ବିଶ୍ୱ କରୁଛି କରୋନା ମୁକାବିଲା: ହାଇଡ୍ରୋକ୍ସି କ୍ଲୋରକୁଇନକୁ କରୋନାର ସଞ୍ଜିବନୀ କହିଲେ, ମହାମାରୀ ମୁକାବିଲା ପାଇଁ ସହଯୋଗ କରିବାକୁ ମୋଦିଙ୍କୁ ଅନୁରୋଧ କଲେ ବ୍ରାଜିଲ୍ ରାଷ୍ଟ୍ରପତି ।
କନକ ବ୍ୟୁରୋ: ତ୍ରେତୟା ଯୁଗରେ ଲଷ୍ମଣଙ୍କ ଜୀବନ ବଂଚାଇବା ପାଇଁ ହିମାଳୟରୁ ସଞ୍ଜୀବନି ବୁଟି ଆଣିଥିଲେ ହନୁମାନ । ଏହାପରେ ସୁସ୍ଥ ହୋଇଯାଇଥିଲେ ଲଷ୍ମଣ । ଏବେ ସାରା ବିଶ୍ୱକୁ ଘାରିଛି ମହାମାରୀ କରୋନା ଭୟ । ଆଉ ଏଭଳି ସଙ୍କଟଜନକ ସ୍ଥିତିରେ କରୋନାର ଗେମଚେଂଜର କୁହାଯାଉଥିବା ହାଇଡ୍ରୋକ୍ସିକ୍ଲୋରୋକ୍ୱିନ୍କୁ ପୁରାଣର ସଂଜୀବନି ସହ ତୁଳନା କରିଛନ୍ତି ବ୍ରାଜିଲ ରାଷ୍ଟ୍ରପତି ଜାୟର ବୋଲସୋନାରୋ ।
Kanak News is now on WhatsApp
Join and get latest news updates delivered to you via WhatsApp
ମହାମାରୀ କରୋନା କବଳରେ ପଡିଥିବା ବ୍ରାଜିଲ, ଆକ୍ରାନ୍ତଙ୍କ ଚିକିତ୍ସା ପାଇଁ ଭାରତକୁ ମାଲେରିଆର ଔଷଧ ହାଇଡ୍ରୋକ୍ସିକ୍ଲୋରୋକ୍ୱିନ୍ ଦେବାକୁ ଅନୁରୋଧ କରିଥିଲେ । ଭାରତ ପକ୍ଷରୁ ଏହି ଔଷଧ ଯେଗାଇଦିଆଯିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖି ଧନ୍ୟବାଦ ଜଣାଇଛନ୍ତି ରାଷ୍ଟ୍ରପତି ବୋଲସୋନାରୋ ।
ମୋଦିଙ୍କୁ ବ୍ରାଜିଲ ରାଷ୍ଟ୍ରପତି କହିଛନ୍ତି, ସଞ୍ଜୀବନି ଭଳି ଏହି ଔଷଧ କରୋନା ଆକ୍ରାନ୍ତଙ୍କ ଚିକିତ୍ସାରେ ବ୍ୟବହାର କରାଯିବ ଏବଂ ସେ ଆଶା କରୁଛନ୍ତି ଯେ, ଆକ୍ରାନ୍ତମାନେ ଶୀଘ୍ର ସୁସ୍ଥ ହୋଇଯିବେ । ଭାରତ ଏବଂ ବ୍ରାଜିଲ ମିଳିିତ ଭାବେ ଏହି ସଙ୍କଟର ସାମ୍ନା କରିବେ ବୋଲି କହିଛନ୍ତି ବ୍ରାଜିଲ ରାଷ୍ଟ୍ରପତି ।
କରୋନାର ଚିକିତ୍ସା କ୍ଷେତ୍ରରେ ହାଇଡ୍ରୋକ୍ସିକ୍ଲୋରୋକ୍ୱିନକୁ ବିଶ୍ୱର ଅନେକ ଦେଶ ଔଷଧ ଭାବେ ବ୍ୟବହାର କରୁଛନ୍ତି । ଭାରତର ୯ଟି ସ୍ଥାନରେ ଏହି ଔଷଧ ତିଆରି ହେଉଛି । ତେଣୁ ଏହି ଔଷଧର ରପ୍ତାନୀ ପାଇଁ ବିଶ୍ୱର ୩୦ରୁ ଅଧିକ ଦେଶ ପ୍ରଧାନମନ୍ତ୍ରୀ ମୋଦିଙ୍କୁ ଅନୁରୋଧ କରିଛନ୍ତି । ଏହା ପୂର୍ବରୁ ଆମେରିକାର ଅନୁରୋଧରେ ଭାରତ, ହାଇଡ୍ରୋକ୍ସିକ୍ଲୋରୋକ୍ୱିନ ପଠାଇଥିବାରୁ ପ୍ରଧାନମନ୍ତ୍ରୀ ମୋଦିଙ୍କୁ ମହାନ ନେତା କହିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ।