ଜାଲିଆନାୱାଲାବାଗ ହତ୍ୟାକାଣ୍ଡକୁ ଆଜି ୧୦୦ ବର୍ଷ ପୁରିଲା ! ଆଜିର ଦିନରେ ୩୭୯ ନିରୀହଙ୍କ ରକ୍ତରେ ହୋଲି ଖେଳିଥିଲା ଜେନେରାଲ୍ ଡାୟାର୍ ।
ଆଜି ଏପ୍ରିଲ୍ ୧୩ ତାରିଖ , ୨୦୧୯ । ଆଜକୁ ୧୦୦ ବର୍ଷ ପୂର୍ବେ ଏପ୍ରିଲ୍ ୧୩ , ୧୯୧୯ ରେ ଏଭଳି କିଛି ହୋଇଥିଲା ଯେଉଁଥିରେ ସମ୍ପୁର୍ଣ୍ଣ ଦେଶର ଆତ୍ମା କାନ୍ଦି ଉଠିଥିଲା । ଜାଲିୱାଲାବାଗ୍ ହତ୍ୟାକାଣ୍ଡକୁ ୧୦୦ ବର୍ଷ ପୂର୍ତ୍ତି ହୋଇଯାଇଥିଲେ ମଧ୍ୟ ଏହି ବିଭତ୍ସ ହତ୍ୟାକାଣ୍ଡର ଚିତ୍ର ଆଜି ପର୍ଯ୍ୟନ୍ତ ଇତିହାସର କଳା ଦିବସ ରୁପେ ସାଇତା ହୋଇରହିଛି । ଏହି ହତ୍ୟାକାଣ୍ଡର ମୁଖ୍ୟ ଦୋଷୀ ଥିଲେ ବ୍ରିଗେଡିୟର୍ ଜେନେରାଲ୍ ରେଜିନାଲ୍ଡ ଡାୟାର୍ ଏବଂ ଲେଫ୍ଟିନାଣ୍ଟ୍ ଗଭର୍ଣ୍ଣର ମାଇକେଲ୍ ଓ ଡାୟାର । ୧୯୨୭ରେ ଗମ୍ଭୀର ରୋଗ କାରଣରୁ ରେଜିନାଲ୍ଡ ଡାୟାରଙ୍କ ମୃତ୍ୟୁ ହୋଇଯାଇଥିଲା । କିନ୍ତୁ ମାଇକେଲ୍ ଡ୍ରାୟାର ଜିବିତ ଥିଲେ ଏବଂ ବ୍ରିଟେନ୍ ଫେରି ଆସିଥିଲେ । କିନ୍ତୁ ଜଣେ ଯୁବକ ୨୧ ବର୍ଷ ପରେ ମଧ୍ୟ ତାଙ୍କ ପିଛା କରୁଥିଲେ ଏବଂ ଏକ ଜନଗହଳି ପୂର୍ଣ୍ଣ ହଲରେ ତାଙ୍କୁ ଗୁଳି ମାରି ଜାଲିୱାନାବାଗ୍ ହତ୍ୟାକାଣ୍ଡର ପ୍ରତିଶୋଧ ନେଇଥିଲେ । ସେ ଯୁବକ ଜଣକ ଥିଲେ ଉଦ୍ଧମ ସିଂହ ।
Kanak News is now on WhatsApp
Join and get latest news updates delivered to you via WhatsApp
ଜାଲିୱାଲାବାଗ୍ ହତ୍ୟାକାଣ୍ଡ ବ୍ରିଟିଶ୍ ଇତିହାସର ସେହି ବଦନାମ୍ ଦାଗ ଯାହାର ଚର୍ଚ୍ଚା ମାତ୍ରେ ଆଜି ବି ଇଂରେଜଙ୍କ ମୁଣ୍ଡ ତଳକୁ ନଇଁଯାଏ । ବ୍ରିଟେନ୍ ପ୍ରଧାନମନ୍ତ୍ରୀ ଥେରେସା ମେନେ ଏପ୍ରିଲ୍ ୧୦ ତାରିଖରେ ଏହି ଘଟଣା ପାଇଁ ପଶ୍ଚାତାପ ପ୍ରକଟ କରିଥିଲେ । ୧୯୧୯ ମସିହା ଏପ୍ରିଲ୍ ୧୩ ତାରିଖ ବୈଶାଖୀ (ଶିଖ୍ ଧର୍ମାବଲମ୍ବୀଙ୍କ ପର୍ବ) ସମୟରେ ପଞ୍ଜାବ ସମେତ ଭାରତର ଭିନ୍ନ ଭିନ୍ନ ସ୍ଥାନରୁ ଶ୍ରଦ୍ଧାଳୁ ବୈଶାଖୀ ପାଳନ କରିବା ପାଇଁ ଅମୃତସର ପହଂଚିଥିଲେ । ଅମୃତସରରେ ଗୋଟିଏ ଦିନ ପୂର୍ବରୁ ହିଁ ବ୍ରିଟିଶ୍ ସରକାର କର୍ଫୁ ଲଗାଇ ଦେଇଥିଲେ । ସରକାର ଘୋଷଣା କରିଥିଲେ ଯେ ଲୋକମାନେ କେଉଁଠି ଏକାଠି ରହିପାରିବେ ନାହିଁ । କିନ୍ତୁ ବୈଶାଖୀ ଦିନ ସ୍ୱର୍ଣ୍ଣ ମନ୍ଦିରରେ ଦର୍ଶନ ପରେ ଶ୍ରଦ୍ଧାଳୁ ଜାଲିୱାନାବାଗ୍ ଠାରେ ମିଶିଥିଲେ । କିଛି ସମୟ ମଧ୍ୟରେ ସେଠାରେ ହଜାର ସଂଖ୍ୟକ ଭିଡ଼ ଏକାଠି ହୋଇଥିଲା ।
ଉକ୍ତ ସମୟରେ ଜେନେରାଲ୍ ଡାୟାର୍ କୌଣସି ଚେତାବନୀ ନ ଦେଇ କେବଳ ଫାୟାର୍ ବୋଲି କହିଥିଲେ । ଏହାପରେ ଚାଲିଥିଲା ଆଖିବୁଜା ଗୁଳିବର୍ଷଣ । କେହି କିଛି ବୁଝିବା ପୂର୍ବରୁ ନିମିଶକେ ବୋହିଗଲା ରକ୍ତର ନଦୀ । ଗୁଳିରୁ ବଂଚିବା ପାଇଁ ମହିଳାମାନେ ସେଠାରେ ଥିବା ଗୋଟିଏ କୂଅକୁ ଡେଇଁ ପଡିଥିଲେ । ଫାୟାରିଙ୍ଗ୍ ବନ୍ଦ ହେବା ପରେ ଏହି କୂଅରୁ ୧୨୦ ଟି ଶବ ବାହାର କରାଯାଇଥିଲା । କିଛି ଲୋକ କାନ୍ଥ ଡେଇଁ ବାହାରକୁ ଯିବାକୁ ଚେଷ୍ଟା କରିଥିଲେ କିନ୍ତୁ ଗୁଳିରୁ ବଂଚିବା ତାଙ୍କ ପାଇଁ କଷ୍ଟ ହୋଇଗଲା । ଆଜି ପର୍ଯ୍ୟନ୍ତ ଗୁଳିର ଚିହ୍ନ ସେଠାକାର କାନ୍ଥରେ ରହିଛି ।
ଇଟାର କାନ୍ଥରେ ୧୦୦ ବର୍ଷ ପୂର୍ବେ ବାଜିଥିବା ଏହି ଗୁଳିର ଚିହ୍ନ ଧିରେ ଧିରେ କ୍ଷୟ ହେବାକୁ ଲାଗିଲାଣି । ୧୦ ମିନିଟ୍ ପର୍ଯ୍ୟନ୍ତ ଚାଲିଥିବା ଏହି ଲୋମଟାଙ୍କୁରା ଘଟଣାରେ ୧୬୫୦ ରାଉଣ୍ଡ ଗୁଳି ବର୍ଷା ହୋଇଥିଲା । ବ୍ରିଟିସ୍ ସରକାର ମୁତାବକ ଏହି ହତ୍ୟାକାଣ୍ଡରେ ୩୭୯ ଜଣ ଲୋକ ଇହଲୀଳା ସମ୍ଭରଣ କରିଥିବା ବେଳେ ୧୨୦୦ ଲୋକ ଗୁରୁତର ଆହତ ହୋଇଥିଲେ । ମୃତକଙ୍କ ମଧ୍ୟରେ ବୃଦ୍ଧ,ମହିଳା,ଶିଶୁ,ଯୁବକ ସବୁବର୍ଗର ଲୋକ ଥିଲେ ।