ସ୍ତ୍ରୀଙ୍କ କାନଫୁଲ ବନ୍ଧାପକାଇ ଋଣରେ କରିଥିଲେ ପରିବା ଚାଷ। ଏବେ ପାଣିରେ ବୁଡିଛି ଅମଳ ହେବାକୁ ଥିବା ଫସଲ।
Kanak News is now on WhatsApp
Join and get latest news updates delivered to you via WhatsApp
କନକ ବ୍ୟୁରୋ: ବନ୍ୟା ଆସି ଚାଷ ଉଜାଡି ଦେବା ପରେ ଅନେକ ଛାତିଥରା କାହାଣୀ ସାମ୍ନାକୁ ଆସୁଛି । ବାଙ୍କୀ ବରହମପୁର ଗାଁର ବେଣୁଧର ପଲେଇଙ୍କ କୋହଭରା କଥାକୁ ଦେଖନ୍ତୁ । ସ୍ତ୍ରୀଙ୍କ କାନଫୁଲ ବନ୍ଧାପକାଇ ୧୦ ହଜାର ଟଙ୍କା ଋଣ ଆଣି ପନିପରିବା ଚାଷ କରିଥିଲେ । ୪ ଏକର ଜମିରେ ବାଇଗଣ. ଭେଣ୍ଡି, ପୋଟଳ ଲଗାଇଥିଲେ । ହେଲେ ମହାନଦୀରେ ବନ୍ୟା ଆସିବାରୁ ତାଙ୍କ ଜମିରେ ଏବେ ୬ ଫୁଟର ପାଣି ଜମିରହିଛି । ଏବେ କେଉଁଠୁ ଟଙ୍କା ଆଣିବେ, ଏବଂ ପରିବାର ଚଳାଇବା ସହ ସ୍ତ୍ରୀଙ୍କ କାନଫୁଲ ମୁକାଳିବେ ତାକୁ ନେଇ ଚିନ୍ତାରେ ପଡିଛନ୍ତି ।
ମାତ୍ର ଚାରି ଦିନ ତଳେ ଯେଉଁ ଚାଷ ଜମି ସୁନାର ଫସଲରେ ହସୁଥିଲା ଆଜି ସେଠି ବେକେ ଉଚ୍ଚର ପାଣି ଛିଡା ହୋଇଛି । ଫସଲ କିଆରି ଉପରେ ଡଙ୍ଗା ଚାଲୁଛି । ଆଉ ପାଣି ଭିତରେ ଦୁଇ ଦିନ ରହିବା ପରେ ପରିବା ଗଛ ପଚିଷଢ଼ି ନଷ୍ଟ ହୋଇଯାଇଛି । ସେହି ସମାନ ଚିତ୍ର ନିଆଳିରେ ଦେଖିବାକୁ ମିଳିଛି । ଦେବୀ ନଦୀରେ ବନ୍ୟା ଆସିବା ପରେ ନିଆଳିରେ ଏମିତି ସ୍ଥିତି ସୃଷ୍ଟି ହୋଇଛି । ଏହି ଦୃଶ୍ୟକୁ ଦେଖି କାନ୍ଦୁଛି ଚାଷୀ ।
ନିଆଳି ଅଞ୍ଚଳର ରୋଜଗାରର ଆଉ ଏକ ପ୍ରମୁଖ ମାଧ୍ୟମ ହେଉଛି ପାନଚାଷ । ହେଲେ ବନ୍ୟା ପାଣି ପଶିଯିବା ଫଳରେ ପାନବରଜ ଏବେ ନଷ୍ଟ ହୋଇଯାଇଛି । ମୂଳ ପଚିଯିବାରୁ ଚାଷୀ ମୁଣ୍ଡରେ ଚଡକ ପଡିଛି ।
ପାରାଦୀପର ପରିବା ଝୁଡି କୁହାଯାଉଥିବା କୁଜଙ୍ଗର ବିଭିନ୍ନ ଅଞ୍ଚଳରେ ନଦୀ ପାଣି ପଶିଯିବାରୁ ନଷ୍ଟ ହୋଇଯାଇଛି ଫସଲ । ପାଣିରେ ବୁଡି ଯାଇଛି ପୋଟଳ, ଜହ୍ନି, ଝୁଡଙ୍ଗ ଭଳି ପନି ପରିବା । ଖୋର୍ଦ୍ଧା ଜିଲ୍ଲାର ଶରଧାପୁରର ବି ସେହି ଭଳି ଚିତ୍ର । ଯୁଆଡେ ଚାହିଁବ ଖାଲି ପାଣି ଆଉ ପାଣି । ଆଉ ପାଣି ତଳେ ବୁଡି ରହିଛି ଫସଲ କିଆରି । ନଷ୍ଟ ହୋଇଯାଇଛି ବିଭିନ୍ନ ପ୍ରକାରର ପନିପରିବା ଗଛ । ଚାରିଆଡୁ ଆସୁଥିବା ଏସବୁ ଦୃଶ୍ୟ ଦେଖିଲେ, ଆଗାମୀ ଦିନରେ ପରିବା ଅଭାବ ଦେଖାଯିବା ସହ ଦର ମଧ୍ୟ ଯଥେଷ୍ଟ ବଢ଼ିବାର ସମ୍ଭାବନା ରହିଛି ।