ଚିଲିକା ବିଧାୟକ ବିଜେପି ଯାଉଥିବା ନେଇ ବିଜେଡି ସାଂସଦଙ୍କ ଟୁଇଟ ପରେ ବିଜେପିର ପ୍ରତିକ୍ରିୟା। ପୃଥ୍ୱୀରାଜ ହରିଚନ୍ଦନ କହିଲେ ଏହା ସମ୍ପୂର୍ଣ୍ଣ ମିଛ

କନକ ବ୍ୟୁରୋ: ଚିଲିକା ବିଧାୟକ ପ୍ରଶାନ୍ତ ଜଗଦେବ ବିଜେପିରେ ଯୋଗଦେବେ ବୋଲି ବିଜେଡି ସାଂସଦ ସସ୍ମିତ ପାତ୍ର କରିଥିବା ଟୁଇଟ୍ ରାଜ୍ୟ ରାଜନୀତିକୁ ସରଗରମ କରଛି । ଏହି ପ୍ରସଙ୍ଗରେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି ବିଜେପିର ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ । କହିଛନ୍ତି, ଏହା ସମ୍ପୂର୍ଣ୍ଣ ମିଥ୍ୟା କଥା, କେନ୍ଦ୍ରମନ୍ତ୍ରୀଙ୍କ ସହ ଚିଲିକା ବିଧାୟକ ଯୋଗାଯୋଗରେ ନାହାନ୍ତି । ଯଦି ପ୍ରମାଣ ଅଛି ସସ୍ମିତ ବାବୁ ଦିଅନ୍ତୁ ବୋଲି କହିଛନ୍ତି ପୃଥିରାଜ ହରିଚନ୍ଦନ ।

ଏହାଛଡା ବିଜେଡି ସାଂସଦଙ୍କୁ ଆଳ କରି ତୃତୀୟ ମହଲାକୁ ଟାର୍ଗେଟ କରି ପୃଥ୍ୱୀରାଜ କହିଛନ୍ତି ସାଂସଦଙ୍କୁ ବ୍ୟକ୍ତିଗତ ଭାବେ ଜାଣେ । ସେ ଏଭଳି ଚରିତ୍ରର ବ୍ୟକ୍ତି ନୁହଁନ୍ତି । ତୃତୀୟ ମହଲାର ଇଙ୍ଗିତରେ ସେ ଏଭଳି କହୁଛନ୍ତି । ଗତକାଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସମାଲୋଚନା କରି ଟୁଇଟ୍ କରିଥିଲେ ବିଜେଡି ସାଂସଦ ସସ୍ମିତ ପାତ୍ର । ଟୁଇଟରେ ଲେଖିଥିଲେ । ବିଜେପିରେ ଯୋଗ ଦେଇପାରନ୍ତି ଚିଲିକା ବିଧାୟକ ପ୍ରଶାନ୍ତ ଜଗଦେବ । ବିଜେଡିର ବହିଷ୍କୃତ ନେତାଙ୍କୁ ଧର୍ମେନ୍ଦ୍ର କିପରି ଆପଣେଇ ନେବାକୁ ପ୍ରସ୍ତୁତ ହେଉଛନ୍ତି ବୋଲି ସେ ପ୍ରଶ୍ନ କରିଥିଲେ । ଏହାକୁ ନେଇ କଡା ପ୍ରତିକ୍ରିୟା ଦେଇଛନ୍ତି ପୃଥ୍ୱୀରାଜ ହରିଚନ୍ଦନ ।