ପ୍ରଧାନମନ୍ତ୍ରୀ ପଦରେ ଅବସ୍ଥାପିତ ହେବା ପରେ ୟୁକ୍ରେନକୁ ସମର୍ଥନ ଜଣାଇଲେ ଋଷି ସୁନକ, ଜାଣନ୍ତୁ କଣ ପ୍ରତିକ୍ରିୟା ରଖିଲା ଋଷ

କନକ ବ୍ୟୁରୋ : ବ୍ରିଟେନର ପ୍ରଧାନମନ୍ତ୍ରୀ ଋଷି ସୁନକ ପଦଭାର ସମ୍ଭାଳିବା ପରେ ତୁରନ୍ତ ୟୁକ୍ରେନ ସହ କଥା ହୋଇଛନ୍ତି । ଋଷ ଓ ୟୁକ୍ରେନ ମଧ୍ୟରେ ମାସ ମାସ ଧରି ଚାଲିଥିବା ଯୁଦ୍ଧ ପ୍ରସଙ୍ଗରେ ଋଷି ସୁନକ ୟୁକ୍ରେନର ରାଷ୍ଟ୍ରପତି ଭୋଲଦିମିର ଜେଲେନସ୍କିଙ୍କ ସହ କଥା ହୋଇଛନ୍ତି । ଏହି ଆଲୋଚନା ବେଳେ ସୁନକ ତାଙ୍କର ସମର୍ଥନ ଜଣାଇଛନ୍ତି । ସେପଟେ ସୁନକଙ୍କର ଏଭଳି ପଦକ୍ଷେପକୁ ଗ୍ରହଣ କରିପାରି ନାହିଁ ଋଷ । ଋଷ କହିଛି କି ବ୍ରିଟେନ ସହ ଋଷର ଆଗକୁ ଭଲ ସଂପର୍କ ରହିବ ତାହା ଜଣାପଡୁନାହିଁ ।

ସମାଚାର ଏଜେନ୍ସି ଏଏନଆଇ ମୁତାବକ ଋଷି ସୁନକ ଏକ ଟ୍ୱିଟ୍ କରି ଲେଖିଛନ୍ତି କି, ଆଜି ସନ୍ଧ୍ୟାରେ ୟୁକ୍ରେନ ରାଷ୍ଟ୍ରପତି ଭୋଲଦିମିର ଜେଲେନସ୍କିଙ୍କ ସହ କଥା ହେବାର ସୌଭାଗ୍ୟ ମିଳିଲା । ଏହାସହ ୟୁକ୍ରେନର ନେତୃତ୍ୱ ବ୍ରିଟେନ ଉପରେ ଭରସା କରିଥିବା କଥା ସେ ଲେଖିଛନ୍ତି । ବ୍ରିଟେନ ସବୁବେଳେ ୟୁକ୍ରେନ ସହ ଠିଆ ହୋଇଥିବା କଥା ସୁନକ ତାଙ୍କ ଟ୍ୱିଟରରେ ଲେଖିଛନ୍ତି ।

ଏଭଳି କଥାକୁ ନେଇ କ୍ରେମଲିନର ପ୍ରବକ୍ତା ଦିମିତ୍ରର ପେସକୋବ କହିଛନ୍ତି ଯେ ବର୍ତମାନ କିମ୍ବା ନିକଟ ଭବିଷ୍ୟତରେ ବ୍ରିଟେନ ସହ ଋଷର କିଛି ସକରାତ୍ମକ ପରିବର୍ତନ ହେବାର ଆଶଂକା ନାହିଁ ।
କହିରଖୁ କି ସୁନକ ପ୍ରଧାନମନ୍ତ୍ରୀ ହେବା ପୂର୍ବରୁ ୟୁକ୍ରେନର ସ୍ୱତନ୍ତ୍ରତା ଦିବସରେ ଏକ ଚିଠି ଲେଖିଥିଲେ । ଯେଉଁଥିରେ ସେ ୟୁକ୍ରେନବାସୀଙ୍କ ଦୃଢ ସାହସକୁ ପ୍ରଶାଂସା କରିଥିଲେ । ଏହାସହ ବ୍ରିଟେନ ଓ ୟୁକ୍ରେନ ଆଜୀବନ ବନ୍ଧୁ ରହିବେ ବୋଲି ସୁନକ ଲେଖିଥିଲେ ।