ସୁବାସଙ୍କ ସମର୍ଥନରେ ବାହାରିଲା ବିଜେପି । କହିଲା, ଗୃହରେ ସୁବାସ ଯାହା କରିଛନ୍ତି ଠିକ୍ କରିଛନ୍ତି , ଚାଷୀଙ୍କ ସହ ପ୍ରତାରଣା କରିଥିବାରୁ କ୍ଷମା ମାଗନ୍ତୁ ମୁଖ୍ୟମନ୍ତ୍ରୀ ।
କନକ ବ୍ୟୁରୋ : ସୁବାସଙ୍କ ସମର୍ଥନରେ ବାହାରିଲା ଦଳ । ବିଜେଡି ସୁବାସଙ୍କୁ ଟାର୍ଗେଟ କରିବା ପରେ ଏବେ ତାଙ୍କ ସମର୍ଥନରେ ବାହାରିଛି ଦଳ । ଚାଷୀଙ୍କ ହିତ ପାଇଁ ବିଧାନସଭା ଭିତରେ ସୁବାସ ଯାହା କରିଛନ୍ତି ଠିକ୍ କରିଛନ୍ତି, ଦଳ ତାଙ୍କ ସହ ରହିଛି ବୋଲି କହିଛନ୍ତି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର । ମଣ୍ଡିରେ ମାସ ମାସ ଧରି ଚାଷୀଙ୍କ ଧାନ ପଡ଼ିରହୁଛି । ମନ୍ତ୍ରୀ ଏ ନେଇ ପ୍ରତିଶୃତି ମଧ୍ୟ ଦେଇଥିଲେ ଧାନ ଉଠିବ ବୋଲି, କିନ୍ତୁ ବିଭିନ୍ନ ସ୍ଥାନରେ ଧାନ ଉଠୁନଥିବା ଅଭିଯୋଗ ହେଉଛି । ତେଣୁ ଦେବଗଡ ବିଧାୟକ ସୁବାସ ପାଣିଗ୍ରାହୀ ଗୃହ ଭିତରେ ଯାହା କରିଛନ୍ତି ଠିକ୍ କରିଛନ୍ତି ବୋଲି କହିଛନ୍ତି ଲେଖାଶ୍ରୀ ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ବିଧାନସଭା ଠାରୁ ଦେଢ଼ କିଲୋମିଟର ଦୂରରେ ରହୁଛନ୍ତି ହେଲେ ବଜେଟ ଅଧିବେଶନକୁ ଆସିଲେ ନାହିଁ ଏହା ବିରଳ କଥା । ୬୦୦ କିଲୋମିଟର ଦୂରରେ ଦଳୀୟ ସଭାରେ ଯୋଗ ଦେଇପାରିଲେ କିନ୍ତୁ ଦେଢ କିଲୋମିଟର ଦୂରରେ ଥିବା ବିଧାନସଭାକୁ ଆସିଲେନି । ଏହା ଠାରୁ ବଡ ବିରଳ ଘଟଣା କଣ ହୋଇପାରେ ବୋଲି ପ୍ରଶ୍ନ କରିଛନ୍ତି ଲେଖାଶ୍ରୀ । ଆଇନମନ୍ତ୍ରୀ ପ୍ରତାପ ଜେନାଙ୍କ ନାଁରେ ଥାନାରେ ଏତଲା ଦିଆଯାଇଛି। ତଥାପି ଆସି ବିଧାନସଭା କାର୍ଯ୍ୟରେ ଯୋଗ ଦେଉଛନ୍ତି । ଶିମିଳିପାଳରେ ନିଆଁ ଲାଗିଥିବା ବେଳେ ବିଜେଡିର ନେତା ବାରିପଦାରେ କ୍ରିକେଟ ଖେଳୁଥିଲେ, ଏହାଠାରୁ ବଡ ବିରଳ ଘଟଣା ହୋଇପାରେ । ଚାଷୀଙ୍କ ସହ ପ୍ରତାରଣା କରିଥିବାରୁ ମୁଖ୍ୟମନ୍ତ୍ରୀ ଆଗ କ୍ଷମା ମାଗନ୍ତୁ ବୋଲି କହିଛନ୍ତି ଲେଖାଶ୍ରୀ ।
ଓଡିଶାର ସରକାର କଣ ରାଜ୍ୟକୁ ଏଭଳି ସ୍ଥିତିକୁ ନେଇ ଗଲେଣି ଯେ ଓଡିଶାବାସୀ ଘରେ ଘରେ ଆତ୍ମହତ୍ୟା କରିବେ । ରାଜ୍ୟ ସରକାର ନିଜ ଦାୟିତ୍ୱ ମୁଣ୍ଡରୁ ଓହ୍ଲାଇ ପାରିବେ ନାହିଁ, ଚାଷୀଙ୍କ ଧାନ ଉଠିବ ଆଉ ତାହା ବି ପୁଣି ସରକାରଙ୍କ ଦ୍ୱାରା । ଯିଏ ଟୋକନ ପାଇଥାଉ ବା ନ ପାଇଥାଉ ସମସ୍ତଙ୍କର ଧାନ ଉଠିବ, ଏ ଦାୟିତ୍ୱ ରାଜ୍ୟ ସରକାର ନ ନେବା ପର୍ଯ୍ୟନ୍ତ ବିଜେପି ପକ୍ଷରୁ ପ୍ରତିବାଦ ଜାରି ରହିବ । ଯଦି ଚାଷୀଙ୍କ ଧାନ ନ ଉଠେ ତେବେ ଆହୁରି ପ୍ରତିବାଦ ତୀବ୍ରତର ହେବ ବୋଲି ଚେତାବନୀ ଦେଇଛି ବିଜେପି ।