କନକ ବ୍ୟୁରୋ : ଦ୍ୱିତୀୟ ଡୋଜ୍ ନେବାର ୬ ମାସ ମଧ୍ୟରେ ବୁଷ୍ଟର ଡୋଜ୍ ନେବା ଉପଯୁକ୍ତ ସମୟ ବୋଲି କହିଛି ଭାରତ ବାୟୋଟେକ୍ । ଭାରତ ବାୟୋଟେକର ଅଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ କ୍ରିଷ୍ଣା ଏଲ୍ଲା କହିଛନ୍ତି, ଏ ସଂପର୍କରେ ସରକାର ଅନ୍ତିମ ନିଷ୍ପତି ନେବେ । ଏହା ସହ ସେ କହିଛନ୍ତି, ନାଜାଲ ଟିକା ଭାଇରସର ସଂକ୍ରମଣକୁ ରୋକିବାରେ ସାଧାରଣ ଟିକା ଅପେକ୍ଷା ଅଧିକ ପ୍ରଭାବଶାଳୀ ସାବ୍ୟସ୍ତ ହୋଇଥାଏ । ଏହା ଦ୍ୱାରା ଟିକା ନେଇଥିବା ଲୋକଙ୍କୁ ମାସ୍କ ପିନ୍ଧିବାର ଆବଶ୍ୟକତା ରହିବ ନାହିଁ ।
Kanak News is now on WhatsApp
Join and get latest news updates delivered to you via WhatsApp
ନାଜାଲ ଟିକାର ଦ୍ୱିତୀୟ ପର୍ଯ୍ୟାୟ ଟ୍ରାଏଲ ଶେଷ ହୋଇଥିବା ବେଳେ ସେ ସଂପର୍କିତ ତଥ୍ୟକୁ ବିଶ୍ଲେଷଣ କରାଯାଉଥିବା କହିଛନ୍ତି କ୍ରିଷ୍ଣା ଏଲ୍ଲା । ୩୬ଟି ଦେଶର କରୋନାର ବୁଷ୍ଟର ଡୋଜ୍କୁ ଅନୁମତି ଦେଇ ସାରିଲେଣି । ଆମେରିକା, ତୁର୍କୀ, ଜର୍ମାନୀ, ଅଷ୍ଟ୍ରିଆ, କାନାଡା, ଫ୍ରାନ୍ସ ଆଦି ଦେଶରେ ବୁଷ୍ଟର ଡୋଜ୍ ଦିଆଯାଉଛି । ଆମେରିକାରେ ସର୍ବାଧିକ ୧ କୋଟି ୨୪ ଲକ୍ଷ ଲୋକଙ୍କୁ ବୁଷ୍ଟର ଡୋଜ୍ ଦେଇଛି । ଦ୍ୱିତୀୟ ସର୍ବାଧିକ ଭାବେ ତୁର୍କୀରେ ୧ କୋଟି ୧୯ ଲକ୍ଷ ଲୋକଙ୍କୁ ବୁଷ୍ଟର ଡୋଜ୍ ଦିଆଯାଇଛି ।
ସେପଟେ, କରୋନାର ସଂପୂର୍ଣ୍ଣ ଟିକା ନେଇଥିଲେ ମୃତ୍ୟୁ ଆଶଙ୍କା ୧୬ ଗୁଣା କମ୍ । ହସ୍ପିଟାଲ ଆଇସିୟୁରେ ଭର୍ତି ହେବାର ଆଶଙ୍କା ବି କମ୍ । ଅଷ୍ଟ୍ରେଲିଆର ଏକ ଅଧ୍ୟୟନରୁ ଏହା ଜଣାପଡ଼ିଛି । ଆମେରିକାର ଟେକ୍ସାସରେ ମଧ୍ୟ ଏନେଇ ପୃଥକ ଭାବେ ତଥ୍ୟ ସଂଗ୍ରହ ହୋଇଛି । ଅଧ୍ୟୟନରୁ ଜଣାପଡ଼ିଛି ଯେ, ଟିକା ନେଇଥିବା ୧ ଲକ୍ଷ ଲୋକଙ୍କ ମଧ୍ୟରୁ ୧୬ ଜଣ କରୋନାରେ ମୃତ୍ୟୁ ଓ ଆଇସିୟୁରେ ଭର୍ତି ହେଉଛନ୍ତି ।
ଟିକା ନେଇନଥିବା ଲୋକ ଟିକା ନେଇଥିବା ଲୋକଙ୍କଠାରୁ ୨୦ ଗୁଣା ଅଧିକ ବିପଦରେ ଅଛନ୍ତି । ୩୦ରୁ ୪୦ ବର୍ଷ ମଧ୍ୟରେ ଟିକା ନେଇଥିବା ଲୋକଙ୍କ କ୍ଷେତ୍ରରେ ମୃତ୍ୟୁ ବିପଦ ୪୮ ଗୁଣା ଅଧିକ ଥିବା ବେଳେ ୪୦ରୁ ୫୦ ବର୍ଷ ବୟସ ବର୍ଗର ଲୋକଙ୍କ କ୍ଷେତ୍ରରେ ମୃତ୍ୟୁ ଆଶଂକା ୬୩ ଗୁଣା ଅଧିକ ।