ଆଜିଠୁ ଭୁବନେଶ୍ୱରବାସୀଙ୍କୁ ରିଲିଫ୍ ବାଣ୍ଟିବ ବିଏମସି । ମିଳିବ ୫୦ କିଲୋ ଚାଉଳ, ୨ ହଜାର ଟଙ୍କା ଏବଂ ପଲିଥିନ୍ ପାଇଁ ୫୦୦ ଟଙ୍କାର ସହାୟତା ।
କନକ ବ୍ୟୁରୋ: ‘ଫୋନି’ ଫେରିବା ପରେ ଲୋକମାନଙ୍କୁ ରିଲିଫ୍ ବଣ୍ଟନ ନେଇ ରାଜ୍ୟ ସରକାର ତତ୍ପରତା ଦେଖାଇଛନ୍ତି । ବିଶେଷ କରି ଭୁବନେଶ୍ୱର ସହରରେ ପ୍ରଭାବିତ ହୋଇଥିବା ଲୋକମାନଙ୍କୁ କିଭଳି ସହାୟତା ପ୍ରଦାନ କରାଯିବ ସେନେଇ ଭୁବନେଶ୍ୱର ମହାନଗର ନିଗମ ( ବିଏମସି) ତରଫରୁ ବ୍ୟାପକ ପଦକ୍ଷେପ ନିଆଯାଇଛି । ତେଣୁ ଆଜି ଠାରୁ ଭୁବନେଶ୍ୱର ମହାନଗର ନିଗମ ବାତ୍ୟା ପ୍ରଭାବିତ ଲୋକଙ୍କୁ ରିଲିଫ ବାଣ୍ଟିବ। ବିଏମସି ଅତିରିକ୍ତ କମିସନର ରାଜେନ୍ଦ୍ର କୁମାର ପଟ୍ଟନାୟକ ରବିବାର ଗଣମାଧ୍ୟମକୁ ସୂଚନା ଦେଇଛନ୍ତି ଯେ, ବିଏମସିର ୬୭ଟି ଓ୍ଵାର୍ଡରେ ବାତ୍ୟା ପ୍ରଭାବିତ ଲୋକଙ୍କୁ ସହାୟତା ପ୍ରଦାନ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଲା ଯେ, ଜାତୀୟ ଖାଦ୍ୟ ସୁରକ୍ଷା ନିୟମ (ଏନଏଫଏସଏ) ନିୟମ ଅନୁସାରେ ବିପନ୍ନ ପରିବାରକୁ ୫୦ କିଲୋ ଲେଖାଏଁ ଚାଉଳ ବଣ୍ଟାଯିବ । ବିପନ୍ନ ପରିବାରକୁ ଜିନିଷପତ୍ର କଣିବା ପାଇଁ ୨ ହଜାର ଟଙ୍କା ଓ ପଲିଥିନ କିଣିବା ପାଇଁ ୫୦୦ ଟଙ୍କା ସହାୟତା ମିଳିବ। ରାଜସ୍ୱ ନିରୀକ୍ଷକ ଏବଂ ଅଙ୍ଗନବାଡି କର୍ମୀଙ୍କ ଦ୍ୱାରା ଚିହ୍ନଟ କରାଯାଇଛି ବୋଲି ଶ୍ରୀ ପଟ୍ଟନାୟକ ସୂଚନା ଦେଇଛନ୍ତି ।
ସାମୁଦ୍ରିକ ଝଡ଼ ‘ଫନି’ର ତାଣ୍ଡବ ପରେ ଭୁବନେଶ୍ୱରର ମାନଚିତ୍ର ସଂପୂର୍ଣ୍ଣ ରୂପେ ବଦଳି ଯାଇଛି । ସବୁଜ ଓ ସ୍ମାର୍ଟ ଭୁବନେଶ୍ୱର ତା’ର ପୂର୍ବ ସୁନ୍ଦରତା ହରାଇ ଦେଇଛି । ବିପନ୍ନ ଲୋକେ ବିଦ୍ୟୁତ, ପାଣି ଓ ଖାଦ୍ୟ ସାମଗ୍ରୀ କିଣିବାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ତେଣୁ ଆସନ୍ତା କାଲି ଠାରୁ ରିଲିଫ୍ ବଣ୍ଟନ ନେଇ ବିଏମସି ତରଫରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି ।