯାଇଥିଲା । ହେଲେ ୨୦୨୨ ଜୁନ ବେଳକୁ କମ୍ପାନୀ ମୋଟ ମୂଲ୍ୟ ୨୨ ଅରବ ଡଲାର ଥିଲା । ଏହି ହିସାବରେ ଦେଖାଗଲେ ଗୋଟିଏ ବର୍ଷରେ କମ୍ପାନୀର ମୂଲ୍ୟ ଅଧା ହୋଇଯାଇଛି ।

ସେପଟେ ଭାରତରେ ବ୍ୟବସାୟ ପାଇଁ କମ୍ପାନୀ ତରଫରୁ ନୂତନ ଭାବେ ନିଯୁକ୍ତ ହୋଇଥିବା ଅର୍ଜୁନ ମୋହନ ଏହା ପୂର୍ବରୁ କମ୍ପାନୀର ବ୍ୟବସାୟ ଅଫିସର ଭାବେ କାର୍ଯ୍ୟ କରୁଥିଲେ । ଏବେ କମ୍ପାନୀର ରିଷ୍ଟ୍ରକଚର ଦାୟିତ୍ୱ ବି ତାଙ୍କ ଉପରେ ଦିଆଯାଇଛି । କମ୍ପାନୀର ପ୍ରତିଷ୍ଠାତା ବାୟଜୁ ରବିନ୍ଦ୍ରନ କହିଛନ୍ତି କି ଅର୍ଜୁନ ମୋହନ କମ୍ପାନୀର ଅଭିଯାନକୁ ଆଗକୁ ନେବାରେ ସଫଳ ହେବେ ।