ମୃତ୍ୟୁର ତାର ଫିଙ୍ଗି ଜୀବନ ନେଇଗଲା ଯମ । ଅଧା ବାଟରେ ଅଟକିଗଲା ନୂଆ ସମ୍ପର୍କର ସ୍ୱପ୍ନ । ନିର୍ବନ୍ଧ ପାଇଁ ଯାଉଥିବା ବେଳେ ଦୁର୍ଘଟଣାରେ ଚାଲିଗଲା ନଅ ଜୀବନ…
କନକ ବ୍ୟୁରୋ: ବସ ଭିତରେ ମୃତ୍ୟୁ, ବସ ବାହାରେ ମୃତ୍ୟୁର ପଦଚିହ୍ନ । ଜୀବନ ନେଇ ଯିବା ପରେ ମୃତ୍ୟୁର ପଞ୍ଝାରୁ ଅଳ୍ପକେ ମୁକୁଳି ଯାଇଥିବା ଜୀବନମାନଙ୍କ ଛାତିଥରା ଚିକ୍ରାରରେ ଫାଟି ପଡୁଛି ପୂରା ପରିବେଶ । ବିଦ୍ୟୁତର ନିଆଁରେ ଜଳି ପୋଡି ଛାରଖାର ହୋଇଥିବା ମୃତଦେହର ଭୟଙ୍କର ଚିତ୍ର ଏତେ ଲୋମଟାଙ୍କୁରା ଯେ ଯାହାକୁ ଖାଲି ଆଖିରେ ଦେଖିବା ଅସମ୍ଭବ । କାହାର ପୂରା ଶରୀର ପୋଡି ଯାଇଛି, ତ ଆଉ କାହାର ଦେହହାତରୁ ପୋଡି ଯାଉଥିବାର ଧୂଆଁ ବାହାରୁଛି । ଦୁର୍ଘଟଣା ପରର ଏ କରୁଣ ଚିତ୍ର ଦେଖଣାହାରୀଙ୍କୁ ସ୍ତବ୍ଧ କରିଛି…
Kanak News is now on WhatsApp
Join and get latest news updates delivered to you via WhatsApp
ଆଉ ମାତ୍ର କିଛି କ୍ଷଣ ପରେ ନୂଆ ଏକ ସମ୍ପର୍କ ପାଇଁ ହୋଇଥାନ୍ତା ନିର୍ବନ୍ଧ । ଦୁଇ ପରିବାର ଭିତରେ ଗଢା ହୋଇଥାନ୍ତା ନୂଆ ଏକ ବନ୍ଧୁତ୍ୱ । ସେଥିପାଇଁ ସମସ୍ତେ ହସଖୁସିରେ ଗୋଟିଏ ବସରେ ବାହାରିଥିଲେ କନ୍ୟାଘରକୁ । ବ୍ରହ୍ମପୁର ଡଙ୍ଗଲପାଡୁରୁ ପୁଅଘର, କନ୍ୟାଘର ଚିକରଡାକୁ ଯାତ୍ରା ଆରମ୍ଭ କରିଥିଲେ । ହେଲେ ହଠାତ ଅଧା ବାଟରେ ଉପରୁ ଖସିଲା ମୃତ୍ୟୁ । ରାସ୍ତା ମଝିରେ ଜଗି ବସିଥିବା ଯମ ସମସ୍ତଙ୍କ ମୁହଁରୁ ହସ ଛଡାଇନେଲା । ବାଟ ମଝିରେ ଓହଳିଥିବା ବିଦ୍ୟୁତ ତାର ୯ ଜଣଙ୍କ ଜୀବନ ନେଇଗଲା ।
ଦୁର୍ଘଟଣାରେ ବରର ଦୁଇ ଭଉଣୀ ଏବଂ ଭଣଜା ଆଖି ବୁଜିଥିବା ବେଳେ ବାଟ ମଝିର ବିଦ୍ୟୁତ ଝଟକା ସମସ୍ତଙ୍କୁ ବାକଶୂନ୍ୟ କରିଛି । ସେପଟେ ଦୁର୍ଘଟଣା ପରେ ବସ ଭିତରର ବିକ୍ଷିପ୍ତ ଚିତ୍ର ସମସ୍ତଙ୍କ ଛାତିକୁ ଭାରି ଭାରି କରିଛି । ନିର୍ବନ୍ଧ ପାଇଁ ନେଇ ଯାଉଥିବା କଦଳୀ ଥାଳିରେ ସେମିତି ଥୁଆ ହୋଇଛି । ଗୋଟା ଗୋଟା ନଡିଆ ଏତେତେଣେ ଗଡୁଛି ଆଉ ସମ୍ପର୍କର ମିଠା ମୁହଁମାଡି ପଡିଛି । କନ୍ୟା ପାଇଁ ନେଇ ଯାଉଥିବା ଶାଢି ବି ପୋଡି ଯାଇଛି ।
ସେପଟେ ବର ଘରକୁ ଅପେକ୍ଷା କରିଥିବା କନ୍ୟାପକ୍ଷଙ୍କୁ ଅପ୍ରତ୍ୟାଶିତ ଖବର ଅସ୍ତବ୍ୟସ୍ତ କରିଛି । ନିର୍ବନ୍ଧ ପାଇଁ ଚାହିଁ ବସିଥିବା ଝିଅ ଆଖିରୁ ଲୁହ ନିଗାଡୁଛି ଆଉ ପରିବାର ଲୋକ ନିର୍ବାକ ହୋଇଛନ୍ତି । ତେବେ ଦୁର୍ଘଟଣାରେ ଆଖିବୁଜିଥିବା ଡଙ୍ଗଲପାଡୁ ଗାଁ ଲୋକଙ୍କ ଶେଷରେ ଶ୍ମଶାନରେ ଏକାଠି ଜୁଇ ଜଳିଛି …