ବିଜେପି ପ୍ରବକ୍ତାଙ୍କ ବିବାଦୀୟ ବୟାନ : କହିଲେ, ପାକିସ୍ତାନର ରାଷ୍ଟ୍ରପିତା ମହାତ୍ମା ଗାନ୍ଧୀ

241

ସାଧ୍ୱୀ ପ୍ରଜ୍ଞା ସିଂହ ଠାକୁରଙ୍କ ନାଥଉରାମ ଗୋଡସେଙ୍କୁ ଦେଶଭକ୍ତ କହିଥିବା ବୟାନକୁ ନେଇ ବିବାଦ ଥମୁନଥିବାବେଳେ ଏପଟେ ମଧ୍ୟ ପ୍ରଦେଶ ବିଜେପି ପ୍ରବକ୍ତା ଅନିଲ ସୌମିତ୍ର ମଧ୍ୟ ମହାତ୍ମା ଗାନ୍ଧୀଙ୍କ ଉପରେ ବିବାଦୀୟ ଟିପ୍ପଣୀ ଦେଇଛନ୍ତି । ଅନିଲ ସୌମିତ୍ର ନିଜ ଫେସବୁକ ପୋଷ୍ଟରେ ଲେଖିଛନ୍ତି- ରାଷ୍ଟ୍ରପିତା ଥିଲେ, କିନ୍ତୁ ପାକିସ୍ତାନ ରାଷ୍ଟ୍ରର । ଭାରତ ଦେଶରେ ତାଙ୍କ ଭଳି କୋଟି କୋଟି ପୁତ୍ର ଅଛନ୍ତି । କିଛି ଯୋଗ୍ୟ ତ କିଛି ଅଯୋଗ୍ୟ ।

ସୌମିତ୍ର କହିଛନ୍ତି କି, “କଂଗ୍ରେସ ତାଙ୍କୁ ରାଷ୍ଟ୍ରର ପିତା କହିଲା, ରାଷ୍ଟ୍ରର କୌଣସି ପିତା ନଥାନ୍ତି, ପୁତ୍ର ଥାନ୍ତି । ଚର୍ଚ୍ଚରେ ଥାଆନ୍ତି ଫାଦର, କଂଗ୍ରେସ ତାର ହିନ୍ଦୀ ରୂପାନ୍ତରଣ ପିତା କରିଦେଲା । ପାକ ପାକିସ୍ତାନର ନିର୍ମାଣ ଗାନ୍ଧୀଜିଙ୍କ ପ୍ରୟାସ ଦ୍ୱାରା ହେଲା । ଜିନ୍ନା ଓ ନେହେରୁଙ୍କ ସ୍ୱପ୍ନକୁ ସେ ସାକାର କଲେ । ଆମେ ଗାନ୍ଧୀଜିଙ୍କ ବିଚାରଧାରାକୁ ପ୍ରୋତ୍ସାହିତ କରୁଥିବା ଲୋକ । ଆମେ ସଂଘର ସ୍ୱଂୟସେବକ ରୂପେ ପ୍ରତିଦିନ ସକାଳେ ତାଙ୍କ ନାମ ନେଉ ।”

ସୂଚନାଯୋଗ୍ୟ, ଗୋଡସେଙ୍କ ଠାରୁ ଆରମ୍ଭ ହୋଇଥିବା ବିବାଦୀୟ ବୟାନ ଥମିବାର ନାଁ ନେଉ ନାହିଁ । ପ୍ରଥମେ କମଲ ହାସନ ଗୋଡସେଙ୍କୁ ନେଇ ସ୍ୱାଧୀନ ଭାରତର ପ୍ରଥମ ହିନ୍ଦୁ ଆତଙ୍କବାଦୀ କହିଥିବାବେଳେ ଏହାକୁ ନେଇ ଅନେକ ନେତା ନିଜ ପ୍ରତିକ୍ରିୟା ରଖିଥିଲେ । ଏହାର ପ୍ରତିକ୍ରିୟା ରଖି ବିଜେପି ପ୍ରାର୍ଥୀ ସାଧ୍ୱୀ ପ୍ରଜ୍ଞା ବିବାଦରେ ଅଛନ୍ତି । ସେ ଗୋଡସେଙ୍କୁ ଦେଶଭକ୍ତ କହି ତାଙ୍କ ମନ୍ତବ୍ୟ ପାଇଁ ପୁଣି ଥରେ କ୍ଷମା ମାଗିଛନ୍ତି ।

Comments are closed.