ଓଡିଶାରେ ବିଜେପିର ମିଶନ ୨୪’। ୧ କୋଟି ୩୦ ଲକ୍ଷ ଭୋଟ୍ ପାଇଁ ପ୍ଲାନ୍।
କନକ ବ୍ୟୁରୋ: ପରୀକ୍ଷା ପୂର୍ବରୁ ଫଳାଫଳକୁ ନେଇ ଲକ୍ଷ୍ୟ ସ୍ଥିର କରିଛି ବିଜେପି । ବିଶେଷକରି ଓଡିଶାରେ ପୂର୍ବ ଅପେକ୍ଷା କେମିତି ଅଧିକ ଲୋକସଭା ଆସନ ଜିତିବ ସେଥିପାଇଁ ର୍ଟାର୍ଗେଟ ଫିକ୍ସ କରିଛି ଭାରତୀୟ ଜନତା ପାର୍ଟି । ଏଥିପାଇଁ ପ୍ରସ୍ତୁତି ମଧ୍ୟ ଆରମ୍ଭ କରିସାରିଛି ଏହି କେନ୍ଦ୍ରୀୟ ଦଳ । ୨୦୧୯ ସାଧାରଣ ନିର୍ବାଚନରେ ୮ଟି ସିଟରେ ବିଜୟ ଲାଭ କରିଥିବା ଦଳ ୨୦୨୪ ପାଇଁ ୧୮ଟି ଆସନ ଉପରେ ଆଖି ରଖିଛି । ୨୦୧୯ ରେ ଯେଉଁସବୁ ଲୋକସଭା ନିର୍ବାଚନ ମଣ୍ଡଳୀରେ ଦଳ ଦ୍ୱିତୀୟ ସ୍ଥାନରେ ରହିଥିଲା, ସେ ସବୁକୁ ଅଧିକ ଫୋକସରେ ରଖିଛି । ୧୨ଟି ନିର୍ବାଚନ ମଣ୍ଡଳୀକୁ ୬ଭାଗ କରି ଲୋକସଭା ପ୍ରବାସ କାର୍ଯ୍ୟକ୍ରମ ଆରମ୍ଭ କରିଛି । ତିନିଥାକିଆ କାର୍ଯ୍ୟକ୍ରମରେ କେନ୍ଦ୍ରମନ୍ତ୍ରୀ ଓ ବରିଷ୍ଠ ନେତୃତ୍ୱ ଏବଂ ସାଙ୍ଗଠନିକ ଦୃଷ୍ଟିକୋଣରୁ କାର୍ଯ୍ୟକ୍ରମ ଚାଲିଛି । କେନ୍ଦ୍ର ସରକାରଙ୍କ ଯୋଜନାଗୁଡିକର ସଫଳତାକୁ ଲୋକଙ୍କ ପାଖରେ ପହଞ୍ଚାଇବା ଏବଂ ତୃଣମୂଳ ସ୍ତରରୁ ଦଳର ସାଙ୍ଗଠନିକ ଦକ୍ଷତା ବଢାଇବା ଭଳି କାର୍ଯ୍ୟକୁ ଗୁରୁତ୍ୱ ଦିଆଯାଉଛି । ତେବେ ରାଜ୍ୟରେ ବିଜେଡିକୁ ଟକ୍କର ଦେଲା ଭଳି ସ୍ଥିତିରେ ବିଜେପି ନାହିଁ ବୋଲି କହିଛନ୍ତି ରାଜନନୈତିକ ବିଶେଷଜ୍ଞ ।
Kanak News is now on WhatsApp
Join and get latest news updates delivered to you via WhatsApp
ଦେଶରେ ତୃତୀୟ ଥର କ୍ଷମତାକୁ ଆସିବା ପାଇଁ, ୨୦୨୪ ସାଧାରଣ ନିର୍ବାଚନରେ ୩୫ କୋଟି ଭୋଟ ପାଇବାକୁ ଯୋଜନା କରିଛି ବିଜେପି । ଯେତେବେଳେ କି ୨୦୧୯ରେ ସାରାଦେଶରେ ବିଜେପିକୁ ମୋଟ ୨୨କୋଟି ୨୯ ଲକ୍ଷ ଭୋଟ ମିଳିଥିଲା । ସେହିପରି ୨୦୧୯ରେ ୩୦୩ ଆସନରେ ବିଜୟୀ ହୋଇଥିବା ବିଜେପି, ୩୫୦ ଲୋକସଭା ଆସନ ବିଜୟର ଲକ୍ଷ୍ୟ ନେଇ ଆଗଉଛି ।
ଗତ ନିର୍ବାଚନରେ ରାଜ୍ୟର ମୋଟ ୨୧ଟି ଲୋକସଭା ଆସନ ମଧ୍ୟରୁ ବିଜେଡି ୧୨ଟିରେ ବିଜୟଲାଭ କରିଥିଲା । ୮ଟି ଆସନରେ ବିଜୟୀ ହୋଇଥିଲା ବିଜେପି । ହେଲେ, ଭୋଟ ପ୍ରତିଶତ ଦେଖିଲେ ବିଜେଡିଠାରୁ ବିଜେପିର ବ୍ୟବଧାନ ବହୁତ କମ ଥିଲା । ବିଜେଡି ୪୨.୮ ପ୍ରତିଶତ ପାଇଥିଲାବେଳେ ୩୮.୪ ପ୍ରତିଶତ ଭୋଟ ହାତେଇଥିଲା ବିଜେପି ।