ସ୍ଲୋ ମୋସନରେ ରିଲ୍ସ ବନେଇବା ହେଲା କାଳ । ଦିଖଣ୍ଡ ହେଲା ଯୁବକଙ୍କ ଶରୀର । କ୍ୟାମେରାରେ କଏଦ ମୃତ୍ୟୁ ପୂର୍ବର ୮ ସେକେଣ୍ଡର ଦୃଶ୍ୟ

କନକ ବ୍ୟୁରୋ: ଆଜିକାଲି ରିଲ୍ସ ବନେଇବା ଚକ୍କରରେ ଅନେକ ମୂଲ୍ୟବାନ୍ ଜୀବନ ଚାଲିଯିବାର ଖବର ନଜରକୁ ଆସୁଛି । ତଥାପି ସୁଧୁରୁନାହାଁନ୍ତି ଯୁବ ସମାଜ । ଏଭଳି ଆଉ ଏକ ଘଟଣା ଘଟିଛି ଉତ୍ତରପ୍ରଦେଶ ବାରାବଙ୍କୀ ଅଞ୍ଚଳରେ । ୧୬ ବର୍ଷର ଯୁବକ ରିଲ୍ସ ବନାଇବା ସମୟରେ ମାଡିଅସିଲା ଏକ୍ସପ୍ରେସ୍ । ଫଳରେ ଦିଖଣ୍ଡ ହେଲା ଶରୀର । ଏହି ଘଟଣା ତା’ ସାଙ୍ଗର ମୋବାଇଲରେ ରେକର୍ଡ ହୋଇ ରହିଛି ।

ମୃତକ ହେଉଛନ୍ତି ବାରାବଙ୍କୀ ଜାହାଙ୍ଗୀରାବାଦ ନିକଟ ଦୌଲତପୁର ଗାଁଓର ବାସିନ୍ଦା । ଫରମାନ୍ ନିଜର ୩ ସାଙ୍ଗଙ୍କ ସହ ମିଶି ବାରାୱଫାତ ଜୁଲୁସ୍ ଦେଖିବାକୁ ଯାଇଥିଲେ । ହେଲେ ବାଟରେ ଦାମୋଦରପୁର ଗାଁଓ ନିକଟ ରେଲୱେ କ୍ରସିଙ୍ଗ ପାଖରେ ଅଟକି ରିଲ୍ସ ବନାଇବାକୁ କହିଲେ । ତାଙ୍କ ସାଙ୍ଗକୁ ଭିଡିଓ କରିବାକୁ କହି ଟ୍ରାକ୍ ଉପରେ ସ୍ଲୋ ମୋସନରେ ଚାଲୁଥିଲେ । ଏତିକିବେଳେ ପଛପଟୁ ଦରଭଙ୍ଗା ପଟୁ ଆସୁଥିବା ଟ୍ରେନ ଧକ୍କାରେ ତାଙ୍କ ଶରୀର ଦିଖଣ୍ଡ ହୋଇଗଲା । ଫରମାନଙ୍କ ମୃତ୍ୟୁର ସେହି ୭ ସେକେଣ୍ଡର ଦୃଶ୍ୟ ମୋବାଇଲରେ ରେକର୍ଡ ହୋଇ ରହିଛି । ଏହାକୁ ଦେଖିବା ପରେ ମୃତକଙ୍କ ଘରେ କାନ୍ଦବୋବାଳି ପଡିଥିଲା ।