ମଣ୍ଡିରେ ଚାଷୀର ଧାନ ନଉଠିବାରୁ ବଢିଲା ଅସନ୍ତୋଷ । ବରଗଡ଼ରେ ଜିଲ୍ଲାପାଳଙ୍କ ଅଫିସ୍ ଆଗରେ ଧାନ ଛାଡ଼ି ଚାଲିଆସିଲେ ଚାଷୀ, ମୁହାଁମୁହିଁ ହେଲେ ଶାସକ ବିରୋଧୀ ।
କନକ ବ୍ୟୁରୋ : ଚାଷୀ ପ୍ରସଙ୍ଗ ନେଇ ରାସ୍ତାକୁ ଓହ୍ଲାଇଛି ବିଜେପି । ମଣ୍ଡିରୁ ଧାନ ଉଠୁନଥିବାବେଳେ, ଚାଷୀଙ୍କ ଟୋକନ ଅବଧି ଲାପ୍ସ କରିଯାଇଛି । ଏଭଳି ସ୍ଥିତିରେ ମଣ୍ଡିରୁ ଧାନ ଉଠାଇବାକୁ, ରାଜ୍ୟ ସରକାର ଧାନ କିଣା ଅବଧି ବଢ଼ାଇବା ପାଇଁ ଚିଠି ଲେଖନ୍ତୁ ବୋଲି ଦାବି କରିଛି । ସେପଟେ ବିଜେଡି କହିଛି, ଦୋଷ ଲୁଚାଇବା ପାଇଁ ଆନ୍ଦୋଳନ କରୁଛି ବିଜେପି ।
Kanak News is now on WhatsApp
Join and get latest news updates delivered to you via WhatsApp
ଧାନ ବିକ୍ରିକୁ ନେଇ ଚାଲିଥିବା ରାଜନୀତି ଭିତରେ ବରଗଡ଼ରୁ ଆସିଥିବା ଚିତ୍ର, ଏଭଳି କିଛି କାହାଣୀ ବୟାନ କରୁଛି, ଯାହା ଚାଷୀର ଅସହାୟତା ଓ ପ୍ରତିବାଦକୁ ସୂଚାଉଛି । ଟୋକନ୍ ଅବଧି ସରିଗଲା, ଧାନ କିଣା ଅବଧି ବି ଚାଲିଗଲା । ହେଲେ ନା ଧାନ ଉଠିଲା, ନା’ ଚାଷୀର ଦୁଃଖ ଗଲା । ଏଭଳି ସ୍ଥିତିରେ ବରଗଡ଼ ଜିଲ୍ଲାପାଳଙ୍କ ଅଫିସ୍ ଆଗରେ ଧାନ ଛାଡ଼ି ଘରକୁ ଚାଲିଗଲେ ଚାଷୀ ।
ଚାଷୀ କାନ୍ଦୁଛି, ରାଜନୀତି ତେଜୁଛି । ମୁହାଁମୁହିଁ ଶାସକ ବିରୋଧୀ । ଚାଷୀ ପ୍ରସଙ୍ଗକୁ ନେଇ ରାସ୍ତାକୁ ଓହ୍ଲାଇଛି ଭାରତୀୟ ଜନତା ପାର୍ଟି । ଓଡ଼ିଶାରେ ଟୋକନ୍ ବ୍ୟବସ୍ଥା ସଂପୂର୍ଣ୍ଣ ବିଫଳ ହୋଇଥିବା ବିଜେପି ଅଭିଯୋଗ କରି ରାଜ୍ୟର ବିଭିନ୍ନ ସ୍ଥାନରେ ବିଜେପି ଚକାଜାମ୍ ଆନ୍ଦୋଳନ କରିଛି । ଚାଷୀଙ୍କ ଧାନ ଉଠାଇବା ପାଇଁ ରାଜ୍ୟ ସରକାର କେନ୍ଦ୍ରକୁ ଚିଠି ଲେଖିବା ପାଇଁ ଦାବି କରିଥିବା ବେଳେ ମଣ୍ଡି ଅବ୍ୟବସ୍ଥା ପାଇଁ କେନ୍ଦ୍ରକୁ ଦୋଷ ଠେଲିଛି ବିଜେଡି ।
ରାଜନୀତିର ଏହି ବୟାନବାଜି ଭିତରେ ଧାନ କିଣାର ଅବଧି ସରିଯାଇଛି । ଆଉ ଏଭଳି ସ୍ଥିତିରେ ମଣ୍ଡିରେ ଗଦା ହୋଇଥିବା ଧାନ ବିକ୍ରି ହେବ କେମିତି ତାକୁ ନେଇ ଚିନ୍ତାରେ ରାଜ୍ୟର ଚାଷୀ ।