ଯାଜପୁରରେ କଳାପଥର କେଳେଙ୍କାରୀ ; ୨୦ ବର୍ଷରେ ଲୁଟିନେଲେ ୧୦ ହଜାର କୋଟିରୁ ଅଧିକ ମୂଲ୍ୟର ଖଣିଜ

କନକ ବ୍ୟୁରୋ: ଯାଜପୁର ଜିଲ୍ଲା ଧର୍ମଶାଳାର ତହସିଲ ଅଞ୍ଚଳର କଳାପଥର କେଲେଙ୍କାରୀ ସାମ୍ନାକୁ ଆସିଛି । ଗଲା ୨୦ ବର୍ଷ ହେଲା ଆଖିବୁଜା କଳାପଥରୁ ଲୁଟ୍ କରାଯାଇଛି । ତହସିଲ ଅଧିକାରୀ, ଲିଜଧାରୀ ଓ ସ୍ଥାନୀୟ ରାଜନେତାଙ୍କ ମଧୁଚନ୍ଦ୍ରିକାରେ ୧୦ ହଜାର କୋଟି ଟଙ୍କାର ଲଘୁଖଣିଜ ଲୁଟ କରାଯାଇଛି । ଧର୍ମଶାଳା ତହସିଲ ଅଞ୍ଚଳରେ ୧୦ ପାହାଡ ଉଭାନ ହୋଇଯାଇଛି । ଦିନ ବାଘ ରହୁଥିବା ବାଘୁଆ ପାହାଡ ଏବେ ମାଟିରେ ମିଶିଛି । ଲୁଣିବର, ଚଡେଇଧରା, ବିଛାଖଣ୍ଡି, ରାହାଡ଼ପୁର, ଅଞ୍ଜିରା, ରାଜବାଟୀ, ମାଳଗଡ଼ା, କୁସୁନପୁର ଆଦି ଅଂଚଳର ପାହାଡକୁ ଭାଙ୍ଗି ଚୁରମାର କରିଦିଆଯାଇଛି । ବେଧଡକ ସ୍ପଷ୍ଟ ଦିବାଲୋକରେ କଳାପଥର ଲୁଟ କରାଯାଉଛି । ମାଫିଆ ମାଲାମାଲ ହେଉଥିବା ରାଜ୍ୟ ସରକାର ରାଜସ୍ୱ ହରାଇଛନ୍ତି ।

ଅଭିଯୋଗ ହେବା ପରେ କାଲି ରାଜ୍ୟ ଖଣି ବିଭାଗ ପକ୍ଷରୁ ଧର୍ମଶାଳା ତହସିଲର ବିଭିନ୍ନ କଳା ପଥର ଖାଦାନରେ ଚଢାଉ କରାଯାଇଛି। ରାଜ୍ୟ ଖଣି ବିଭାଗ ଯୁଗ୍ମ ନିର୍ଦ୍ଦେଶକ ଏନଏନ ସିଂଦେଓଙ୍କ ନେତୃତ୍ୱରେ ଧର୍ମଶାଳା ତହସିଲର ବିଭିନ୍ନ ଖାଦାନ ଗୁଡିକରେ ଚଢାଉ କରାଯାଇଛି। ଲୁଣିବର, ଚଡେଇଧରା ଖଣି ଅଞ୍ଚଳରେ ଚଢାଉ କରାଯାଇ ମାପଚୁପ କରାଯାଇଛି। ଚଢାଉ ସମୟରେ ଗୋଟିଏ କ୍ରସର ସିଲ୍ କରିବା ସହ ଗୋଟିଏ ପ୍ରୋକଲିନ୍ ମେସିନ୍ ଜବତ କରାଯାଇଛି। ପ୍ରାଥମିକ ଆକଳନ ପରେ ଯାହା କିଛି ପଦକ୍ଷେପ ନିଆଯିବ ବୋଲି ଖଣି ବିଭାଗ ପକ୍ଷରୁ ଜଣାଯାଇଛି। ଏବେ ପ୍ରଶ୍ନ ଉଠିଛି ମହାଲୁଟର ଖଳନାୟକମାନଙ୍କ ବରୋଧରେ କାର୍ୟ୍ୟାନୁଷ୍ଠାନ ନେବାରେ ସଫଳଲ ହେବ ତ ଖଣି ବିଭାଗ । କାରଣ ପୂର୍ବରୁ ବେଆଇନ ଖନନ ପାଇଁ ଲିଜଧାରୀଙ୍କ ଉପରେ ୨୯୮ କୋଟି ଟଙ୍କାର ଜରିମାନା କରାଯାଇଥିଲା । ହେଲେ ଲିଜଧାରୀ କୋର୍ଟଙ୍କ ଆଶ୍ରୟ ନେଇ ସମୟ ଗଡ଼ାଇ ଚାଲିଛନ୍ତି ।

କଳାପଥରର କଳାପାହାଡ଼ କିଏ?

ଆକ୍ସନ ମୋଡରେ ରାଜ୍ୟ ଖଣି ବିଭାଗ
ଧର୍ମଶାଳାରେ କଳାପଥର ଖଣିରେ ଚଢ଼ାଉ
ବେଆଇନ ଭାବେ ଲଘୁ ଖଣିଜ ଲୁଟ ଅଭିଯୋଗ
ଗୋଟିଏ କ୍ରସର, ପ୍ରୋକଲିନ ମେସିନ ଜବତ
୨୦ବର୍ଷ ହେଲା ଅଞ୍ଚଳରୁ ଲଘୁ ଖଣିଜ ଲୁଟ ଅଭିଯୋଗ
ଧର୍ମଶାଳା ତହସିଲର ୭୦ଟି ଖଣିରୁ ଲୁଟ ଅଭିଯୋଗ
୨୦ ବର୍ଷରେ ୧୦ହଜାର କୋଟିର ଲଘୁଖଣିଜ ଲୁଟ
ଧର୍ମଶାଳା ତହସିଲର ୧୦ଟି ପାହାଡ଼ ନିଶ୍ଚିହ୍ନ
ଚୋରି ରୋକିବାରେ ଫେଲ ମାରିଛି ଖଣି ବିଭାଗ
ପାହାଡ଼ ଖନନ ଯୋଗୁଁ ଗଭୀର ଜଳାଶୟ ସୃଷ୍ଟି
ପରିବେଶ ଉପରେ କୁପ୍ରଭାବ, ବନ୍ୟଜନ୍ତୁଙ୍କ ପାଇଁ ବିପଦ ବଢିଛି