ବ୍ରଜରାଜନଗର ଉପନିର୍ବାଚନ : ପରାଜୟ ପରେ ବି କଂଗ୍ରେସ ଭିତରେ ଖୁସିର ଲହର, ଦ୍ୱିତୀୟ ସ୍ଥାନରେ ରହିବା ପରେ ପିସିସି ସଭାପତିଙ୍କ ପ୍ରତିକ୍ରିୟା
କନକ ବ୍ୟୁରୋ : ଶୁକ୍ରବାର ବ୍ରଜରାଜନଗର ଉପନିର୍ବାଚନର ଫଳାଫଳ ଘୋଷଣା ହୋଇଛି । ଫଳାଫଳ ମୁତାବକ ପୁଣିଥରେ ବିଜେଡି ଏହି ଆସନରେ ୬୭ ହଜାରରୁ ଅଧିକ ଭୋଟରେ ବିଜୟୀ ହୋଇଛି । ବିଜେଡି ପ୍ରାର୍ଥୀନି ଅଳକା ମହାନ୍ତି ତାଙ୍କ ନିକଟତମ ପ୍ରତିଦ୍ୱନ୍ଦୀ କଂଗ୍ରେସର କିଶୋର ପଟେଲଙ୍କୁ ପରାଜିତ କରିଛନ୍ତି । ଗୋଟିଏ ପଟେ ବିପୁଳ ପରିମାଣର ଭୋଟରେ ବିଜୟୀ ହୋଇ ବିଜେଡି ଉତ୍ସବ ପାଳନ କରୁଥିବା େବେଳ ଦ୍ୱିତୀୟ ସ୍ଥାନରେ ରହିବାକୁ ନେଇ କଂଗ୍ରେସ ବି ଖୁସି ଅଛି । କାରଣ ବ୍ରଜରାଜନଗର ଆସନରୁ ପୂର୍ବରୁ ବିଧାୟିକା ଥିବା ରାଧାରାଣୀ ପଣ୍ଡା ଚଳିତ ନିର୍ବାଚନରେ ବିଜେପି ଟିକେଟରୁ ପ୍ରାର୍ଥୀ ହୋଇଥିଲେ ବି ସେ ତୃତୀୟ ସ୍ଥାନରେ ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହାକୁ ନେଇ ପିସିସି ସଭାପତି ଶରତ ପଟ୍ଟନାୟକ ଗଣମାଧ୍ୟମକୁ କହିଛନ୍ତି କି ଏହି ଉପ ନିର୍ବାଚନର ଫଳାଫଳ କଂଗ୍ରେସର ମୋଡ ବଦଳାଇବ । ଶରତ ପଟ୍ଟନାୟକ ଏହି ଫଳାଫଳକୁ କଂଗ୍ରେସର ଟର୍ଣ୍ଣିପଏଣ୍ଟ ବୋଲି କହିବା ସହ ଏବେ ବିଜେଡି ସହ କଂଗ୍ରେସର ଲଢେଇ ହେବ ବୋଲି ସେ ଗଣମାଧ୍ୟମ ଆଗରେ କହିଛନ୍ତି । ଦଳ ଶୃଙ୍ଖଳିତ ଭାବେ ନିର୍ବାଚନ ଲଢିବାରୁ ଦ୍ୱିତୀୟ ସ୍ଥାନରେ ପହଂଚିପାରିଛି ବୋଲି ସେ କହିଛନ୍ତି ।
କହିରଖୁ କି ରାଜ୍ୟ କଂଗ୍ରେସର ଏବେ ନୂଆ ସଭାପତି ହୋଇଛନ୍ତି ଶରତ ପଟ୍ଟନାୟକ । ସେ ପିସିସିର ମଙ୍ଗ ଧରୁ ଧରୁ ଏକ ଉପନିର୍ବାଚନରେ ବିଜେପି ଠାରୁ ଅଧିକ ଭୋଟ ପାଇବା ତାଙ୍କ ସଫଳତାକୁ ଦର୍ଶାଉଛି । ୬୭ ହଜାରରୁ ଅଧିକ ଭୋଟରେ ବିଜେଡି ପ୍ରାର୍ଥୀଙ୍କ ଠାରୁ କଂଗ୍ରେସ ପ୍ରାର୍ଥୀ ପରାଜିତ ହୋଇଥିଲେ ବି ବିଜେପି ଠାରୁ ଆଗରେ ରହିବା କଂଗ୍ରେସ ପାଇଁ ଏକ ଚ୍ୟାଲେଞ୍ଜ ବୋଲି କହିଛନ୍ତି ପିସିସି ସଭାପତି । କାରଣ ୨୦୧୯ ସାଧାରଣ ନିର୍ବାଚନରେ କଂଗ୍ରେସ ନିରଞ୍ଜନ ପଟ୍ଟନାୟକଙ୍କ ନେତୃତ୍ୱରେ ନିର୍ବାଚନ ଲଢି ତୃତୀୟ ସ୍ଥାନରେ ରହିଥିଲା । ହେଲେ ଦୀର୍ଘ ୩ ବର୍ଷର ବ୍ୟବଧାନ ପରେ ଏକ ଉପ ନିର୍ବାଚନରେ ଦଳ ବିଜେପି ଠାରୁ ଅଧିକ ଭୋଟ ପାଇଥିବାରୁ ଏହାଦଳ ପାଇଁ ଶୁଭଙ୍କର ବୋଲି କୁହାଯାଉଛି ।