ଦିଗଗଜ ରାଜନେତା ଲାଲକୃଷ୍ଣ ଆଡଭାନୀଙ୍କୁ ଭାରତ ରତ୍ନ । ସାମାଜିକ ଗଣମାଧ୍ୟମରେ ପ୍ରଧାନମନ୍ତ୍ରୀ ଦେଲେ ସୂଚନା
କନକ ବ୍ୟୁରୋ : ବିଜେପିର ବରିଷ୍ଠ ନେତା, ଭାରତର ପୂର୍ବତନ ଉପ-ପ୍ରଧାନମନ୍ତ୍ରୀ ଲାଲକ୍ରିଷ୍ଣ ଆଡଭାନୀଙ୍କୁ ମିଳିବ ଦେଶର ସର୍ବୋଚ୍ଚ ନାଗରିକ ସମ୍ମାନ – ଭାରତ ରତ୍ନ । ଏ ନେଇ ଘୋଷଣା କରିଛନ୍ତି ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଆଡଭାନୀଙ୍କ ଉଦ୍ଦେଶ୍ୟରେ ସୋସିଆଲ୍ ମିଡିଆ ‘ଏକ୍ସ’ରେ ମୋଦୀ ଲେଖିଛନ୍ତି – ‘ସେ ହେଉଛନ୍ତି, ଆମ ସମୟର ସବୁଠୁ ଅଧିକ ସମ୍ମାନନୀୟ ଜନନେତା । ଭାରତର ବିକାଶ ପାଇଁ ତାଙ୍କର ଅବଦାନ ଅବିସ୍ମରଣୀୟ । ତୃଣମୂଳ ସ୍ତରରୁ ରାଜନୈତିକ ଜୀବନ ଆରମ୍ଭ କରି ସେ ଉପ-ପ୍ରଧାନମନ୍ତ୍ରୀ ଭାବେ ଦେଶର ସେବା କରିଛନ୍ତି । ତାଙ୍କୁ ଭାରତ ରତ୍ନ ଦିଆଯିବ, ଏହା ମୋ ପାଇଁ ଅତ୍ୟନ୍ତ ଭାବପ୍ରବଣ ମୁହୂର୍ତ୍ତ ।’ ସମ୍ବଲପୁର ଗସ୍ତ ଅବସରରେ ମଧ୍ୟ ଏହି କଥା ଦୋହରାଇଛନ୍ତି ମୋଦୀ ।
Kanak News is now on WhatsApp
Join and get latest news updates delivered to you via WhatsApp
ଆଡଭାନୀଙ୍କୁ ଭାରତ ରତ୍ନ ଦିଆଯିବା ନେଇ ପ୍ରଧାନମନ୍ତ୍ରୀ ଘୋଷଣା କରିବା ପରେ ଦଳମତ ନିର୍ବିଶେଷରେ ଏହାକୁ ସ୍ୱାଗତ କରାଯାଇଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହା, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ଏନସିପି ସୁପ୍ରିମୋ ଶରଦ ପାୱାର, ବରିଷ୍ଠ ନେତା କପିଲ ସିବଲ ପ୍ରମୁଖ ଶୁଭେଚ୍ଛା ଜଣାଇଛନ୍ତି । ଏହାକୁ ନେଇ ଖୁସି ବ୍ୟକ୍ତ କରିଛନ୍ତି ଛତିଶଗଡ଼ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ ।
ରାମ ମନ୍ଦିର ଆନ୍ଦୋଳନରୁ ବିଜେପିକୁ ଶୂନ୍ୟରୁ ଶିଖରରେ ପହଁଚାଇଥିଲେ ବରିଷ୍ଠ ନେତା ଲାଲକୃଷ୍ଣ ଆଡଭାନୀ । ୧୯୯୦ରୁ ଆରମ୍ଭ ହୋଇଥିଲା ଆଡଭାନୀଙ୍କ ଏହି ଯାତ୍ରା । ସୋମନାଥ ମନ୍ଦିରରୁ ଅଯୋଧ୍ୟା ପର୍ଯ୍ୟନ୍ତ ଆଡଭାନୀଙ୍କ ରଥଯାତ୍ରା, ଭାରତୀୟ ରାଜନୀତିର ମୋଡ ବଦଳାଇ ଦେଇଥିଲା । ତାଙ୍କର ଓଜସ୍ୱିନୀ ଭାଷଣ ଜନମାନସରେ ବେଶ ପ୍ରଭାବ ପକାଉଥିଲା । ନିଜ ରାଜନୈତିକ ଜୀବନରେ ଅନେକ ସଫଳତା ପାଇଛନ୍ତି ଆଡଭାନୀ ।
ଆଡଭାନୀଙ୍କୁ ଭାରତ ରତ୍ନ
– ୧୯୭୭ ଜନତା ପାର୍ଟି ସରକାରରେ ସୂଚନା ଓ ପ୍ରସାରଣ ମନ୍ତ୍ରୀ
– ବିଭିନ୍ନ ସମୟରେ ୧୧ ବର୍ଷ ଧରି ବିଜେପିର ରାଷ୍ଟ୍ରୀୟ ଅଧ୍ୟକ୍ଷ
– ୭ ଥର ସାଂସଦ ଭାବେ ନିର୍ବାଚିତ
– ଲୋକସଭାରେ ବିରୋଧୀ ଦଳ ନେତା
– ବାଜପେୟୀଙ୍କ ସରକାରରେ ଗୃହମନ୍ତ୍ରୀ ଓ ଉପ-ପ୍ରଧାନମନ୍ତ୍ରୀ
– ୨୦୧୫ରେ ପଦ୍ମ ବିଭୂଷଣ ସମ୍ମାନରେ ସମ୍ମାନିତ