ନୂଆ ଟ୍ରାଫିକ ନିୟମ କାହା ପାଇଁ ? ବାଇକ୍ ଚାଳକଙ୍କୁ ମୋଟା ଅଙ୍କର ଜରିମାନା, ବସ ଚାଳକଙ୍କୁ ମାଫ୍ । କନକ ନ୍ୟୁଜର ଗ୍ରାଉଣ୍ଡ ରିପୋର୍ଟ ।
କନକ ବ୍ୟୁରୋ : ନୂଆ ଟ୍ରାଫିକ ନିୟମ କାହା ପାଇଁ? ଏହା କଣ କେବଳ ବାଇକ ଓ ଛୋଟ ଗାଡି ପାଇଁ । ଏଭଳି ପ୍ରଶ୍ନ ଏଥିପାଇଁ ଉଠୁଛି କାରଣ, ଯେଉଁଠି ଟ୍ରାଫିକ ନିୟମ ଉଲ୍ଲଂଘନ କଲେ ବାଇକ ଓ ଛୋଟ ଗାଡି ଚାଳକଙ୍କୁ ହଜାର ହଜାର ଟଙ୍କାର ତଣ୍ଡ ଗଣିବାକୁ ପଡୁଛି । ସେଠାରେ ବଡ ବଡ ଗାଡି ଯେପରିକି ଯାତ୍ରୀବାହୀ ବସ ଗୁଡିକ ଟ୍ରାଫିକ ନିୟମର ଖୋଲା ଖୋଲି ଉଲ୍ଲଂଘନ କଲେ ମଧ୍ୟ କାହା ନଜରରେ ଯେମିତି ପଡୁନି । ରାଜଧାନୀର ରାଜରାସ୍ତାରେ ଦିନ ଦ୍ୱିପ୍ରହରରେ ଘରୋଇ ଓ ସରକାରୀ ବସ୍ ଗୁଡିକ ଟ୍ରାଫିକ ନିୟମକୁ ଉଲ୍ଲଂଘନ କରୁଥିଲେ ମଧ୍ୟ ଏମାନଙ୍କୁ ଧରିବା ପାଇଁ ଯେମିତି ସାହସ ଜୁଟାଇ ପାରୁନି ପରିବହନ ବିଭାଗ । ଆଉ ଏସବୁ ଭିତରେ ଗ୍ରାଉଣ୍ଡ ଜିରୋରୁ ଏହାର ସ୍ଥିତି ପରଖିଥିଲା କନକ ନ୍ୟୁଜ୍ । ଭୁବନେଶ୍ୱରରୁ ରାଜ୍ୟର ବିଭିନ୍ନ ଜିଲ୍ଲାକୁ ଯାଉଥିବା ବସରେ ଆମ ପ୍ରତିନିଧି ଯାତ୍ରା କରିବା ସହ ସାମ୍ନାକୁ ଆଣିଛନ୍ତି ବସ ଯାତ୍ରାର ବାସ୍ତବ ଚିତ୍ର ।
ମୋ ବସ୍ ହେଉ ବା ଘରୋଇ ବସ୍ । ପ୍ରତି ବସରେ ଖଚାଖଚ ଭିଡ । ସିଟ୍ ଠାରୁ ଅଧିକ ଲୋକ ବସ୍ ଭିତରେ । ବସ୍ ଭିତରେ ଗୋଟିଏ ପାଦ ଆଗକୁ ପକାଇବାକୁ ବି ଜାଗା ନାହିଁ । ଆଉ ଏହାସତ୍ତେ୍ୱ ମଧ୍ୟ ଅଧିକ ଯାତ୍ରୀ ଉଠାଇବା ଆଶାରେ ମଝି ରାସ୍ତାରେ ଅଟକୁଛି ବସ୍ । ବେଫିକର ଭାବେ ଗୋଟିଏ ପରେ ଗୋଟିଏ ଷ୍ଟପେଜରୁ ଯାତ୍ରୀ ଉଠାଉଛନ୍ତି ବସ୍ କର୍ମଚାରୀ । ଏହି ଦୃଶ୍ୟ ଗୋଟିଏ କିମ୍ବା ଦୁଇଟି ବସର ନୁହେଁ । ବରଂ ରାଜଧାନୀରୁ ବାହାରୁଥିବା ଅଧିକାଂଶ ବସ ଏପରିକି ସରକାରୀ ବସରେ ମଧ୍ୟ ସମାନ ଅବସ୍ଥା । ଏହି ବସକ ଗୁଡିକ ବସିବା କ୍ଷମତା ଠାରୁ ଅଧିକ ଯାତ୍ରୀ ନେଇ ଟ୍ରାଫିକ ନିୟମକୁ ଖୋଲାଖୋଲି ଉଲ୍ଲଂଘନ କରୁଛନ୍ତି । ଆଉ କିଛି ଲାଭ ପାଇବା ଆଶାରେ ଏଭଳି କରି ଯାତ୍ରୀଙ୍କ ଜୀବନକୁ ବିପଦକୁ ଠେଲି ଦେଉଛନ୍ତି ବସ୍ ଚାଳକ ମାନେ । କିନ୍ତୁ ସବୁ ଜାଣିଶୁଣି ମଧ୍ୟ ପରିବହନ ବିଭାଗର ଅଧିକାରୀ ସତେ ଯେମିତି ଆଖିରେ ଆଙ୍ଗୁଳି ଗେଞ୍ଜି ବସିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେବଳ ଯେ ବସ୍ ଗୁଡିକରେ ଧାର୍ଯ୍ୟ କ୍ଷମତାରୁ ଅଧିକ ଯାତ୍ରୀ ଯାଉଛନ୍ତି ତାହା ନୁହେଁ ବରଂ ଅଟୋ ଗୁଡିକରେ ମଧ୍ୟ ମନଇଚ୍ଛା ଯାତ୍ରୀ ଉଠାଯାଉଛି । ବସିବା କ୍ଷମତା ଠାରୁ ଅଧିକ ଯାତ୍ରୀ ନେଲେ ନୂଆ ନିୟମ ଅନୁଯାୟୀ, ପ୍ରତି ଯାତ୍ରୀ ପିଛା ୧୦୦୦ ଟଙ୍କା ଜରିମାନା ଆଦାୟ କରିବାର ନିୟମ ଥିଲେ ମଧ୍ୟ ଏହି ଆଇନକୁ ଭୃକ୍ଷେପ କରୁନାହାନ୍ତି ଗାଡି ଚାଳକ ।