ଟ୍ରକକୁ ପିଟିଲା ବୋଲେରୋ, ୬ ମୃତ, ୩ ଗୁରୁତର । କୁଳଦେବୀ ଦର୍ଶନ କରି ଫେରୁଥିଲେ ପରିବାର

କନକ ବ୍ୟୁରୋ: ରାଜସ୍ଥାନ ଯୋଧପୁରରେ ଘଟିଛି ଭୟଙ୍କର ସଡକ ଦୁର୍ଘଟଣା । ଗୁରୁବାର ରାତି ପାଖାପାଖି ସାଢେ ୧୨ ଟା ସମୟରେ ଏକ ସଡକ ଦୁର୍ଘଟଣାରେ ୬ଜଣଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିବାବେଳେ ୩ ଜଣଙ୍କ ଅବସ୍ଥା ଗୁରୁତର ହୋଇଛି । ଏହି ଘଟଣା ବିଲାଡା ଥାନା ଇଲାକାରେ ଘଟିଛି । ରାତି ସମୟରେ ଗୋଟିଏ ପରିବାରର ଲୋକେ କୁଳଦେବୀ ଦର୍ଶନ କରି ଫେରୁଥିବାବେଳେ ଏକ ଟ୍ରଲର ପଛପଟେ ବୋଲେରୋ ଦ୍ରୁତଗତିରେ ଆସି ଧକ୍କା ଦେଇଥିଲା ।

ସୂଚନା ମୁତାବକ, ଚୁରୁ ନିବାସୀ ବିଜୟ ସିଂହ ଓ ତାଙ୍କ ପରିବା ଲୋକେ କୁଳଦେବୀ ନାଗଣେଚି ମାତାଙ୍କ ଦର୍ଶନ କରିବାକୁ ଜୟପୁରରୁ ଯୋଧପୁର ଯାଉଥିଲେ । ପୁରା ପରିବାର ଏକ ବୋଲୋରୋରେ ଯାଉଥିଲେ । ତାଙ୍କ ଗାଡି ବିଲାଡା ଇଲାକାରେ ପହଞ୍ଚିବାବେଳେକୁ ହାଇୱେରେ ଏକ ଟ୍ରଲର ଛିଡାହୋଇଥିଲା । ସିଂହ ପରିବାର ବସିଥିବା ବୋଲେରୋ ଏହି ଟ୍ରଲର ପଛପଟେ ନେଇ ଧକ୍କ୍ା କରିଥିଲା । ବୋଲୋରୋର ଗତି ଏତେ ଅଧିକ ଥିଲା ଯେ, ବୋଲୋରୋ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି ।

ଏହି ଭୟଙ୍କର ଦୁର୍ଘଟଣାରେ ଜଣେ ଶିଶୁ ସମେତ ୬ଜଣଙ୍କର ମୃତ୍ୟୁ ହୋଇଛି । ୩ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି । ଟ୍ରଲରକୁ ଜବତ କରାଯାଇଥିବା ପୋଲିସ କହିଛି ।