ବ୍ରିଟେନରେ ଭୟଙ୍କର ସ୍ଥିତି । ଖାଲି ପଡିଛି ପେଟ୍ରୋଲ ପମ୍ପ, ସୁପରମାର୍କେଟରୁ ଖାଲି ହାତରେ ଫେରୁଛନ୍ତି ଲୋକେ ।
କନକ ବ୍ୟୁରୋ : ବ୍ରିଟେନରେ ଏବେ ପେଟ୍ରୋଲ ସଙ୍କଟ ଦେଖିବାକୁ ମିଳିଛି । ଅଧିକାଂଶ ପେଟ୍ରୋଲ ପମ୍ପ ଏବେ ସମ୍ପୂର୍ଣ୍ଣ ଖାଲି ପଡିଛି । ଆଉ ଯେଉଁଠି ପେଟ୍ରୋଲ ମିଳୁଛି ସେଠାରେ ଭିଡ଼ ଅସମ୍ଭାଳ । ହଜାର ହଜାର ଲୋକ ପେଟ୍ରୋଲ ପମ୍ପରେ ଭିଡ଼ କରୁଥିବାର ଦେଖିବାକୁ ମିଳୁଛି । ଯାହା ପୁଣିଥରେ ବ୍ରିଟେନରେ କରୋନା ବ୍ୟାପିବାର ବଡ କାରଣ ହୋଇପାରେ । ତେଣୁ ଏସବୁକୁ ଦୃଷ୍ଟିରେ ରଖି ପେଟ୍ରୋଲ ପମ୍ପରେ ସେନା ଯବାନଙ୍କୁ ମୁତୟନ କରିବାକୁ ପ୍ରଧାନମନ୍ତ୍ରୀ ବୋରିସ ଜନସନ ବିଚାର କରୁଥିବା ନେଇ ଖବର ପ୍ରକାଶ ପାଇଛି । ଲୋକଙ୍କ ଭିଡ ନିୟନ୍ତ୍ରଣ କରିବାକୁ ପେଟ୍ରୋଲ ପମ୍ପରେ ସେନା ମୁତୟନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ବିଭିନ୍ନ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ବିଟ୍ରେନରେ ଗତ କିଛି ଦିନ ହେବ ପେଟ୍ରୋଲର ଭୟଙ୍କର ଅଭାବ ଦେଖିବାକୁ ମିଳିଛି । ସ୍ଥିତି ଏମିତି ହୋଇଛି ଯେ, ୯୦ ପ୍ରତିଶତ ପେଟ୍ରୋଲ ପମ୍ପରେ ତେଲ ନାହିଁ । ଯେଉଁଥିପାଇଁ ଲୋକେ ଆଗୁଆ ଆବଶ୍ୟକତା ଠାରୁ ଅଧିକ ପେଟ୍ରୋଲ କିଣିବା ପାଇଁ ବିଭିନ୍ନ ପେଟ୍ରୋଲ ପମ୍ପରେ ଭିଡ଼ ଜମାଉଛନ୍ତି । ଯାହାକୁ ନିୟନ୍ତ୍ରଣ କରିବା ପୋଲିସ ପକ୍ଷେ ସମ୍ଭବ ହେଉନାହିଁ, ତେଣୁ ସେନାର ସହାୟତା ନେବାକୁ ପ୍ରଧାନମନ୍ତ୍ରୀ ଅଣ୍ଟା ଭିଡ଼ିଥିବା କୁହାଯାଉଛି ।
ବ୍ରିଟେନରେ ହଠାତ୍ ଏମିତି ପେଟ୍ରୋଲ ସଙ୍କଟ ଦେଖା ଦେବା ପଛର ସବୁଠୁ ବଡ କାରଣ ହେଉଛି ଡ୍ରାଇଭରଙ୍କ ଅଭାବ । ଯେଉଁଥିପାଇଁ ପେଟ୍ରୋଲ ସପ୍ଲାଏ ଚେନ୍ ସମ୍ପୂର୍ଣ୍ଣ ଭୁଷୁଡି ପଡିଛି । ରିଫାଇନାରୀରୁ ପେଟ୍ରୋଲ ପମ୍ପ ପାଖରେ ପେଟ୍ରୋଲ ପହଞ୍ଚାଇବାକୁ ମଧ୍ୟ ଡ୍ରାଇଭର ମିଳୁନାହାନ୍ତି । ଯାହାର ପ୍ରଭାବରେ ପେଟ୍ରୋଲ ପମ୍ପ ଖାଲି ପଡୁଛି । କେବଳ କିଛି ସ୍ଥାନରେ ନୁହେଁ ପୂରା ବ୍ରିଟେନରେ ଏବେ ଏଭଳି ସ୍ଥିତି ଉପୁଜିଛି । ଲୋକେ ପେଟ୍ରୋଲ ପାଇଁ ପରସ୍ପର ସହ ଝଗଡା କରୁଛନ୍ତି । ସରକାର ପେଟ୍ରୋଲ ସଙ୍କଟକୁ ନେଇ କହିଛନ୍ତି, ଦେଶରେ ଯେଉଁ ଅବସ୍ଥା ରହିଛି ଗଣମାଧ୍ୟମ ତାହାକୁ ଅଧିକ କରି ଦେଖାଉଛି । ଆଉ ଏହି ସଙ୍କଟକୁ ଦୂର କରିବାକୁ ବୋରିସ ସରକାର ଟ୍ରକ ଡ୍ରାଇଭରଙ୍କ ପାଇଁ ଅସ୍ଥାୟୀ ଭିସା ଜାରି କରିପାରନ୍ତି । ଯାହାଦ୍ୱାରା ଟ୍ରକ ଚାଳକ ଓ ଶ୍ରମିକଙ୍କ ସଙ୍କଟ ଦୂର କରାଯାଇପାରିବ । ତେଣୁ ଖୁବଶୀଘ୍ର ୫୦୦୦ ବିଦେଶୀ ଡ୍ରାଇଭରଙ୍କ ପାଇଁ ଜରୁରୀକାଳୀନ ଭିସା ଜାରି କରିବାକୁ ଅନୁମତି ଦେଇପାରନ୍ତି ବ୍ରିଟେନ ସରକାର ।
କେବଳ ପେଟ୍ରୋଲ ପମ୍ପ ନୁହେଁ ବରଂ ବଡ ବଡ ସୁପରମାର୍କେଟରେ ମଧ୍ୟ ସମାନ ଅବସ୍ଥା । ସୁପରମାର୍କେଟକୁ ଠିକ୍ ସମୟରେ ସାମଗ୍ରୀ ପହଞ୍ଚୁନଥିବାରୁ ଲୋକଙ୍କୁ ଖାଲି ହାତରେ ଫେରିବାକୁ ପଡୁଛି । ପୂର୍ବରୁ ଟ୍ରକ ଡ୍ରାଇଭରଙ୍କ ଅଭାବ ନେଇ ସରକାରଙ୍କୁ ଚେତାଇ ଦିଆଯାଇଥିଲେ ମଧ୍ୟ ସରକାର ଏହାକୁ ଏତେଟା ଗୁରୁତ୍ୱ ଦେଇନଥିଲେ । ଏବେ ଦେଶରେ ୧ ଲକ୍ଷରୁ ଅଧିକ ଡ୍ରାଇଭରଙ୍କର ଆବଶ୍ୟକତା ରହିଛି । ଯାହାଦ୍ୱାରା ପେଟ୍ରୋଲ ପମ୍ପ ଓ ସୁପରମାର୍କେଟର ଡିମାଣ୍ଡ ପୂରା କରାଯାଇପାରିବ ।