ମହାମୁକାବିଲା ପୂର୍ବରୁ ବିଜେପିର ମହା ଜନସମ୍ପର୍କ ଅଭିଯାନ। ଓଡ଼ିଶା ଆସିବେ ନରେନ୍ଦ୍ର ମୋଦୀ, ଅମିତ ଶାହା, ରାଜନାଥ ସିଂ

କନକ ବ୍ୟୁରୋ: ଗୋଟିଏ ମାସ ଧରି ଚାଲିବାକୁ ଥିବା ମହା ଜନସମ୍ପର୍କ ଅଭିଯାନର ଆରମ୍ଭ କରିଛନ୍ତି ପ୍ରଧାନମନ୍ତ୍ରୀ । ରାଜସ୍ଥାନର ଅଜମେରରୁ ଆରମ୍ଭ ହୋଇଥିବା ଏହି ଅଭିଯାନ, ଆସନ୍ତା ଜୁନ୍୍ ୩୦ ତାରିଖ ପର୍ଯ୍ୟନ୍ତ ଚାଲିବ । ୯ବର୍ଷର ଶାସନ କାଳରେ ମୋଦୀ ସରକାରଙ୍କ ସଫଳତା ଓ ଜନକଲ୍ୟାଣ ଯୋଜନା ସମ୍ପର୍କରେ ସିଧାସଳଖ ଲୋକଙ୍କ ଅବଗତ କରିବେ ଦଳୀୟ ନେତା ଓ କର୍ମୀ । ଏହି ଅଭିଯାନକ୍ରମରେ ଦେଶରେ ୫୧ଟି ବିଶାଳ ରାଲି, ୫୦୦ଟି ସ୍ଥାନରେ ଜନସଭା, ୬୦୦ ପ୍ରେସ୍ କନଫରେନ୍ସ କରାଯିବ । ଯାହା ୫୦୦ଟି ଲୋକସଭା କ୍ଷେତ୍ର ଓ ୪ହଜାର ବିଧାନସଭା କ୍ଷେତ୍ରକୁ ସଂଯୋଗ କରିବ ।

କେନ୍ଦ୍ରୀୟ ବିଜେପି ନେତାଙ୍କ ରଣନୀତିଠାରୁ ଆଉ ଗୋଟି ପାଦ ଆଗକୁ ବଢ଼ି ପ୍ରସ୍ତୁତି ଆରମ୍ଭ କରି ଦେଇଛି ରାଜ୍ୟ ବିଜେପି । ଏହି ମହା ଜନସମ୍ପର୍କ ଅଭିଯାନ ଜରିଆରେ ଓଡ଼ିଶା ବିଜେପି, ୩୭ ହଜାର ୬୦୬ ବୁଥରେ ପହଞ୍ଚିବେ ବିଜେପି ନେତା ଓ କର୍ମୀ । ୯ବର୍ଷର ସଫଳତା ବିଷୟରେ ଜଣାଇବା ପାଇଁ ଲିଫଲେଟ୍ ବାଣ୍ଟିବା ସହ ଲୋକଙ୍କ ସହ ଆଲୋଚନା କରିବେ ପ୍ରାୟ ୪ଲକ୍ଷ କାର୍ଯ୍ୟକର୍ତ୍ତା । ଓଡ଼ିଶାରେ ହେବ ୪ଟି ମହାସମାବେଶ । ଏହି ସମାବେଶରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ଗୃହମନ୍ତ୍ରୀ ଅମିତ ଶାହା, ପ୍ରତିରକ୍ଷା ମନ୍ତ୍ରୀ ରାଜାଥ ସିଂ ପ୍ରମୁଖ ଯୋଗଦେବେ । ସେହିପରି ଆଗାମୀ ନିର୍ବାଚନ ପାଇଁ କ୍ଲଷ୍ଟର ବ୍ୟବସ୍ଥା କରାଯାଇଛି । ଏହି କ୍ଲଷ୍ଟର ଅଞ୍ଚଳରେ ୮ଦିନ ଓ ୮ରାତି ରହିବେ କେନ୍ଦ୍ରମନ୍ତ୍ରୀ ।

ଏପଟେ ବିଜେପିର ମହା ଜନସମ୍ପର୍କ ଅଭିଯାନ ଓ ବିଜେପିର ପ୍ରସ୍ତୁତିକୁ ସମାଲୋଚନା କରିଛନ୍ତି ପିସିସି ସଭାପତି । ଶରତ ପଟ୍ଟନାୟକ କହିଛନ୍ତି – ୨୦୧୪ ନିର୍ବାଚନ ପୂର୍ବରୁ ମୋଦୀ ଦେଶବାସୀଙ୍କୁ ସ୍ୱପ୍ନ ଦେଖାଇଥିଲେ, ହେଲେ କୁଆଡ଼ା ଗଲା ୨ କୋଟି ଚାକିରି ଓ ୧୫ ଲକ୍ଷ ଟଙ୍କା । ପେଟ୍ରୋଲ, ଡିଜେଲ ଗ୍ୟାସର ଦାମ ହୁହୁ ହୋଇ ବଢ଼ିଛି । ଗରିବ ଲୋକ ବ୍ୟବହାର କରୁଥିବା କିରୋସିନି ଦାମ ୧୦୦ ଟଙ୍କା ପାର କରିଯାଇଛି । ଏହାର ଜବାବ୍ ଭୋଟର ନିର୍ବାଚନରେ ଦେବେ ବୋଲି କହିଛନ୍ତି ପିସିସି ସଭାପତି । ତେବେ କଂଗ୍ରେସ ମଙ୍ଗ ଧରିବା ପାଇଁ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଏବଂ ମଲ୍ଲିକାର୍ଜୁନ ଖଡଗେ ଓଡ଼ିଶା ଆସିବାର କାର୍ଯ୍ୟକ୍ରମ ଥିବା କହିଛନ୍ତି ପିସିସି ସଭାପତି ।
ମହା ଜନସମ୍ପର୍କ ଜରିଆରେ ବିଜେପିର ଏହି ପ୍ରସ୍ତୁତି ଭିତରେ ମୋଦୀ ସରକାରଙ୍କୁ ଚକ୍୍ମା ଦେବା ପାଇଁ ପ୍ରସ୍ତୁତ ହେଉଛନ୍ତି ବିରୋଧୀ । ଆଗକୁ କଡ଼ା ଟକ୍କର ଦେଖିବାକୁ ମିଳିପାରେ ।