ମୋଦୀଙ୍କ ଶକ୍ତିକୁ ବୁଝିପାରୁନାହାନ୍ତି ରାହୁଲ, ବେଶ କିଛି ବର୍ଷ କ୍ଷମତାର ଶୀର୍ଷରେ ରହିବ ବିଜେପି । ପ୍ରଶାନ୍ତ କିଶୋରଙ୍କ ବଡ ଭବିଷ୍ୟବାଣୀ ।
କନକ ବ୍ୟୁରୋ : ଆଗକୁ ଉତ୍ତରପ୍ରଦେଶ ଓ ପଞ୍ଜାବରେ ବିଧାନସଭା ନିର୍ବାଚନ ହେବାକୁ ଅଛି । ତେବେ ଏହାପୂର୍ବରୁ ବଡ ବୟାନ ରଖିଛନ୍ତି ନିର୍ବାଚନ ରଣନୀତିକାର ପ୍ରଶାନ୍ତ କିଶୋର । ବିଜେପି ବିରୋଧରେ ବିରୋଧୀଙ୍କୁ ଏକଜୁଟ୍ କରିବା ଦିଗରେ ପ୍ରଶାନ୍ତ କିଶୋର ଅଧିକାଂଶ ଦଳ ସହ ଯୋଗାଯୋଗରେ ଥିବା ନେଇ ଚର୍ଚ୍ଚା ହେଉଥିବା ବେଳେ ପ୍ରଶାନ୍ତଙ୍କ ବୟାନ ପୁଣିଥରେ ଭାରତୀୟ ରାଜନୀତିରେ ନୂଆ ଝଡ ସୃଷ୍ଟି କରିଛି । ସିଧାସଳଖ ପ୍ରଶାନ୍ତ କହିଛନ୍ତି, ଆଗାମୀ କିଛି ଦଶକ ପର୍ଯ୍ୟନ୍ତ ଭାରତୀୟ ରାଜନୀତିରେ ବିଜେପିର ଦବଦବା ରହିବ ଆଉ ବିରୋଧୀ ଦଳ ଗୁଡିକୁ ବିଜେପି ସହ ଲଢିବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ପ୍ରଶାନ୍ତ କିଶୋର କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ନେଇ ମଧ୍ୟ ବଡ ବୟାନ ଦେଇଛନ୍ତି । ମୋଦୀ ଯୁଗର ଶେଷ ପର୍ଯ୍ୟନ୍ତ ଅପେକ୍ଷା କରିବା ରାହୁଲ ଗାନ୍ଧୀଙ୍କ ସବୁଠୁ ବଡ ଭୁଲ ହୋଇପାରେ । ରାହୁଲ ଗାନ୍ଧୀ ଏହି ଭ୍ରମରେ ଅଛନ୍ତି ଯେ, କେବଳ ମୋଦୀ ଥିବା ଯାଏଁ ବିଜେପି କ୍ଷମତାରେ ରହିବ ବୋଲି । କିନ୍ତୁ ବିଜେପି ହାରୁ କି ଜିତୁ, ଭାରତୀୟ ରାଜନୀତିର କେନ୍ଦ୍ରବିନ୍ଦୁରେ ଦୀର୍ଘ ବର୍ଷ ଯାଏଁ ରହିବ ବିଜେପି । ଠିକ୍ ଯେଉଁଭଳି କଂଗ୍ରେସ ୪୦ ବର୍ଷ ଧରି ରହିଥିଲା । କାରଣ ଭାରତ ଭଳି ବିଶାଳ ଦେଶରେ ୩୦ ପ୍ରତିଶତ ଭୋଟରଙ୍କୁ ନିଜ ସପକ୍ଷକୁ ଆଣିବା ଅର୍ଥ କ୍ଷମତା ଅଳନ୍ଦିରେ ଦୀର୍ଘ ବର୍ଷ ଧରି ରହିବା । ଲୋକ ସରକାରଙ୍କ ଉପରେ ଅସନ୍ତୁଷ୍ଟ ଅଛନ୍ତି ଓ ଆଗାମୀ ନିର୍ବାଚନରେ ମୋଦୀ ସରକାରଙ୍କୁ ଏହାର ଜବାବ ଦେବେ ଏହା ଭାବିବା ସମ୍ପୂର୍ଣ୍ଣ ଭୁଲ । ମୋଦୀ ହଟିଗଲେ ମଧ୍ୟ ବିଜେପି ସହଜରେ କ୍ଷମତା ଅଳନ୍ଦିରେ ବାହାରିବ ନାହିଁ ।
ପ୍ରଶାନ୍ତ କିଶୋର କହିଛନ୍ତି, ଯେବେ ପର୍ଯ୍ୟନ୍ତ ଆପଣ ମୋଦୀଙ୍କ ଶକ୍ତିକୁ ବୁଝିବାରେ ଅସମର୍ଥ ଓ ତାଙ୍କ ରଣନୀତିକୁ ବୁଝିନାହାନ୍ତି ସେବେ ପର୍ଯ୍ୟନ୍ତ ତାଙ୍କୁ ସାମ୍ନା କରିବା କଷ୍ଟକର । ମୋଦୀ କିଭଳି ଏତେଶୀଘ୍ର ଲୋକପ୍ରିୟ ହୋଇପାରିଲେ ତାହା ଯଦି ଆପଣ ବୁଝିପାରିବେ ତେବେ ସରକାରକୁୁ ସାମ୍ନା କରି ପାରିବେ । ଅଧିକାଂଶ କଂଗ୍ରେସ ନେତା କହୁଛନ୍ତି, ମୋଦୀ ସରକାର ଆଉ ଅଳ୍ପ ଦିନ ପାଇଁ କ୍ଷମତାରେ ରହିବ । କାରଣ ଲୋକ ସରକାରଙ୍କ ଉପରେ ଅସନ୍ତୁଷ୍ଟ ହେଲେଣି ଓ ବିରୋଧୀଙ୍କ ସପକ୍ଷରେ ଏକ ହାୱା ବହିଲାଣି ଓ ଖୁବଶୀଘ୍ର ମୋଦୀଙ୍କୁ କ୍ଷମତାରୁ ହଟାଇବେ ଲୋକେ । କିନ୍ତୁ ଏହାକୁ ନେଇ ସନ୍ଦେହ ପ୍ରକାଶ କରିଛନ୍ତି ପ୍ରଶାନ୍ତ । ସେ କହିଛନ୍ତି, ଏଭଳି ହେବାର ସମ୍ଭାବନା ବହୁତ କମ । କାରଣ ଦେଶରେ ପେଟ୍ରୋଲ ଓ ଡିଜେଲ ଦର ଏତେ ମାତ୍ରାରେ ବୃଦ୍ଧି ହେବା ପରେ ସରକାରଙ୍କ ଉପରେ ଜନସାଧାରଣଙ୍କର ସେଭଳି ଆକ୍ରୋଶ ନାହିଁ । ତେଣୁ ମୋଦୀ ସରକାର ସହଜରେ ହଟିଯିବ ବୋଲି ବିରୋଧୀ ଯାହା ଭାବୁଛନ୍ତି ତାହା ଭୁଲ ପ୍ରମାଣିତ ହୋଇପାରେ ।