ପୋଲ ଉପରେ ଜୀବନ, ପୋଲ ତଳେ ମୃତ୍ୟୁ ! ବିପଦପୂର୍ଣ୍ଣ ପୋଲକୁ ନେଇ ଭୟଭୀତ ଲୋକେ । କଟକ ମଙ୍ଗୁଳିଛକକୁ ସଂଯୋଗ କରୁଥିବା ବିରୂପା ପୋଲରେ ଭାଙ୍ଗି ଯାଇଛି ସୁରକ୍ଷାବାଡ । ଅଘଟଣ ଆଶଙ୍କାରେ ଲୋକେ ।
କନକ ବ୍ୟୁରୋ: ଭାଙ୍ଗି ଗଲାଣି ପୋଲର ସୁରକ୍ଷା ବାଡ଼ । ରାସ୍ତାରେ ଉପରେ ମୃତ୍ୟୁର ଗାଡ଼ । ପ୍ରତିଦିନ ୧୬ ନମ୍ବର ଜାତୀୟ ରାଜପଥ ଦେଇ ହଜାର ହଜାର ଯାନବାହନ ଚଳାଚଳ କରେ । କାରଣ ରାଜ୍ୟର ପ୍ରମୁଖ ସହର ବା ରାଜ୍ୟବାସୀଙ୍କ ଦୁଇଟି ଜୀବନ ରେଖା ହେଉଛି କଟକ ଆଉ ଭୁବନେଶ୍ୱର । କିଏ ଏଠାକୁ ଚାକିରି କରିବାକୁ ଆସେ ତ ପୁଣି କିଏ ବ୍ୟବସାୟ ଏବଂ ସରକାରୀ କାମରେ ଆସନ୍ତି । ହେଲେ ଯାତ୍ରୀଙ୍କ ଏହି ଯାତ୍ରା ବିପଦମୁକ୍ତ ନାଁ ବିପଦ ଯୁକ୍ତ ତାହା ତାହା କହିବା ଭାରି କଷ୍ଟ । କାରଣ ପୋଲର ବାଡ ଭାଙ୍ଗି ଯାଇଥିବାରୁ ଏବେ ମୃତ୍ୟୁ ହାତ ଠାରି ଡାକୁଛି । ଗାଡି ଚଳାଇବାରେ ଟିକେ ଏପଟେ ସେପଟ ହେଲେ ସିଧା ପୋଲ ତଳକୁ ଖସିବା ସାର ।
Kanak News is now on WhatsApp
Join and get latest news updates delivered to you via WhatsApp
ତେବେ କଟକ ଜଗତପୁରରୁ ମଙ୍ଗୁଳିକୁ ସଂଯୋଗ କରୁଥିବା ବିରୂପା ପୋଲର ସ୍ଥିତି ଅତି ଦୟନୀୟ କହିଲେ ବିଲକୁଲ୍ ଭୁଲ ହେବ ନାହିଁ । ପୋଲ ଦିନକୁ ଦିନ ଦୁର୍ବଳ ହୋଇଯାଉଥିବା ବେଳେ ପୋଲର ସୁରକ୍ଷା ବାଡ ଭାଙ୍ଗି ଯାଇଛି । ପୋଲରେ ୧୫ରୁ ୨୦ ଫୁଟ ଲମ୍ବ ଯାଏଁ ସୁରକ୍ଷାବାଡ ଭାଙ୍ଗି ଯାଇଛି । କେତେବେଳେ ଯେ, କଣ ଘଟିବ ତାହା କହି ହେବ ନାହିଁ ।
୨୦ ନଭେମ୍ବର ୨୦୧୮ରେ ଜଗତପୁର ମହାନଦୀ ପୋଲର ସୁରକ୍ଷା ଭାଙ୍ଗି ତଳକୁ ଖସିପଡିଥିଲା ବସ । ଆଉ ସେଦିନର ସେହି ଘଟଣା ପରେ ଦୁର୍ଘଟଣା ସ୍ଥଳରେ ଲୁହା ରେଲିଂ ଲଗାଇ ଦାୟିତ୍ୱ ସାରିଦେଇଥିବା ଜାତୀୟ ରାଜପଥ କର୍ତୃପକ୍ଷ ବିରୂପା ସେତୁ ଉପରେ ନଜର ଦେଉନାହାଁନ୍ତି । ଏଥିପାଇଁ ରାସ୍ତା ମରାମତି ଦାୟିତ୍ୱରେ ଥିବା ଘରୋଇ ଠିକା ସଂସ୍ଥାକୁ ଦାୟୀ କରୁଛନ୍ତି ଜାତୀୟ ରାଜପଥ କର୍ତୃପକ୍ଷ । ସେପଟେ ରାଜପଥର ଦୂରାବସ୍ତା ନେଇ ଜାତୀୟ ରାଜପଥ କର୍ତୃପକ୍ଷ, ଆରଡିସି ଓ କଟକ ଜିଲ୍ଲାପାଳଙ୍କୁ ଜଣାଇଥିବା କହିଛନ୍ତି କଟକ-ଚୌଦ୍ୱାର ପୂର୍ବତନ ବିଧାୟକ ପ୍ରଭାତ ବିଶ୍ୱାଳ ।
ଶ୍ରୀ ଜଗନ୍ନାଥ ଏକ୍ସପ୍ରେସ ନାମକ ଘରୋଇ ଠିକା ସଂସ୍ଥା, ୨୬ ବର୍ଷ ଯାଏଁ କଟକ ଗୋପାଳପୁରରୁ କଟକ-ଗୋବିନ୍ଦପୁର ପର୍ଯ୍ୟନ୍ତ ୩୯ କିଲୋମିଟର ଜାତୀୟ ରାଜପଥର ରକ୍ଷଣାବେକ୍ଷଣ ଦାୟିତ୍ୱ ନେଇଛି । ଆଉ ଏହି ରାସ୍ତାରେ ରହିଛି ମଙ୍ଗୁଳି ଟୋଲ ଗେଟ୍ । ଯେଉଁଠୁ ପ୍ରାୟ ଲକ୍ଷାଧିକ ଟଙ୍କା ରୋଡ ଟ୍ୟାକ୍ସ ଆଦାୟ ହେଉଛି । ଏହି ଟଙ୍କାରେ ଜାତୀୟ ରାଜପଥ ମରାମତି କରାଯିବାର ନିୟମ ରହିଛି । ହେଲେ ରାସ୍ତା ମରାମତି କିଭଳି ହେଉଛି, ତାହା ଏହି ଦୃଶ୍ୟ ବୟାନ କରୁଛି ।