ଶକ୍ତି ବିଭାଗ ପାଖରେ ପହଞ୍ଚିଲା ବସ ଦୁର୍ଘଟଣାର ତଦନ୍ତ ରିପୋର୍ଟ । ଦଶ ଜଣଙ୍କ ମୃତ୍ୟୁ ପାଇଁ କିଏ ରହିବ ଦାୟୀ ? କାହା ଉପରେ ହେବ କଡା କାର୍ଯ୍ୟାନୁଷ୍ଠାନ ? ସରକାରଙ୍କ ଆକ୍ସନକୁ ଅପେକ୍ଷା
କନକ ବ୍ୟୁରୋ: ବ୍ରହ୍ମପୁର ବସରେ ବିଦ୍ୟୁତ ତାର ଲାଗି ୧୦ ଜଣଙ୍କ ମୃତ୍ୟୁ ଘଟଣା । ତଦନ୍ତ ରିପୋର୍ଟ ପରେ କାର୍ଯ୍ୟାନୁଷ୍ଠାନ ହେବ କହିଲେ ଶକ୍ତି ମନ୍ତ୍ରୀ ଦିବ୍ୟଶଙ୍କର ମିଶ୍ର । ଅଧିକ୍ଷଣ ଯନ୍ତ୍ରୀ, ବିଦ୍ୟୁତ ବିଭାଗ ଅଧିକାରୀଙ୍କୁ ତଦନ୍ତ ଦାୟିତ୍ୱ ଦିଆଯାଇଛି । ରିପୋର୍ଟ ହସ୍ତଗତ ହେବା ପରେ ତ୍ରୁଟି ଅନୁସାରେ ବିହିତ କାର୍ଯ୍ୟାନୁଷ୍ଠାନ ନିଆଯିବ ବୋଲି ମନ୍ତ୍ରୀ ସୂଚନା ଦେଇଥିବା ବେଳେ ଇତି ମଧ୍ୟରେ ତଦନ୍ତ ରିପୋର୍ଟ ବିଦ୍ୟୁତ ବିଭାଗରେ ପହଞ୍ଚିଥିବା ଖବର ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ମେନ୍ଦ୍ରାଜପୁର ଦୁର୍ଘଟଣା ନେଇ ଆଜି ଏକ ଉଚ୍ଚସ୍ତରୀୟ ବୈଠକ ହେବ ବୋଲି ସୂଚନା ଦେଇଛନ୍ତି ଶକ୍ତି ମନ୍ତ୍ରୀ । କେଉଁ ପରିସ୍ଥିତିରେ ଦୁର୍ଘଟଣା ହେଲା ? ଦୁର୍ଘଟଣା ପାଇଁ ଦାୟୀ କିଏ ? ବିଦ୍ୟୁତ ବିଭାଗର ଚରମ ଅବହେଳା ପାଇଁ ଅକାଳରେ ୧୦ଟି ଜୀବନ ଚାଲିଗଲା କି? ଏ ସବୁ ପ୍ରଶ୍ନ କାଲି ଠାରୁ ଉଠୁଥିବା ବେଳେ ଘଟଣା ପଛର ପ୍ରକୃତ କାରଣ କଣ ସେନେଇ ଆଲୋଚନା ହେବ । ଆଉ ରିପୋର୍ଟ ପରେ କାର୍ଯ୍ୟାନୁଷ୍ଠାନ ନିଆଯିବ ।
ତେବେ ବିଦ୍ୟୁତ ତାର ଲାଗି ମଝି ରାସ୍ତାରେ ୧୦ ଜଣ ଆଖି ବୁଜିଥିବା ବେଳେ ୧୮ ଜଣ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଅନ୍ୟ ପଟେ ଏଭଳି ଏକ ଦୁର୍ଘଟଣାକୁ ନେଇ ସାରା ରାଜ୍ୟ ଶୋକରେ ବୁଡି ରହିଥିବା ବେଳେ, ଏହି ଅଘଟଣ ପାଇଁ କିଏ ଦାୟୀ, ସେନେଇ ଚାଲିଛି କାରଣ ଖୋଜା । ଏହି ଛାତିଥରା ଘଟଣାକୁ ନେଇ କାଠଗଡାକୁ ଟାଣିହୋଇଯାଇଛନ୍ତି ବସର ଡ୍ରାଇଭର, ପୂର୍ତ ବିଭାଗ ଏବଂ ବିଦ୍ୟୁତ ବିଭାଗ । କିଏ ଦାୟୀ, ଆଉ କାହାର ଭୁଲ ପାଇଁ ଏତେ ବଡ ଅଘଟଣ ଘଟିଗଲା, ସେନେଇ ଉଠୁଛି ବଡ ପ୍ରଶ୍ନ ।
କାଠଗଡାର ପ୍ରଥମ ଦୋଷୀ, ବିଦ୍ୟୁତ ବିଭାଗ !
ଗଞ୍ଜାମରେ ବିଦ୍ୟୁତ ତାର ସଂସ୍ପର୍ଶରେ ଯାତ୍ରୀବାହୀ ବସ ଆସିବା ପଛରେ ସାମ୍ନାକୁ ଆସିଛି ବିଜୁଳି ବିଭାଗର ଚରମ ଅବହେଳା । ରାସ୍ତାଠାରୁ ୬.୧ମିଟର ଉଚ୍ଚତାରେ ବିଦ୍ୟୁତ ତାର ଟାଣିବାକୁ ନିୟମ ରହିଥିବା ବେଳେ ମାତ୍ର ୩.୧୪ମିଟର ଉଚ୍ଚତାରେ ଟଣା ଯାଇଥିଲା ୧୧କେଭିର ବିଦ୍ୟୁତ ତାର । ଯେଉଁଥିପାଇଁ ଘଟିଥିଲା ଏଭଳି ଲୋମଟାଙ୍କୁରା ଦୁର୍ଘଟଣା । ଏନେଇ ହୁଏତ ତଦନ୍ତ ଚାଲିବ ଆଉ କାର୍ୟ୍ୟାନୁଷ୍ଠାନ ବି ହେବ । ହେଲେ ଅବହେଳା ପାଇଁ ଯେଉଁମାନଙ୍କ ଜୀବନ ଚାଲିଗଲା ତାର ଭରଣା କିନ୍ତୁ ଅସମ୍ଭବ ।
କାଠଗଡାର ଦ୍ୱିତୀୟ ଦୋଷୀ, ବସ୍ ଡ୍ରାଇଭର !
ଯଦିଓ ରାସ୍ତାରେ ବିଦ୍ୟୁତ ତାର ଝୁଲିପଡିଥିଲା, ବସର ଡ୍ରାଇଭର ଏହାକୁ ଦେଖିପାରିଲେନି କେମିତି । ଆଉ କୁହାଯାଉଛି ପ୍ରଥମେ ଯେତେବେଳେ ଏହି ରାସ୍ତା ଦେଇ ପରିବାର ଲୋକଙ୍କୁ ଆଣିବାକୁ ବସଟି ଯାଇଥିଲା, ସେତେବେଳେ ମଧ୍ୟ ଝୁଲି ରହିଥିବା ଏହି ମୃତ୍ୟୁର ତାରରେ ସଂସ୍ପର୍ଶରେ ଆସିଥିଲା ବସ୍ । କିନ୍ତୁ ସେତେବେଳେ କରେଂଟ ନଥିବା କାରଣରୁ କୌଣସି ଅଘଟଣ ଘଟିନଥିଲା । ଆଉ ଯଦି ଏକଥା ସତ, ତେବେ କେମିତି ଜାଣିଶୁଣି ପୁଣି ସେଇ ଭୁଲ କଲେ ବସ୍ ଡ୍ରାଇଭର । ଯେତେବେଳେ ତାରଟି ଝୁଲି ରହିଥିଲା, ବସର ଡ୍ରାଇଭର ସଚେତନ ହେଲେନି କେମିତି । ଏହି ଦୁର୍ଘଟଣାରେ କେଉଁଠି ନା କେଉଁଠି ନିଜର ସାମାନ୍ୟ ଭୁଲ ପାଇଁ ବସର ଡ୍ରାଇଭର ମଧ୍ୟ କାଠଗଡାକୁ ଟାଣି ହୋଇଛନ୍ତି ।
କାଠଗଡାର ତୃତୀୟ ଦୋଷୀ, ପୂର୍ତ ବିଭାଗ !
ଦୁର୍ଘଟଣା ନେଇ ସମସ୍ତ ଦୋଷ ଯେ କେବଳ ବିଦ୍ୟୁତ ବିଭାଗର ତାହା କହିଲେ ଭୁଲ୍ ହୋଇଯିବ । ଏଭଳି ଅଘଟଣ ପାଇଁ କେଉଁଠି ନା କେଉଁଠି ଦାୟୀ ପୂର୍ତ ବିଭାଗ । କାରଣ କିଛି ଦିନ ଏଠାରେ ରାସ୍ତା କାମ କରାଯାଇଥିଲା । ରାସ୍ତା କାମ କଲାବେଳେ କିଛି ଫୁଟ୍ ମଧ୍ୟ ପୋତାଯାଇଥିଲା । ଫଳରେ ରାସ୍ତାର ଉଚ୍ଚତା ମଧ୍ୟ ବୃଦ୍ଧି ପାଇଥିଲା । ତେବେ ଏନେଇ ବିଦ୍ୟୁତ ବିଭାଗକୁ ଅବଗତ କରାଇବାର ଥିଲା । ଯଦି ରାସ୍ତାର ଉଚ୍ଚତା ବୃଦ୍ଧି ପାଇଛି, ସେହି ଅନୁସାରେ ବିଦ୍ୟୁତ ତାରର ଉଚ୍ଚତା ମଧ୍ୟ ବଢାଇବାର ଥିଲା । ଆଉ ସବୁଠୁ ବଡ କଥା ହେଉଛି ବିଦ୍ୟୁତ ଖୁଂଟଟି ରାସ୍ତା ଉପରେ ମଧ୍ୟ ରହିଥିଲା । ଏନେଇ ବିଦ୍ୟୁତ ବିଭାଗକୁ ଅବଗତ କରାଇଥିଲେ, ହୁଏତ ଖୁଂଟକୁ ସ୍ଥାନାନ୍ତର କରାଯାଇପାରିଥାନ୍ତା । ତେବେ ଏ ସମସ୍ତ ଦିଗର ତଦନ୍ତ ରିପୋର୍ଟକୁ ନେଇ କାର୍ଯ୍ୟାନୁଷ୍ଠାନ ହେବ ବୋଲି ଆଶା ।