କଳିଙ୍ଗା ଘାଟିରେ ପୁଣି ଏକ ବସ୍ ଦୁର୍ଘଟଣାଗ୍ରସ୍ତ: ସୁରତରୁ ପ୍ରବାସୀ ଓଡିଆଙ୍କୁ ନେଇ ଫେରୁଥିବା ବେଳେ ଦୁର୍ଘଟଣା; ୫ ଯାତ୍ରୀ ଆହତ ହୋଇଥିବା ସୂଚନା
କନକ ବ୍ୟୁରୋ: ପୁଣି ଦୁଃଖଦ ଓ ଅଭାବନୀୟ ଘଟଣା । କନ୍ଧମାଳ ବାଲିଗୁଡ଼ା କଳିଙ୍ଗାଘାଟିରେ ପୁଣି ଏକ ବସ ଦୁର୍ଘଟଣାଗ୍ରସ୍ତ । ଗୁଜୁରାଟର ସୁରତରୁ ପ୍ରବାସୀ ଓଡ଼ିଆଙ୍କୁ ନେଇ ଅମ୍ବିକା ନାମକ ଏକ ବସ୍ ଗଞ୍ଜାମ ଫେରୁଥିବା ବେଳେ ଦୁର୍ଘଟଣାର ଶିକାର ହୋଇଛି । ତେବେ ଏହି ଦୁର୍ଘଟଣାରେ ୫ ଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି । ଆହତ ହୋଇଥିବା ଶ୍ରମିକଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି । ଏହି ବସରେ ମୋଟ୍ ୫୭ଜଣ ଯାତ୍ରୀ ଥିଲେ ଯେଉଁମାନଙ୍କ ମଧ୍ୟରେ ୩ଜଣ ମହିଳା ଅଛନ୍ତି। ତେବେ ଦୁର୍ଘଟଣା କେଉଁ ପରିସ୍ଥିତିରେ ଘଟିଛି ସେ ନେଇ କୌଣସି ସୂଚନା ମିଳିପାରିନାହିଁ । ଖବର ପାଇ ଜି.ଉଦୟଗିରି ପୁଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ଉଦ୍ଧାର କରିବା ସହ ଯାତ୍ରୀମାନଙ୍କୁ ଅନ୍ୟ ଏକ ବସରେ ଗନ୍ତବ୍ୟସ୍ଥଳରେ ପହଞ୍ଚାଇବାର ବନ୍ଦୋବସ୍ତ କରିଥିବା ଜଣାଯାଇଛି।
Kanak News is now on WhatsApp
Join and get latest news updates delivered to you via WhatsApp
ସେପଟେ, ଗଞ୍ଜାମ ଫେରୁଥିବା ଆଉ ଏକ ବସ୍ ଦୁର୍ଘଟଣାଗ୍ରସ୍ତ । ମହାରାଷ୍ଟ୍ର ନାଗପୁର ଅମରବତୀର ଜାତୀୟ ରାଜପଥରେ ଓଲଟିଲା ବସ୍ । ବସରେ ସୁରତରୁ ଗଞ୍ଜାମ ଫେରୁଥିଲେ ପ୍ରବାସୀ ଓଡ଼ିଆ । ଗତକାଲି ରାତିରେ କଳିଙ୍ଗା ଘାଟିରେ ସୁରତରୁ ଫେରୁଥିବା ପ୍ରବାସୀ ଓଡିଆଙ୍କ ବସ ଦୁର୍ଘଟଣାଗ୍ରସ୍ତ ହୋଇଥିଲା । ଏଥିରେ ୨ଜଣଙ୍କ ମୃତ୍ୟୁ ହୋଇଥିଲା ।
ଏଠାରେ ଆମେ କହି ରଖୁଛୁ ଯେ, ଗତକାଲି ରାତିରେ କଳିଙ୍ଗା ଘାଟିରେ ସୁରତରୁ ଫେରୁଥିବା ପ୍ରବାସୀ ଓଡିଆଙ୍କ ବସ ଦୁର୍ଘଟଣାଗ୍ରସ୍ତ ହୋଇ ୨ ଯାତ୍ରୀଙ୍କ ଜୀବନ ଯାଇଥିବାବେଳେ ଜଣେ ଆହତ ହୋଇଥଲେ । ଆହତଙ୍କୁ ବ୍ରହ୍ମପୁର ଏମକେସିଜି ହସ୍ପିଟାଲକୁ ସ୍ଥାନାନ୍ତର କରାଯାଇଛି । ବସ୍ରେ ଥିବା ପ୍ରାୟ ୬୪ ଯାତ୍ରୀଙ୍କୁ ଉଦ୍ଧାର କରାଯାଇଥିଲା । ବସରେ ଥିବା ଯାତ୍ରୀମାନଙ୍କୁ ପୁଲିସ ଓ ଦମକଳବାହିନୀ ଦ୍ୱାରା ଉଦ୍ଧାର କରାଯାଇଛି ଏବଂ ସୁରକ୍ଷିତ ଥିବା ଯାତ୍ରୀମାନଙ୍କୁ ସେମାନଙ୍କ ଗନ୍ତବ୍ୟ ସ୍ଥଳକୁ ପଠାଯାଇଛି । ଘାଟିରେ ଥିବା ଗାର୍ଡୱାଲକୁ ଧକା ଦେବାରୁ ବସଟି ଦୁର୍ଘଟଣା ଗ୍ରସ୍ତ ହୋଇଛି ।
ତାଲାବନ୍ଦ ଯୋଗୁଁ ସୁରତରେ ଅଟକି ରହିଥିବା ପ୍ରବାସୀ ଓଡିଆମାନେ ବସ ଯୋଗେ ନିଜ ନିଜର ଗାଁକୁ ଫେରୁଥିଲେ । ବସଟି ଗନ୍ତବ୍ୟ ସ୍ଥଳରେ ପହଁଚିଥିଲେ ସେମାନେ ସରକାରଙ୍କ ନିର୍ଧାରିତ କ୍ୱାରେଂଟିନ ସେଂଟରରେ ୧୪ ଦିନ ପର୍ଯ୍ୟନ୍ତ ରହିଥାନ୍ତେ । ହେଲେ, ନିଜ ନିଜ ଅଂଚଳରେ ପହଁଚିବା ପୂର୍ବରୁ ଏଭଳି ବସ୍ ଦୁର୍ଘଟଣାଗ୍ରସ୍ତ ହେବା ଖବର ଆସିବା ଲୋକଙ୍କ ମଧ୍ୟରେ ଭୟ ସୃଷ୍ଟି କରିଛି ।