ଦେଶ ବିଦେଶରେ ଚମକୁଛି ବ୍ରହ୍ମପୁରର ପାଟ । ହେଲେ ପାଉଣା ନ ପାଇ କାନ୍ଦୁଛି ବୁଣାକାର
କନକ ବ୍ୟୁରୋ : ରେଶମ ସହର ଭାବେ ବ୍ରହ୍ମପୁର ସହରକୁ ସ୍ୱତନ୍ତ୍ର ପରିଚୟ ଦେଇଛି ରେଶମ ପାଟବସ୍ତ୍ର । ପ୍ରାୟ ୨ଶହ ବର୍ଷ ତଳେ ମହୁରୀ ରାଜା ଆନ୍ଧ୍ରପ୍ରଦେଶର ରାଜମହେନ୍ଦ୍ରି ବୁଲିବାକୁ ଯାଇଥିବା ବେଳେ ସେଠାରେ ପ୍ରସ୍ତୁତ ରେଶମ ପାଟବସ୍ତ୍ର ପ୍ରତି ଆକୃଷ୍ଟ ହୋଇଥିଲେ । ଫେରିବା ବେଳେ ସେଠାରୁ କିଛି ଦେବାଙ୍ଗ ସଂପ୍ରଦାୟର ବୁଣାକାରଙ୍କୁ ଆଣି ପୁରୁଣା ବ୍ରହ୍ମପୁରରେ ଥାଇଥାନ କରିଥିଲେ । ପରେ ସେମାନେ ବାଲୁଙ୍କେଶ୍ୱର ପେଟା, ପାଟରାସାହି, ଡେରାସାହି ଗୋବର୍ଦ୍ଧନପେଟା ଆଦି ଅଂଚଳରେ ରହି ବୁଣାବୁଣି କରୁଛନ୍ତି । ହେଲେ ପାଟଶାଢି ବୁଣିବା କଷ୍ଟସାଧ୍ୟ ଓ ସମୟ ସାପେକ୍ଷ ହୋଇଥିବାରୁ ନିଜ କୌଳିକ ବୃତି ପ୍ରତି ମୁହଁ ମୋଡୁଛନ୍ତି ଯୁବପିଢି ।
Kanak News is now on WhatsApp
Join and get latest news updates delivered to you via WhatsApp
ବୁଣାକାରମାନେ ପାରମ୍ପାରିକ ପଦ୍ଧତିରେ ତନ୍ତ ସାହାଯ୍ୟରେ ପୁରୁଷଙ୍କ ପାଇଁ ଯୋଡ ଏବଂ ମହିଳାଙ୍କ ପାଇଁ ପାଟଶାଢୀ ପ୍ରସ୍ତୁତ କରୁଛନ୍ତି । ଗୋଟିଏ ଶାଢି ବୁଣିବା ପାଇଁ ପ୍ରାୟ ୧୦ ଦିନ ଲାଗେ । ଗୋଟିଏ ପରିବାରର ୩ରୁ ୪ ଜଣ ସଦସ୍ୟ କାମରେ ଲାଗିଥାନ୍ତି । ୧୯୫୭ରେ ୩୧୬ଜଣ ବୁଣାକାରଙ୍କୁ ନେଇ ଗଠନ ହୋଇଥିଲା ବ୍ରହ୍ମପୁର ପାଟଶାଢୀ ହ୍ୟାଣ୍ଡଲୁମ ୱେଲଫେୟାର ଆସୋସିଏସନ୍ । ଏବେ ୧୦୦ଜଣ ସଦସ୍ୟ ଥିବା ବେଳେ ମାତ୍ର ୫୦ଜଣ ସଦସ୍ୟ ବୁଣା କାମ କରୁଛନ୍ତି । ବୁଣାକାରଙ୍କୁ ରେଶମ ସୂତା ଓ ରଙ୍ଗ ଭଳିି କଂଚାମାଲ ସହିତ ଶାଢିର ବିକ୍ରିବଟା ପାଇଁ ୨୦୦୩ରୁ ୩ଟି ସୋସାଇଟି କାମ କରୁଛି । କଂଚାମାଲରେ ୧୫ପ୍ରତିଶତ ସବସିଡି ଛାଡ ଓ ବ୍ୟବସାୟୀଙ୍କ ପାଇଁ ୧୦ ପ୍ରତିଶତ ରିହାତି ସୁବିଧା ରହିଛି ।
ପାଟଶାଢିର ମୁଲ୍ୟ ୧୦ହଜାର ଟଙ୍କାରୁ ଆରମ୍ଭ ହେଉଥିବା ବେଳେ ଯୋଡ଼ର ମୂଲ୍ୟ ସାଢ଼େ ୭ ରୁ ୮ ହଜାର ରହିଛି । ଗ୍ରାହକଙ୍କ ଚାହିଦାକୁ ଦେଖି ୨୦୧୭ରେ ଜିଲ୍ଲା ପ୍ରଶାସନ ଉଦ୍ୟମରେ ପାଟଶାଢି ବିକ୍ରି ପାଇଁ ଅନଲାଇନ ମାର୍କେଟିଂ ବ୍ୟବସ୍ଥା ହୋଇଛି । ଫଳରେ ବ୍ରହ୍ମପୁରୀ ପାଟ ଦେଶ ଓ ବିଦେଶରେ ବେଶ୍ ପରିଚିତ ହୋଇପାରିଛି । ତଥାପି ବର୍ତମାନର ଯୁବପିଢି ରେଶମ ପାଟ ବୁଣିବା ପାଇଁ ଆଗ୍ରହ ପ୍ରକାଶ କରୁନାହାନ୍ତି । ତେଣୁ ସେମାନଙ୍କୁ ଆକୃଷ୍ଟ କରିବା ପାଇଁ ଅତ୍ୟାଧୁନିକ କର୍ମାଶାଳା କରାଯିବ ବୋଲି ସୂଚନା ଦେଇଛନ୍ତି ବିଭାଗୀୟ କର୍ତୃପକ୍ଷ ।
ରେଶମ ପାଟଶାଢିର ଚାହିଦା ବଢୁଥିବା ବେଳେ ବୁଣାକାରଙ୍କ ସଂଖ୍ୟା କମିବାରୁ ଆବଶ୍ୟକ ପାଟ ଯୋଗାଇବା ସମ୍ଭବ ହେଉନାହିଁ । ଏସବୁ ଦିଗ ପ୍ରତି ସରକାର ଦୃଷ୍ଟି ନଦେଲେ ଆଗାମୀ କିଛି ବର୍ଷ ମଧ୍ୟରେ ସହରର ପରିଚୟ ହଜିଯିବା ଆଶଙ୍କାକୁ ଏଡାଇ ଦିଆଯାଇନପାରେ ।