କନକ ବ୍ୟୁରୋ: ବରଯାତ୍ରୀ ହୋଇ ଯାଇଥିଲେ ଶବ ହୋଇ ଫେରିଲେ । ମଝି ରାସ୍ତାରେ ଲିଭିଗଲା ବାହାଘରର ସବୁ ଖୁସି । ଆଉ କିଛି ସମୟ ପରେ ଘରେ ପହଞ୍ଚିଥାନ୍ତେ ସମସ୍ତେ । ମାତ୍ର ୫ କିଲୋମିଟର ଦୂରରେ ଥିଲା ଘର । ହେଲେ ବିଧିର ବିଧାନ ଥିଲା ଅଲଗା । କନିଆଁ ଘରୁ ଭୋଜି ଖାଇ ଫେରିବା ବେଳେ ମହାନଦୀ ଉପରେ ମାଡି ବସିଲା ମୃତ୍ୟୁ । ଘରେ ପହଞ୍ଚିବା ପୂର୍ବରୁ ମଶାଣୀରେ ପହଁଞ୍ଚିଛି ସେମାନଙ୍କ ଶବ । ଦୁର୍ଘଟଣାରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ, ୫ ଜଣ ଗୁରୁତର ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ଶୁକ୍ରବାର ରାତିରେ ସୋନପୁର ଉଲୁଣ୍ଡା ବ୍ଲକ ନିମ୍ନା ଗାଁର ପ୍ରଦୀପ ପାଣ୍ଡିଆଙ୍କ ପୁଅ ମନିଷ ପାଣ୍ଡିଆଙ୍କ ବାହାଘର ଥିଲା । କୌଡିଆମୁଣ୍ଡା ଗାଁକୁ ଯାଇଥିଲେ ବରଯାତ୍ରୀ । ଭୋଜି ଖାଇ ବରର ୧୦ ଜଣ ସଂପର୍କୀୟ ବୋଲେରୋରେ ଖୁସିମନରେ ଘରକୁ ଫେରୁଥିଲେ । ଆଉ ୫ କିଲୋମିଟର ପରେ ଘରେ ପହଁଚିଥାନ୍ତେ, କିନ୍ତୁ ବିଧିର ବିଧାନ ଥିଲା ଅଲଗା । ବରର ବଡ଼ ବାପା, ଭଉଣୀଙ୍କ ସହ ୫ ଜଣ ପ୍ରାଣ ହରାଇଛନ୍ତି । ସୁବର୍ଣ୍ଣପୁର ସହର ମହାନଦୀ ପୋଲ ମଝିରେ ବୋଲେରୋ ସହ ଟ୍ରକ ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ୫ ଜଣଙ୍କ ମୃତ୍ୟୁ ହୋଇଥିବା ବେଳେ ୫ ଜଣ ଗୁରୁତର ଆହତ ହୋଇଛନ୍ତି । ଗୁରୁତରଙ୍କୁ ପ୍ରଥମେ ଜିଲ୍ଲା ହସ୍ପିଟାଲ ଓ ପରେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା । ଜଣଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ବଡ଼ ମେଡିକାଲକୁ ପଠାଇ ଦିଆଯାଇଛି ।
ତେବେ ବାହାଘର ପାଇଁ ଖୁସିଥିଲେ ସମସ୍ତେ, ଭୋଜିଭାତରେ ଗାଁ ଦାଣ୍ଡ କମ୍ପି ଉଠିଥାନ୍ତା, ହେଲେ ଗାଁରେ ପଡିଛି କାନ୍ଦ ବୋବାଳି । ପୂରା ଗାଁ ଶୋକରେ ଅଧିର ହୋଇ ଉଠିଛି । ଗାଁ ଦାଣ୍ଡରୁ ମଶାଣୀ ଯାଏଁ ଲୋକଙ୍କ ଭିଡ଼ ଜମିଛି । ସଂପର୍କୀୟମାନେ କୋହ ସମ୍ଭାଳି ପାରୁନାହାନ୍ତି । ବରଯାତ୍ରୀ ହୋଇ ଯାଇଥିଲେ, ହେଲେ ଫେରିଲା ସେମାନଙ୍କ ମୃତଦେହ । ଦୁର୍ଘଟଣାରେ ଚାଲିଗଲା ୫ ଜଣଙ୍କ ଜୀବନ । ବାହାଘର ଉତ୍ସବରେ ହସଖୁସିରେ ଫାଟି ପଡ଼ୁଥାନ୍ତା ଘର, ହେଲେ ଗାଁ ମଶାଣିରେ ଏକାଠି ଜଳିଲା ଜୁଇ ଶୋକାକୂଳ ପରିବେଶରେ ଅନ୍ତିମ ବିଦାୟ ଦେଲେ ଗ୍ରାମବାସୀ ।