ଆଶାୟୀ ଅନେକ, ଆସନ ଏକ । ବାଲେଶ୍ୱର ପରେ ତିର୍ତୋଲ ଉପ-ନିର୍ବାଚନକୁ ନେଇ ଛକାପଞ୍ଝା । ଟିକେଟକୁ ନେଇ ବିଜେଡିରେ ଟଣାଓଟଣା । ସାଂସଦ ଏବଂ ପୂର୍ବତନ ବିଧାୟକଙ୍କ ସମର୍ଥକଙ୍କ ତେଜୁଛି ବିବାଦ
କନକ ବ୍ୟୁରୋ : ଉପନିର୍ବାଚନ ପୂର୍ବରୁ ସରଗରମ ହେଉଛି ରାଜନୀତି । ଓଡିଶାର ଦୁଇଟି ବିଧାନସଭା ନିର୍ବାଚନମଣ୍ଡଳିରେ ଉପ ନିର୍ବାଚନ ପାଇଁ ତାରିଖ ଘୋଷଣା ହୋଇନାହିଁ, କିନ୍ତୁ ଟିକେଟ ପାଇବା ପାଇଁ ରାଜନୈତିକ ଗୋଷ୍ଠୀଙ୍କ ମଧ୍ୟରେ ଚାଲିଛି ଛକାପଞ୍ଝା । ଟିକେଟ ପାଇଁ ଏବେ ସବୁ ଦଳରେ ଚାଲିଛି କସରତ ।
Kanak News is now on WhatsApp
Join and get latest news updates delivered to you via WhatsApp
ଯେମିତି ବାଲେଶ୍ୱରରେ ଟିକେଟ ପାଇଁ ଦଳ ଭିତରେ ବିବାଦ ଦେଖାଦେଲାଣି ସେମିତି ଜଗସିଂହପୁରର ତିର୍ତୋଲରେ ମଧ୍ୟ ବିଜେଡିରେ ବିବାଦ ଆରମ୍ଭ ହୋଇଗଲାଣି । ଗୋଟିଏ ପଟେ ଅଛନ୍ତି ସ୍ୱର୍ଗତ ବିଷ୍ଣୁ ଦାସଙ୍କ ସମର୍ଥକ ଏବଂ ଅନ୍ୟପଟେ ଅଛନ୍ତି, ସାଂସଦ ରାଜଶ୍ରୀ ମଲ୍ଲିକଙ୍କ ସମର୍ଥକ । ସେପଟେ ବିଜେପି ଓ କଂଗ୍ରେସରେ ମଧ୍ୟ ଟିକେଟ ପାଇଁ ବିବାଦ ଦେଖା ଦେଲାଣି ।
କିଛି ଦିନ ତଳେ ବିଜେଡିରେ ପ୍ରାର୍ଥୀ ଚୟନକୁ ନେଇ ବିବାଦ ଜୋର ଧରିଥିଲା । ପୂର୍ବତନ ବିଧାୟକ ଜୀବନ ପ୍ରଦୀପ ଦାସ ଓ ପୂର୍ବତନ ସାଂସଦ ରବୀନ୍ଦ୍ର ଜେନାଙ୍କ ମଧ୍ୟରେ ଅସନ୍ତୋଷ ଲାଗି ରହିଥିଲା । ଏହା ମଧ୍ୟରେ ରବିନ୍ଦ୍ର ଜେନା ନିର୍ବାଚନ ଲଢିବେ ନାହିଁ ବୋଲି କହିଥିଲେ । ମିଳିଥିବା ସୂଚନା ଅନୁସାରେ ବାଲେଶ୍ୱର ସଦର ଆସନକୁ ଦୁଇ ଭାଗରେ ବିଭକ୍ତ କରାଯାଇ ୮ ବିଧାୟକଙ୍କୁ ଦାୟିତ୍ୱ ଦିଆଯାଇଛି । ୪ ଜଣଙ୍କୁ ଗ୍ରାମାଂଚଳ ଏବଂ ଆଉ ୪ ଜଣ ସହରାଂଚଳ କଥା ବୁଝିବେ । ଆଉ, ବାଲେଶ୍ୱରର ପୂର୍ବତନ ଜିଲ୍ଲା ସଭାପତି ତଥା ଭୋଗରାଇ ବିଧାୟକ ତଥା ପୁରୁଖା ନେତା ଅନନ୍ତ ଦାସ ନିର୍ବାଚନ ମୋର୍ଚ୍ଚା ସମ୍ଭାଳିବେ ।
ସେହିପରି ଜଗତିସିଂହପୁରରେ ମଧ୍ୟ ଦଳ ଭିତରେ ବିବାଦ ଯୋଗୁଁ ନିକଟରେ ଜିଲ୍ଲା ସଭାପତି ଚୟନ ମଧ୍ୟ ହୋଇପାରିନଥିଲା । ଆଗକୁ ଉପ-ନିର୍ବାଚନ ଥିବାରୁ ଦଳରେ ବିଶୃଙ୍ଖଳାକୁ ଆଖି ଆଗରେ ରଖି ସୁପ୍ରିମୋ ଜଗତସିଂହପୁରରେ କାହାରି ନାଁ ଉପରେ ମୋହର ମାରି ନଥିବା ଚର୍ତ୍ତା ହେଉଛି ।